Jọnu 20
20
Ilu ọbu daburu iwhoro
(Mát. 28:1-8; Mak. 16:1-8; Luk. 24:1-12)
1Ọ bya erwua lẹ gẹregere chi-asahu, lẹ mbọku mbụ l'idzu abalị ẹsaa bụ iya bụ mbọku Sọnde, g'ọochi dụkwadua, Méri Mágudala gbarụ bya l'ilu ono. Ọ bya awhụa l'a gbụfuwaru ẹwhuru ono, e shi gude swichia ọnu ilu ono. 2Ọo ya bụ, o gude ntụtu-ọso gbakfu Sáyịmonu Pyita mẹe onye ọwhunalanu, l'etso ụzo Jisọsu, Jisọsu yeru obu; je asụ whẹ: “A pafụakwaru Onye-Nwe-Ọha l'ilu ono. Tọ hẹ l'anyi marụ ẹka a tọgboru iya.”
3Pyita yẹle onye ono, l'etso ụzo Jisọsu gbalihu tụgburu jeshia l'ilu ono. 4Whẹ whẹ ẹbo ono tụko ye ọkpa l'ọso agba eje. Ọle onye ọwhuna, l'etsokwawho ụzo Jisọsu gbagharu Pyita; vuru iya ụzo gbarwua ilu ono. 5Ọ bya ewhuru ewhuru nyoo ime ilu ono, whụa ẹkwa ọcha ono, e gude kwaa Jisọsu lia; g'ọ wụshiru l'ẹka ono. Ọle ọ tọ bahụdu l'ime ilu ono. 6Sáyịmonu Pyita l'agbawa-a etso iya l'azụ. Ọ byarwua ẹka ono, ọ bahụ l'ime ilu ono; ọ whụa ẹkwa ọcha ono g'ọ wụshiru, 7mẹe ẹkwa ono, e gude whukpua ya l'ishi. Ẹkwa nke ishi ono yẹle ẹkwa ọcha whọ ta awụshiduru l'ẹka lanụ. A whụwhukoberu ẹkwa nke ishi dobe iche. 8Tọ dụ iya bụ l'onye l'etso ụzo Jisọsu ọwhuna, bụ iya vu ụzo gbarwua l'ilu ono; bya abahụkwawho. O je egude ẹnya iya whụa, o kweta. 9O noo lẹ nteke ono bẹ whẹ l'ẹteke amadụaro iwhe e deru l'ẹkwo Okfu Chileke, sụru lẹ Jisọsu shifutajẹ l'ọnwu teta nọdu ndzụ. 10Tọ dụ iya bụ lẹ ndu ono, l'etso ụzo Jisọsu atụgburu, onye ọwhu nọnu; ya alashia ibe nkiya.
Jisọsu l'egoshi Méri Mágudala onwiya
(Mát. 28:9-10; Mak. 16:9-11)
11Méri bya akfụru lẹ mgboro ọnu ilu ono arya ẹkwa. Ọ ryanyaa ẹkwa ono, o whuzeta ewhuzeta enyo ime ilu ono. 12Ọ whụa ojozhi-imigwe labọ, yekotaru uwe ọcha; nọdu anọdu l'ẹka ono, e shi dobe ọdzu Jisọsu ono. Onye lanụ nọdu l'ụzo ishi, onye ọwhu nọdu l'ụzo ọkpa. 13Whẹ sụ iya: “Nwanyị ?ọo gụnu bẹ l'ịiryaru?”
Ọ sụ whẹ: “Iwhe mu l'aryaru bụ l'a patawarụ Onye-nwe-mu-nụ, tọ hẹ lẹ mu marụ ẹka whẹ tọgboru iya.”
14Ekfuge, l'ookfuge iwhe ono; ọ bya aghachi whụa Jisọsu g'ọ kfụru, ọle ọ tọ madụ l'ọo Jisọsu. 15Jisọsu sụ iya: “Nwanyị ?ọo gụnu bẹ l'ịiryaru? ?Ọo onye bẹ l'ịicho?”
Méri nọdunu sụ g'ọo onye l'eche mgbabu ono. Tọ dụ iya bụ lẹ Méri asụ iya: “Byiko, ọ -bụru l'ọo ghu patarụ iya pafụ, kanụru mu ẹka, ị parụ iya je atọgbo tẹ mu je apata iya.”
16Jisọsu ku iya: “Méri.” Méri bya aghachi gude okfu Arámayiku sụ iya: “Rabónayi” bụ iya bụ O-zhi-iwhe.
17Jisọsu sụ iya: “T'ẹka ghu be erwukwa mu l'ẹhu, o noo lẹ mu tẹke alarwudua l'imigwe jekfu Nna mu. Ọo l'ọ bụ, tụgbua jekfu ụnwunna mu whẹ je asụ whẹ lẹ mu l'alawaa imigwe alakfu onye ono, bụ Nna mu, bụru Nna unu, mbụ onye ono bụ iya bụ Chileke mu, bụkwaruwho Chileke unu.”
