Ozhi ndu ishi-ozhi 2

Abyabya Ume-Dụ-Nsọ

1Ọ bya ebe lẹ mbọku l'eeri oge Péntikọsutu gẹdegede, whẹ tụko gẹ whẹ ha dzukobe l'ẹka lanụ. 2E jia ekfu, ẹwhu shi l'imigwe whụru bya, aada g'ọo ẹwhu oke whẹrewhere bya ejilewho ụlo ono, whẹ dọru eji. 3Whẹ whụa iwhe dụ-gee g'ọo ọku, l'enwu enwu, jakashịhuru ajakashịhu g'o kekashiru onwiya bya anọdu-gee whẹ l'ishi l'ẹhu l'ẹhu. 4Ume-Dụ-Nsọ ji whẹ ẹhu gẹ whẹ ha. Whẹ ghaa okfu-alị whẹ, gudekaa okfu-alị ọdo, dụ l'iche l'iche kfulahaa okfu lẹge Ume-Dụ-Nsọ ono meru tẹ whẹ kfuje.

5Tọ dụ iya bụ, o nweru ndu Ju, bu lẹ Jerúsalẹmu, mbụ ndu Ju, Chileke dụru lẹ nsọ, shigee l'alị, dụ lẹ mgboko mgburumgburu. 6O be nteke whẹ nụru ẹwhu ono, igweligwe madzụ gbakọ-dzua. Ọ tụfu whẹ ẹhu, o noo l'onyenọnu bẹ l'anụkaa gẹ l'eekfu okfu-alị iya. 7Ọ kpụbe whẹ ọnu okfu, tẹmenu o jikwa whẹ who ẹnya. Whẹ jịlahaa ibe whẹ ajị sụ: “Ndu-a, l'ekfu okfu-a, ?whẹ ta abụnua ndu Gálili? 8?Ndẹkwanu g'o gude anyi l'anụkaa whẹ okfu-alị anyi l'ọnu ẹhu l'ẹhu? 9Mbụ okfu anyịbe ndu Pátiya, mẹe ndu Mídiya, mẹe ndu Ílamu, mẹe ndu shi Mesopotémiya, mẹe ndu shi Judíya, mẹe ndu shi Kapadósiya, mẹe ndu shi Pọ́ntosu, mẹe ndu shi Éshiya, 10mẹe-gezhia anyịbe ndu shi Firíjiya, mẹe Pamfíliya, mẹe anyịbe ndu shigee Íjiputu, mẹe ndu shi Sayiríni l'alị Libyiya, bya eyeru ndu ọwhu byarụ abyabya, shi lẹ Romu, 11mẹe ndu Ju, mẹe ndu l'anwụ ẹka ndu Ju; ndu Kirítu, mẹe ndu Arabụ, anyi tụkoru anụkaa gẹ whẹ gude okfu-alị anyi ekfukaa nke eze iwhe Chileke l'emekaa.” 12Ọ kpụbe whẹ ọnu okfu, tẹmenu ọ gbachia whẹ ẹnya. Whẹ nọduwaro ajịje ibe whẹ sụ: “?Ẹgube iya ọwa-a bụkwa ole?” 13O nweru ndu ọwhu l'agbacharụ whẹ mgbacha asụje l'ọo mmẹe guderu whẹ.

Pyita l'asa okfu

14Ọo ya bụ, Pyita gbalihu yẹle ndụ-ishi-ozhi iri lẹ nnanụ ọwhu bya akfụru. Pyita wata iya aryarya sụ: “Unubẹ ndu Judíya mẹe ndu lile, bu lẹ Jerúsalẹmu g'unu ha, unu gebekwa-o! Unu ngabẹ nchị l'iwhe-e, mu l'abya ekfukfu-a. 15Ndu-a ta angụkwa mmẹe, bụ iya bụ iwhe unu l'arị. Ọ kabẹkwa bụru ẹnyanwu l'awata ẹgube-ẹ ntaa. 16Iwhe ọwa gbekwa bụru iwhe ono, o kfuru mbụ Jowelu, bụ onye nkfuchiru Chileke lẹ nteke ndụ-ichee sụ:

17“Ọ waa bụ iwhe Chileke l'ekfu:

‘O -rwulewho l'oge ikpazụ

bẹ mu l'a-wụ-kputa madzụ lile Ume mu.

Ọo ya bụ, ụnwu unu unwoke

mẹe ndu nke ụnwanyi ekfuchilahaaru Chileke.

Unwokorọbya unu a-whụlahaa awhụ.

Ndu bụ ọgurenya unu arọde nrọ.

