Jọnu 21

Jisọsu l'egoshi ụmadzu ẹsaa lẹ ndu l'etso ụzo iya onwiya

1E megekwaawho, Jisọsu bya egoshikwawho ndu l'etso ụzo iya onwiya ọdo l'agụga eze-ẹnyimu Tayibíriyasu. Ọ waa g'o gude goshi whẹ onwiya ọbu ndọwa. 2Lẹ Sáyịmonu Pyita mẹe Tọ́mosu, l'eekuje Ejima mẹe Natániyelu, onye Kena Gálili mẹe ụnwu Zébedi mẹfukwawho ụmadzu labọ ọdo l'ime ndu ono, l'etso ụzo Jisọsu, tụkoru nọdukota l'ẹka lanụ. 3Tọ dụ iya bụ lẹ Sáyịmonu Pyita asụ whẹ: “Mbẹdua l'ejeekwa l'aga-ẹma.”

Whẹ sụ iya: “Anyi l'e-tsokwa ghu eje.” Whẹ tụko wụfu jeshia l'aga. Whẹ jerwua je atụko bahụ l'ụgbo ono. Whẹ tụko ẹnyashi owhu ono dekota aga, whẹ ta anmata t'ọ kadụ mma l'ọo ikpọkpa. 4O rwulewho lẹ gẹregere ẹnyangge, whẹ bya l'eledeshia ẹnya, Jisọsu kfụwaru l'agụga mini ono, whẹbe ndu ono, l'etso ụzo iya ta ama l'ọo Jisọsu kfụru l'ẹka ono. 5Jisọsu sụ whẹ: “Ụnwu mu ?ọ dụ ẹma, unu nmatarụ?”

Whẹ sụ iya: “Waawa, ọ tọ dụkwa.”

6Ọ sụ whẹ: “Unu ghaa ụgbu unu ọbu l'ụzo ẹka-ụtara ụgbo ono, oo-nwee iwhe unu l'aharụ nmata.” Ọo ya bụ, whẹ bya aghaa ụgbu whẹ ono, whẹ ta adụhenu ike lọbata iya l'ime ụgbo whẹ nkele ẹma, whẹ nmatarụ bẹ ha l'igweligwe.

7Ọo ya bụ onye onona, l'etso ụzo Jisọsu, Jisọsu yeru obu sụ Pyita: “Ọ kwa Onye-Nwe-Ọha!” Anụnu, Sáyịmonu Pyita nụru l'ọo Onye-Nwe-Ọha, ọ chịta uwe iya yee nkele o to shidu yee uwe iya, gvuda lẹ mini ono gvufushia. 8Ọwhube ndu l'etso ụzo Jisọsu ọwhu nọdu l'ime ụgbo ono l'alọkaa ụgbu ono, ẹma jiru godogodo, eshita ụzo eli-mgboko nkele whẹ ta anọdudu otẹnya l'ụzo eli-mgboko. Whẹ nọdua iwhe ha g'ọo nha-ọkpa ụkporo ise. 9Whẹ lụfutalewho eli-mgboko, whẹ whụa ovokọku l'ẹka ono. Whẹ whụa ẹma, daburu l'ọku ono mẹkwawho buredi. 10Jisọsu sụ whẹ: “Unu hataada ẹma ọbu, unu nmatarụ ntaa bya.”

11Ọo ya bụ, Sáyịmonu Pyita je abahụkwa l'ụgbo ono ọdo je alọfuta ụgbu ono eli-mgboko. Iwhe jiru iya nụ bụ-zhiaruwho akarakpoto akarakpoto ẹma. Ẹma ono, dụ iya nụ tụkoru dụ ụkporo ẹma ugbo ẹsaa l'ẹma iri l'ẹbo. Ẹma ono hakwa l'igweligwe g'ọ ha nno, ọle ụgbu ono ta adụkwa ẹka o jeru ome kinyangu nke alakahụ. 12Jisọsu sụ whẹ: “Unu bya akpọo ọkpuchi.” Tọ dụhe ndu ono, l'etso ụzo iya onye ọwhu tụru ama nke tẹ ya jị iya sụ: “?Ọo onye b'ị bụ?” Gẹ whẹ tụkowaru marụ l'ọo Onye-Nwe-Ọha. 13Jisọsu bya abya ewota buredi ono nụ whẹ, ọ nụfukwaa whẹ whọ ẹma whọ.

14Egoshi onona, o goshiru whẹ onwiya kwewa iya ugbo ẹto, Jisọsu goshiru ndu l'etso ụzo iya onwiya g'o shilewho l'ọnwu teta nọdu ndzụ.

