Jọnu 18

Eegude Jisọsu

(Mát. 26:47-56; Mak. 14:43-50; Luk. 22:47-53)

1Jisọsu kfugelewho okfu ono yẹle ndu l'etso ụzo iya lịru tụgburu je adafụ azụ ọnu-iyi Kidirọnu. O nweruwho mgbabu, dụ l'azụ mini ono azụ iya ọwhu. Jisọsu yẹle ndu ono, l'etso ụzo iya bahụ lẹ mgbabu ono. 2Júdasu bụ iya bụ onye ọbu, l'agbarụ iya ye makwarụwho ẹka ono nkele Jisọsu bẹ yẹle ndu l'etso ụzo iya l'edzukojehawaa l'ẹka ono nteke nteke.

3Ọo ya bụ lẹ Júdasu abyatashia ẹka ono. Ndu ishi ndu l'agbajẹ ẹja nụ Chileke mẹe ndu Fárisii, yeru iya ndu ojọgu ndu Romu, yekwaru iya whọ ndu nche eze-ụlo Chileke b'o dutaru whẹ jeshia ẹka ono. Nteke whẹ l'abya bẹ whẹ chịgbaa oryọku mẹe ọku ogọwa mẹe ngwọgu. 4Jisọsu dụhawaa mbụ marụ iwhe l'abya iya ememe, ọ gbata whẹ ndzuta bya asụ whẹ: “?Ọo onye bẹ unu l'achọ?”

5Whẹ sụ iya: “Ọo Jisọsu, onye Názaretu.”

Jisọsu sụ whẹ: “Ọo mbẹdua bụ iya.”

Júdasu, bu iya bụ onye ọbu, dụ l'idzu tẹ whẹ gude iya; kfụkubekwa whẹ whọ l'ẹka ono. 6Nteke ono Jisọsu sụru whẹ: “Ọo mbẹdua bụ iya.” Ndu ono byarụ iya egude kpọo galagala laa l'azụ l'azụ je adashịa l'alị gbii gbii. 7Jisọsu jịkwa whẹ ọdo sụ whẹ: “?Ọo onye bẹ unu l'achọ?”

Whẹ sụ iya: “Ọo Jisọsu, onye Názaretu.”

8Jisọsu sụ whẹ: “Mu sụru unu l'ọo mbẹdua bụ iya. Ọ -bụru l'ọo mbẹdua bẹ unu l'achọ, ọo ya bụ tẹ ndu ọwa tụgbunua lashia.” 9Iwhe ono bụ-gezhia nggẹ okfu ono, shi iya l'ọnu avụkota, o kfuru sụ: “Nna, ọ tọ dụkwa m'ọo onye lanụ, whuhuru ewhuhu lẹ ndu lile ono, i yeru mu l'ẹka.”

10Ọo ya bụ, Sáyịmonu Pyita turuwho nkogo iya. Ọ mịta nkogo ono gbu nwohuta onye ishi ndu l'agbajẹ ẹja nụ Chileke; ọ bụru l'ụzo-nchị b'o gburu iya mma ono; tụkole iya whọ nchị ẹka-ụtara pafụ. Ẹwha nwohuta ono bụ Málukọsu. 11Jisọsu sụ Pyita: “Mịru nkogo ghu ye l'ọbo iya. ?Mu ta akabẹ-zhihedua ngụkota-gee iwhe l'angụ angụ, dụ l'omogo iwhe-ọtsulanu, Nna mu nụru mu?”

A kpụ Jisọsu akpukfu Ánasu

12Ọo ya bụ, ndu ojọgu ono mẹe onye ishi whẹ mẹe ndu nche ndu Ju, bya egude Jisọsu kee ya ẹgbu. 13Whẹ vuru ụzo kpụta iya kpukfu Ánasu. Ánasu bụ nnajị, keru Káyafasu nwa iya nwanyị. Ọ bụkwanuru Káyafasu l'onwiya bụ eze onye ishi ndu l'agbajẹ ẹja nụ Chileke nke awha ono. 14Ọ bụkwaruwho Káyafasu ono bụ onye ono, chịshijeru ndu Ju idzu sụ l'ọ kachia mma t'onye lanụ nwụhu-chiaru ọha.