18Ee! Nteke ono bẹ mu l'a-wụ-kputagee Ume mu ono

wụ-kputa iya l'unwoke mẹe ụnwanyi, l'ejeru mu ozhi.

Whẹbedua ekfuchilahaaru Chileke.

19Mu l'eme iwhe-awhụrulenya l'akpamigwe, dụ l'imeli,

mu emee iwhe jiru ẹnya lẹ mgboko, dụ iya lẹ mkpula.

Aa-whụ mmee mẹe ọku mẹe urwukpu ẹnwuru-ọku.

20Ẹnyanwu l'a-gbakọta tsụrikiti,

ọnwa ekelahaa g'ọo mmee,

Tẹmenu mbọku, Onye-Nwe-Ọha l'a-bya erwua,

bụ iya bụ oke ụboku ono, l'a-dụ biribiri.

21Iwhe bụ-zhia onye ryakuru

Onye-Nwe-Ọha nteke ono bẹ l'aa-dzọfuta.’

22“Sụa, unwoke Ízurẹlu, ọ kwa Jisọsu, onye Názaretu, bụ nwoke ono Chileke shi l'iwhe-awhụrulenya mẹe iwhe jiru ẹnya, dụ-gee biribiri, o gude iya meshia l'echilabọ unu, mee t'o doo unu ẹnya: l'ọo yẹbe Chileke zhiru iya. Iwhe lile ono bẹ unu makọtaru ree l'onwunu. 23Ọle a kpụru iya nụ unu, unu shi l'ẹka ọ-karia-ẹka whẹ kpọpyabe iya l'oswebe, gbua ya. Iwhe ono bụru iwhe Chileke makọtahawaru, chịhawa iya achị dobe edobe. 24Ọle Chileke bẹ tọfuwaru iya l'ẹgbu ono, ọnwu shi kee ya mee ya, o shi l'ọnwu teta nọdu ndzụ, o noo nkele ọnwu ta adụdu ike sedekota iya. 25Lẹ Dévidi bẹ kfukwaru okfu ẹhu Jisọsu sụ:

“ ‘Mu l'awhụ-jezhiawho

Onye-nwe mụbe Dévidi nteke nteke.

Nteke nteke bẹ l'ọonoje mu l'ẹka-ụtara,

t'ọ bọ dụ iwhe l'e-me mu nụ.

26O noo iwhe meru g'o gude obu l'atsọ mu ụtso,

ẹhu-ụtso iya mee, mu l'agụ egvu, aaswa ẹswa.

Mu marụ lẹ mu nwụhu-gee bẹ l'ii-dobe mu-a ndzụ ọdo.

27Lẹ mu makwarụ l'ị tịi hadụ mu l'alị-maa.

Ị tịi hadụ Onye nke ghu, dụ nsọ t'o rehu erehu.

28I goshiwaru mu ụzo ndzụ.

Ii-me t'ẹhu tsọo mu ụtso,

nteke mu nọ l'atatiwhu ghu.’

29“Sụa, ụnwunna mu, mu l'e-kfujaleruwho unu okfu ẹhu nnajị oche anyi, bụ Dévidi ekfuja. Ọ tọ bụledua l'ọ nwụhuru anwụhu kpụ, obenu l'e liru iya eli, e bebenu ilu iya dụkwaa; anyi l'ele iya byeye oge, dụ g'ọo ntanụ-a. 30Ọle o shi bụru onye nkfuchiru Chileke; ọ marụ lẹ Chileke bẹ kweru iya ụkwa iwhe, riaru iyẹ ya nte, sụ iya l'ọo eri yẹbe Dévidi ono bẹ ya l'e-shi họta onye l'a-bụ eze, nochia ẹnya iya. 31Ọ whụru iwhe Chileke l'ee-bekoo mee. O kfua iwhe l'egoshi lẹ Kuráyisutu l'e-shi l'ọnwu teta nọdu ndzụ bụ iya bụ nteke ono, ọ sụru:

“ ‘Ọ tọo hadụ mu l'alị-maa,

tẹmenu anụ-ẹhu mu ta abya l'e-rehu erehu.