Jisọsu yẹle Pyita

15Whẹ kpọ-gelewho ọkpuchi ono, Jisọsu sụ Sáyịmonu Pyita: “Sáyịmonu nwa Jọnu; ?Ị ka oye mbẹdua obu l'ezhi karụ gẹ ndu lile-e yeru mu iya?”

Pyita sụ iya: “Ee, Onye-Nwe-Ọha, ị marụ lẹ mu yeru ghu obu.”

Jisọsu sụ iya: “Nụjekwa ụnwu atụru mu nri.” 16Jisọsu byakwa eku iya nke ugbo labọ: “Sáyịmonu nwa Jọnu ?i yeru mu obu l'ezhi?”

Pyita sụ iya: “Ee, Onye-Nwe-Ọha, ị marụ lẹ mu yeru ghu obu.”

Jisọsu sụ iya: “Letajekwaru mu atụru mu ẹnya.” 17Ọ byakwa eku iya nke ugbo ẹto: “Sáyịmonu nwa Jọnu ?i yeru mu obu?”

Áwhụ bya Pyita l'ẹhu lẹ Jisọsu jịru iya nke ugbo ẹto sụ iya: “?I yeru mu obu?” Pyita sụ iya: “Onye-Nwe-Ọha, gụbedua l'onwoghu tụkoru iwhe lile makọtaru, ị marụa lẹ mu yeru ghu obu.”

Jisọsu sụ iya: “Nụjekwa atụru mu nri.” 18Sụ iya: “Iwhe mu l'akarụ ghu bụ lẹ: nteke ị bụ nwokorọbya b'ọ bụ ghu l'agbashije chịta ẹkwa ghu weru l'ukfu, lọbaru jeshia ẹka, dụ ghu uwhere, ọle nteke ị kahụleruwho bẹ l'ii-chili ẹka ghu whẹ ẹbo, onye ọdo abya ewebe ghu ẹkwa ghu l'ukfu, duta ghu jeshia ẹka l'adụa ghu uwhere ejeje.” 19Iwhe ono b'o kfuru gude tụa ọnu gẹ Pyita l'e-gude nwụhu, shi nno goshi ọdu-biribiri Chileke. Jisọsu kfugelewho iwhe ono, ọ sụ Pyita: “Tsoru mu.”

Jisọsu yẹle onye l'etso ụzo iya ọwhuna

20Pyita bya aghaa ẹnya l'azụ, whụa onye ọwhuna, bụkwawho onye l'etso ụzo Jisọsu, o yeru obu gẹ l'ootso whẹ. Ọo ya bụ onye onona, nọkube Jisọsu ntse gẹ whẹ l'eri nri-ẹnyashi whọ, bụ iya jịru iya sụ iya: “Onye-Nwe-Ọha ?ọo onye bụ onye ọbu, l'e-seru ghu ye ọbu?” 21Pyita whụle iya whọ, ọ jị Jisọsu sụ iya: “Onye-Nwe-Ọha ?ndẹe gẹ nke onye ọwa dụ dụ?”

22Jisọsu sụ iya: “Ọ -bụru l'ọo uche-obu mụbe Jisọsu l'ọo-nọdu ndzụ jeye nteke mu l'a-bya ọdo ?ẹka ghu dụ iya l'awee? Tsojezhiawho mụbe Jisọsu!”

23O noo ya, iwhe bụ ụnwunna gẹ whẹ ha kfulahaa l'iwhe ono, o kfuru nno bẹ bụ l'onye onona, l'etsokwawho ụzo Jisọsu ta abyadụ l'anwụhu anwụhu. Ọle iwhe Jisọsu kfuru iya ta abụkwa l'ọ tọ byadụ l'anwụhu. Iwhe o kfuru bụkwa l'ọ sụru: “Ọ -bụru l'ọo uche-obu mụbe Jisọsu l'ọo-nọdu ndzụ jeye nteke mu l'a-bya ọdo ?ẹka ghu dụ iya l'awee?”

24Ọo onye ono, l'etso ụzo Jisọsu bẹ l'ekfu iwhe o gude ẹnya iya whụa l'iwhe lile-e g'ọ ha. Ọ bụkwaru iya whọ deru iwhe lile-e, mbụ anyi marụ l'iwhe o deru b'o kfuru ire-lanụ.

25O nwegekwaruroo igweligwe iwhe ọdo, Jisọsu meshiru. Iwhe mu l'arịkwanu bụru lẹ nggẹ l'ọo iwhe e mederu t'a tụko iwhe ono g'ọ ha dekota l'ẹkwo nnanụ nnanụ mẹe mgboko-o l'owhu tẹge edzukwa odobe ẹkwo, e dekotaru iya.

Currently Selected:

Jọnu 21: Ezaa

Highlight

Copy