Pyita l'agọ l'iya ta amadụ onye Jisọsu bụ

(Mát. 26:69-70; Mak. 14:66-68; Luk. 22:55-57)

15Sáyịmonu Pyita l'etsokwawho Jisọsu l'azụ l'azụ, onye lanụ ọdo l'ime ndu l'etso ụzo Jisọsu l'etsokwa iya who. Onye lanụ onona bẹ yẹle eze onye ishi ndu ono, l'agbajẹ ẹja nụ Chileke matahawarụ. Ọo ya bụ, o tsoru Jisọsu bahụ l'ọma ogboduwhu ibe eze onye ishi ndu l'agbajẹ ẹja nụ Chileke ono. 16Ọwhube Pyita kfụruroo l'etezhi l'ọnu-ọguzo. Ọo ya bụ, onye ọwhua l'etso ụzo Jisọsu, tso iya bahụ ụlo-ikpe whọ bụ iya bụ onye ọwhu eze onye ishi ono marwetaru, fụta bya eje ekfuru yeru nwata nwamgbọko, bụ iya l'eche ọnoguzo ono. Nwata nwamgbọko ono haa ya, o dubata Pyita. 17Nwamgbọko ono, l'eche ọnoguzo ono sụ Pyita: “?Ọ dụ g'ị lịnu-a lẹ ndu l'etsoje nwoke-e, e guderu-a?”

Pyita sụ: “Tụswekwa, ọ tọ bụkwa mu.”

18Nteke ono bẹ oyi l'atsụ, ọo ya bụ, ndu l'eezhije ozhi mẹe ndu nche dụhawaa mbụ kpọbe ọku icheku kfụ-whe iya mgburumgburu anya. Pyita bya akfụkubekwa whẹ whọ, anyagba ẹhu nkiya.

Ánasu l'ajị Jisọsu ajị

(Mát. 26:59-66; Mak. 14:55-64; Luk. 22:66-71)

19Ọo ya bụ, eze onye ishi ndu l'agbajẹ ẹja nụ Chileke ono bya ajịlahaa Jisọsu ajị nke ndu l'etso ụzo iya mẹe nke iwhe l'ọonoje ezhi. 20Jisọsu sụ iya: “Mu tụkowaru iwhe lile tụjashiaru ndu mgboko, mu l'anọjelewho ezhi whẹ iwhe l'ụlo-ndzuko ndu Ju mẹe l'eze-ụlo Chileke, bụ ẹka ndu Ju l'edzukobeje. Ọ tọ dụkwa iwhe mu kfuru dụ ọwhu mu kfuru l'edomi. 21?I kwoberu gụnu ajị mu ẹgube ajị ono? Jị ndu nụru iwhe mu kfuru, lẹ whẹ marụa iwhe mu kfuru.”

22Nteke Jisọsu kfuleruwho nno, onye lanụ l'ime ndu nche ono, kfụkube Jisọsu ọbu bya agbakpọo ẹka byia ye ya l'ishi-nchị sụ: “?I marụ l'ọo eze onye ishi ndu l'agbajẹ ẹja nụ Chileke bẹ l'iituburu okfu nno?”

23Jisọsu sụ iya: “Ọ -bụru l'ọ dụ iwhe-dụ-ẹji, mu kfuru, kfuru edzudzu ọha-a iwhe-dụ-ẹji ọbu, mu kfuru; tẹ whẹ nụ. Nteke bụ l'ọ waa iwhe kfụru nhamụnha bẹ mu kfuru ?ndẹe iwhe i kwoberu echi mu ẹka?”

24Tọ dụ iya bụ, Jisọsu nọdukwaa l'ẹgbu ono, e keru iya, Ánasu zhi a kpụta iya kpụ-jeshiaru Káyafasu bụ iya bụ eze onye ishi ndu l'agbajẹ ẹja nụ Chileke.

Pyita l'agọkwawho ọdo l'iya ta amadụ Jisọsu

(Mát. 26:71-75; Mak. 14:69-72; Luk. 22:58-62)

25Sáyịmonu Pyita kfụkwaduru-a l'ẹka ono, ọ kfụru anyagba ẹhu. A nọnyaa, whẹ sụ iya: “?T'ị lịnua lẹ ndu ono, l'etsoje onye ono?”