32Chileke mewaru Jisọsu ono, o shi l'ọnwu teta nọdu ndzụ bụ iya bụ ọwa, anyi gude ẹnya anyi whụa. 33Ọo ya bụ lẹ Chileke bẹ woliru iya eli dobe l'ẹka-ụtara iya. Ọ nataakwarụ Ume-Dụ-Nsọ l'ẹka Nna, bụ iwhe-ọma, Chileke kweru ụkwa iya. Iwhe-e, unu whụru-a mẹe iwhe-e unu l'anụ-a bụkwa iwhe-ọma ono, bụ iya bụ Ume-Dụ-Nsọ ono, ọ wụ-kputaru anyi. 34L'ọ tọ bụkwa Dévidi bẹ larụ l'imigwe l'onwiya, o noo lẹ yẹbedua l'onwiya kfukwaru sụ:

“ ‘Onye-Nwe-Ọha sụru Onye-nwe mụbe Dévidi:

“Nọdu anọdu l'ẹka-ụtara mu

35jeye nteke mu l'e-me ndu ọhogu ghu,

whẹ abụru ghu iwhe l'ịi-dzọpyabe l'ọkpa.” ’

36“Ọo ya bụ, t'o doo Ízurẹlu lile ẹnya ree, lẹ Chileke bẹ mewaru Jisọsu ono, unu kpọpyaberu l'oswebe, t'ọ bụru Onye-Nwe-Ọha, bụru Kuráyisutu, bụ Onye-Ndzọta.”

37O noo ya, whẹ nụ-gele iya who, meji tọfu whẹ, whẹ sụ Pyita mẹe ndụ-ishi-ozhi ndu ọwhuna: “Ụnwunna anyi, ?ọo gụnu bẹ anyi l'e-me?”

38Pyita sụ whẹ: “T'unu daa onwunu ụta, haa iwhe-dụ-ẹji, unu l'emegbabe, lwakfuta Chileke, t'e gude ẹwha Jisọsu, bụ Kuráyisutu mee unu baputizimu g'unu hakọta l'ẹhu l'ẹhu, nggẹ Chileke agụaru unu nvụ l'iwhe-dụ-ẹji ono; unu anata iwhe ọma-a, bụ iya bụ Ume-Dụ-Nsọ. 39L'iwhe ono bẹ Chileke kwekwaru ụkwa, lẹ ya l'e-meru iya unu, meeru iya ụnwu unu, meeru iya iwhe bụ-zhia ndu nọdukwadu otẹnya mẹe iwhe bụ onye Onye-Nwe-Ọha, bụ Chileke anyi l'e-ku.”

40Pyita kfugee nno, o kfukwaaru whẹ whọ igweligwe okfu ọdo, nmashịaru whẹ ọkwa ike sụ whẹ: “Unu dzọdu-a onwunu l'ọgbo-ọ, l'a-la l'iyi-a.” 41Ọo ya bụ, a dụ l'igweligwe nata ozhi iya, e mee whẹ baputizimu. Mbọku ono bẹ iwhe rwuru ụnu madzụ ugbo ẹsaa l'ụmadzu ụkporo ugbo iri byakwarụ etsoru lẹ ndu kwetaru nụ.

Gẹ ndu chọchi mbụ shi emeje

42Iwhe whẹ yeleruwho ẹhu l'ememe bụru anọ abyajezhiawho ọnuta iwhe ndụ-ishi-ozhi ono l'ezhi whẹ, whẹ l'atụkoje nọkobe g'ọo unwune gba mgba eri Nri Onye-Nwe-Ọha mẹe anọ ekfu anụ Chileke. 43Onyenọnu tsụlahaa egvu. Ndụ-ishi ozhi ono l'emeshilewho iwhe-awhụrulenya mẹe iwhe jiru ẹnya, dụ-gee biribiri l'igweligwe. 44Iwhe bụ-zhia ndu lile, woru ndzụ whẹ ye Kuráyisutu l'ẹka gẹ whẹ ha, tụko iwhe lile, whẹ nweru nmagbabẹ, nweru iya l'ọha. 45Whẹ tụko ẹku whẹ g'ọ ha reshikota mẹe iwhe lile ọdo, whẹ nwe enwe. Whẹ tụko kekashia ya. E ketageeru onyenọnu lẹge mkpa habe iya l'ẹhu. 46Mbọku-mbọku, whẹ atụko nmagba je anọdu l'eze-ụlo Chileke. Whẹ l'atukọje yeko ẹka eri Nri Onye-Nwe-Ọha l'uwhu l'uwhu, whẹ l'egudeje ẹhu-ụtso mẹe obu-iwhoro eri iwhe bụ iwhe whẹ l'eri eri. 47Whẹ l'anọje ekelekwawho Chileke. Iwhe whẹ l'eme bụru iwhe dụ ndiwhe mma l'obu. Onye-Nwe-Ọha l'eyekwaru whẹ ndu, ọ dzọtaru nke ọwhuu mbọku-mbọku.

Currently Selected:

Ozhi ndu ishi-ozhi 2: Ezaa

Highlight

Copy