Ozhi ndu ishi-ozhi 1

1Nnajị anyi Tiyọfilosu; l'ẹkwo, mu vu ụzo dehawaru ghu, bẹ mu deru iwhe lile, Jisọsu watarụ ememe mẹe iwhe lile, ọ watarụ ezhizhi eshi mbụlembu, 2jeye mbọku Chileke dutaru iya duba iya l'imigwe. Ọ byalẹwho l'alashi l'imigwe, o shi l'ẹka Ume-Dụ-Nsọ zhi ndu ono, ọ họtaru tẹ whẹ bụru ndụ-ishi-ozhi iya iwhe whẹ l'e-me. 3O jegeeru iwhe-ọtsulanu ono o jeru, nwụhu-gee teta nọdu ndzụ, ọ bya anọo ụkporo abalị ugbo labọ. L'ime ụkporo abalị ugbo labọ ono b'o goshiru whẹ onwiya lẹ ya nọwaa ndzụ. O goshigee whẹ onwiya ono, o goshibakwaa whẹ iya whọ, nke ọwhu o doru whẹ ẹnya; tọ dụhewaro onye l'atụ ẹgo woo: ?m'a marụ ọ nọdu-a ndzụ. Whẹ gude ẹnya whẹ whụa ya; o kfuru whẹ gẹ Chileke, bụ eze l'e-shi medzua iwhe ọ watarụ ememe. 4Ọ bya enweru nteke whẹ l'iya nọkoberu l'ẹka lanụ, o kfuru whẹ sụ whẹ: “Unu ba alụfukwa lẹ Jerúsalẹmu. T'unu nmẹkwaa anmẹe ngabẹru iwhe ono, Nna kweru ụkwa lẹ ya l'a-nụ unu ono, bụ iya bụ iwhe ọma-a, mu kfuhawaru unu okfu iya. 5O noo lẹ Jọnu gude mini mee baputizimu, ọle a -nọlewho ujiku olemole nta-a, bẹ l'ee-gude Ume-Dụ-Nsọ mee unu baputizimu.”

Jisọsu l'ala l'imigwe

6Ọo ya bụ, ndụ-ishi-ozhi ono, whẹ lẹ Jisọsu dzukobelewho, whẹ jị iya sụ: “Onye-Nwe-Ọha, ?o rwuwaru nteke l'ii-nuwhu ndu Ízurẹlu alị-eze whẹ azụ tọo gụnu?” 7Jisọsu sụ whẹ: “Ọ tọ gbadụ unu l'ọma mbọku ọbu, ọdua l'ọo oge nteke ọbu, Nna bẹ gudewaa ẹka iya dobe l'onwiya. 8Ọle Ume-Dụ-Nsọ l'a-bya unu l'ẹhu, ya emee unu, unu eshihu ike, nke ọwhu unu l'a-nọ ekfu iwhe unu whụru, nwụru l'ẹhu mụbe Jisọsu. Unu l'e-kfu iya lẹ Jerúsalẹmu, mẹe l'alị Judíya l'owhu, mẹwaro l'alị Samériya, jeyewaro l'iwhe bụ ẹka mgboko-o jeberu.” 9O kfugelewho nno, whẹ nọdu ele iya ẹnya, Chileke kulia ya. Urwukpu domia ya, whẹ whụ-beru iya.

10Whẹ dazhịbelewho ẹnya l'akpamigwe l'ẹka ono g'o mibageeru. Unwoke labọ, yeru uwe ọcha bya bya akfụkube whẹ 11sụ whẹ: “Unubẹ unwoke Gálili, ?ọo gụnu meru g'o gude unu kfụru l'ẹka-a ele akpamigwe nno? Jisọsu-a, a natarụ unu kuba l'imigwe, bẹ bụkwawho g'unu l'ele iya, ọ bahụ l'imigwe bụ gẹ l'oo-gude bya ọdo.”