18Méri Mágudala jekfu ndu ono, l'etso ụzo Jisọsu je asụ whẹ: “Mu gudeekwaa ẹnya mu whẹ ẹbo ẹbo whụa Onye-Nwe-Ọha.” Ọ sụ whẹ l'ọ kwa iya zhiru iya ozhi-a.
Jisọsu l'egoshi ndu l'etso ụzo iya onwiya
(Mát. 28:16-20; Mak. 16:14-18; Luk. 24:36-49)
19O rwua l'urwẹnyashi mbọku ono bụ iya bụ mbọku mbụ l'idzu abalị ẹsaa, ndu l'etso ụzo Jisọsu swochikota iwhe l'ụlo, whẹ dọkoberu nkele whẹ l'atsụ ndu Ju egvu. A bya l'amadeshia, Jisọsu byawaa bya akfụru whẹ l'echi kele whẹ ekele sụ whẹ: “Unu bukwaru guu.” 20O kelegelewho nno, ọ bya egoshi whẹ ẹka iya whẹ ẹbo; goshi whẹ mgburẹku iya. Ẹhu tsọo ndu ono, l'etso iya ụtso gẹ whẹ whụru Onye-Nwe-Ọha. 21Jisọsu sụkwa whẹ ọdo: “T'unu bukwaru guu. Ọo gẹ Nna mu zhiru mu bụ gẹ mu zhiru unu.” 22O kfugelewho nno, ọ bya ekushi whẹ Ume sụ whẹ: “Unu nata Ume-Dụ-Nsọ. 23Iwhe bụ ndu unu gụru nvụ l'iwhe-dụ-ẹji, ndu ọbu meru bẹ Chileke gụakwaru ndu ọbu nvụ. Ndu lile, unu l'agụaru nvụ l'iwhe-dụ-ẹji, whẹ meru bẹ Chileke l'ẹte agụkwaaru nvụ.”
Jisọsu yẹle Tọ́mosu
24Ọo ya bụ, o nweru nwoke lanụ, ẹwha iya bụ Tọ́mosu, l'ẹte anọo l'ẹka ono. Tọ́mosu ono bẹ lịkwa-a l'ụmadzu iri l'ẹbo ono, l'etso ụzo Jisọsu. T'ọ nọ l'ẹka ono nteke ono, Jisọsu byarụ. Iwhe ọdo, l'eekujefua ya bụ Ejima. 25Ọo ya bụ, e megelewho, ndu ọwhu whẹ l'iya tụkoru etso ụzo Jisọsu sụ iya: “Anyi whụakwaru Onye-Nwe-Ọha ọbu.”
Tọ́mosu sụ whẹ: “Mu te ekwetakwa gbahakwaa lẹ mu gude ẹnya mu whẹ ẹbo-ẹbo whụa ichi aga ono l'ọbochi-ẹka iya, mbụ mu woru mkpụshi-ẹka mu ye l'ẹka ono, aga shi dụ iya, woru ẹka mu pyokwaawho lẹ mgburẹku iya. Ọ dụa nno bẹ mu l'ete ekwetakwa.”
26A nọlewho abalị ẹsato, ndu l'etso ụzo Jisọsu nọdukwa l'ụlo ono ọdo whẹ lẹ Tọ́mosu. A swochikotakwa mgbo ụlo ono aswochi. Jisọsu byalẹkwaa bya akfụru whẹ l'echi, kele whẹ ekele sụ whẹ: “T'unu bukwaru guu.” 27O kfugee nno bya asụ Tọ́mosu: “Ngwa, rwụa mu mkpụshi-ẹka l'ọbochi-ẹka mu l'ẹka-a. Ngwa, mee mu ẹka lẹ mgburẹku ọbu. Tọ́mosu, ba abụhekwa ekwegekwe. Kwetaje!”
28Tọ́mosu sụ iya: “Onye-nwe-mu-nụ, bụ Chileke mu!”
29Jisọsu sụ iya: “?Ọo nke l'ọo l'ị whụru mu ntaa kpatarụ iwhe i kwetaru? Ẹhu-ụtso b'a gọru nụ ndu l'awhụa l'ẹnya whẹ kwetalee!”
Iwhe e kwoberu dee ẹkwo-ọ
30Jisọsu nọdukwawho megbabe igweligwe iwhe ọdo, a whụrulenya l'iwhu ndu l'etso ụzo iya, ọle e te edekotadu iwhe ono g'o ha l'ẹkwo. 31Ọle ndu ọwhu e deru b'e deru nke ọwhu unu l'e-gude iya kweta l'ọo Jisọsu bụ Kuráyisutu ọbu, Chileke kweru ụkwa iya, bụ Nwa Chileke mẹe t'unu woru onwunu ye iya l'ẹka nke ọwhu unu l'e-shi iya l'ẹka nweru ndzụ.
Currently Selected:
Jọnu 20: Ezaa
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