Onye e gude dochia ẹnya Júdasu

12Tọ dụ iya bu, whẹ shi l'ugvu ono, l'eeku ugvu Ólivu lashia Jerúsalẹmu. Ugvu ono m'e -shi lẹ Jerúsalẹmu eje iya, kafụ-zhiawho mkpirikpi manyịru. 13Whẹ rwulewho Jerúsalẹmu, whẹ bahụ l'ụlo-eli. Whẹ shi lẹ nke alị iya bahụ lẹ nke imeli iya, bụkwanu ẹka whẹ l'akụje orwu. Ndu ono bẹ ẹwha whẹ bụ: Pyita, mẹe Jọnu, mẹe Jémusu, mẹe Áduru, mẹe Fílipu, mẹe Tọ́mosu, mẹe Batólomiyu, mẹe Mátiyu, mẹe Jémusu nwa Álufiyọsu, mẹe Sáyịmonu, bụ onye l'adzọ t'alị ndu Ju bụru nke ndu Ju, mẹe Júdasu nwa Jémusu. 14Whẹ l'ụnwanyi tụkokwaruwho nọdu l'ẹka ono, mẹe Méri, bụ ne Jisọsu, mẹe unwune Jisọsu ọbu. Ndu ono gẹ whẹ ha bẹ jeru je atụko nọdu l'ẹka lanụ, gude obu lanụ ekfu anụ Chileke.

15O rwua ujiku lanụ, whẹ dzukowaa nno, mbọku ono bẹ whẹ rwukwaru ụkporo madzụ ugbo ishii l'ẹka ono. Ọo ya bụ, Pyita gbalihu l'echilabọ ụnwunna ono sụ: 16“Ụnwunna mu, iwhe ono, e dehawaru l'ẹkwo Okfu Chileke sụ l'oomefutaje bẹ vụkotakwaaru, bụ iya bụ iwhe ono, Ume-Dụ-Nsọ shihawaa l'ọnu Dévidi kfua l'okfu ẹhu Júdasu ono, bụ iya bụ onye ono du ndu bya bya egude Jisọsu. 17Júdasu ono b'e shi gụru yeru anyi, o shi tsoru eje ozhi-a anyi l'eje ọwa.”

18Ọle o gude okpoga, a kfụru iya l'ejo iwhe o meru zụa alị. E megee, ọ daa sụ-gbua onwiya, ẹwho gbafuhu iya, akịri-ẹwho iya g'ọ ha kposhia. 19Iwhe bụ ndu Jerúsalẹmu gẹ whẹ hakọta nụkota iwhe ono, meru nụ. Whẹ gụbe nwẹgu ono Akeludáma l'okfu ibe whẹ, bụ iya bụ Alị-mmee.

20Pyita bya asụ: “O noo l'e deru l'ẹkwo Egvu-ọma sụ:

“ ‘T'ẹgbara kfụa l'ibe iya, tọ bọ

dụkwa onye l'e-bu iya nu.’

E dekwaawho sụ:

“ ‘T'onye ọdo nochikwaa ẹnya iya jeje ozhi, o shi eje.’

21Ọo ya bụ l'ọ dụ mkpa l'anyi l'a-họta onye lanụ t'o tsoru anyi. T'onye ọbu bụkwaru onye lanụ l'ime ndu ono, tsohawaa anyi jekota iwhe bụ ẹka anyi lẹ Onye-Nwe-Ọha, bụ Jisọsu jegbaberu, 22watarọ nteke Jọnu l'eme baputizimu jeye mbọku, a natarụ Onye-Nwe-Ọha ono kuba l'imigwe. Onye ọbu tsofutaje anyi agba ẹka-ebe lẹ Onye-Nwe-Ọha ono bẹ shi l'ọnwu teta nọdu ndzụ.”

23Tọ dụ iya bụ, whẹ bya ahọfuta ụmadzu labọ; Jósẹfu, onye l'eekuje Basábasu, ẹwha etushi iya bụ Jọ́sutusu; họtakwawho onye ọdo, ẹwha iya bụ Matáyasu. 24Whẹ bya ekfuru nụ Chileke sụ: “Gụbe Onye-Nwe-Ọha, gụbe onye marụ obu madzụ lile, goshi anyi onye ọwhu ị họtaru l'ime ụmadzu labọ-ọ, 25t'o nochia ẹnya Júdasu, bụru onye-ishi-ozhi, meje iwhe ono, Júdasu ono kwasweru ẹnya haa, lashia ẹka gbarụ iya nụ.” 26Whẹ bya atụaru whẹ ido, ọ dabarụ Matáyasu. E wota iya yekobe lẹ ndụ-ishi-ozhi iri lẹ nnanụ ono.

Currently Selected:

Ozhi ndu ishi-ozhi 1: Ezaa

Highlight

Copy