Pyita sụ whẹ: “Tụswekwa, ọ tọ bụkwa mu.” 26Onye lanụ lẹ ndu l'ejeru eze onye ishi ndu l'agbajẹ ẹja nụ Chileke ono ozhi, bụ abụbu nwoke who Pyita ghebufuru nchị, tụfulewho ọnu jị Pyita sụ iya: “?Mu ta awhụdu ghu-a gẹ gụ l'iya nọ l'ime mgbabu who?”

27Pyita gọfukwa ọdo, okọku ryalẹkwawho ọrya nteke onowho.

Jisọsu nọ l'iwhu Páyileti

(Mát. 27:1-2,11-14; Mak. 15:1-5; Luk. 23:1-5)

28Tọ dụ iya bụ lẹ whẹ akpụfuta Jisọsu l'ibe Káyafasu, kpụru jeshia l'eze-ụlo ikpe ọ-chị-ọha Romu, l'achịnu. Nteke ono bụwaru ishi ẹnyangge. Ọle whẹbe ndu Ju ta abahụkwa l'eze-ụlo ono nggẹ whẹ ta atụru nsọ nke ọwhu whẹ l'etso ria oge O-je-ghata ono. 29Ọo ya bụ, Páyileti bya ejekfu whẹ l'etezhi je asụ whẹ: “?Ọo ẹgube iwhe-dụ-ẹji gụnu bẹ unu sụru lẹ nwoke-e meru?”

30Whẹ sụ iya: “Nggẹ l'ọo iwhe lẹ nwoke-e l'abụa onye l'eme ẹjo iwhe mẹ whẹ ta akpụtakwaru ghu iya.”

31Páyileti sụ whẹ: “Unubẹdua l'onwunu kpụta iya je egude ekemu-alị unu kpee ya ikpe.”

Ndu Ju sụ iya: “A tụkwaru iya anyi l'iwu sụ t'anyi ba akfugbujekwa madzụ.” 32Iwhe ono bụ-gezhia nke ọwhu iwhe ono, Jisọsu kfuru l'a-vụkota, bụ iwhe o kfuru gude tụa ọnu ẹgube anwụhu, ya l'a-nwụhu.

33Páyileti bya abahụ-whu azụ ọdo l'eze-ụlo ono bya ekua Jisọsu sụ iya: “?Ọo gụbedua bụ Eze ndu Ju?”

34Jisọsu jị iya: “?Ọo gụbedua nyịtaru ọnyi ẹhu ghu ekfu iya, t'ọo ndu ọdo sụru ghu l'o noo iwhe mu kfuru?”

35Páyileti sụ iya: “?Mu bụ onye Ju? M'ọ kwarọo ndu alị ghu mẹe ndu ishi ndu l'agbajẹ ẹja nụ Chileke kpụ ghu kpụtaru mu. ?Ọo gụnu b'i meru?”

36Jisọsu sụ iya: “Abụbu ono, mu bụ eze te eshikwa lẹ mgboko-o, ọ -bụ l'abụbu, mu bụ eze shi lẹ mgboko-o mẹ ndu ozhi mu ekwe ọgu mẹ tẹge akpụru mu nụ ndu Ju. Obenu l'abụbu, mu bụ eze te eshidu lẹ mgboko-o.”

37Páyileti sụ iya: “Ha! ?Ọo ya bụ l'ị bụ eze?” Jisọsu sụ: “Mu bụkwa eze. Ọ kwawhọ gụbedua bẹ gudewaa ọnu ghu kfua ya. Ọo tẹ mu bụru eze b'e kwoberu nwụa mu, ọ kwarụwho iwhe ono bẹ mu kwoberu bya mgboko-o tẹ mu bya egoshi ndiwhe iwhe ọkpobe-okfu bụ. Iwhe bụ ndu l'etso ọkpobe-okfu ono l'anụje olu mu.”

38Páyileti jị sụ iya: “?Ọo ẹgube iwhe gụnu bụ ọkpobe-okfu?”

E kperu Jisọsu nkfugbu

(Mát. 27:15-31; Mak. 15:6-20; Luk. 23:13-25)

Ọo ya bụ, Páyileti jị-gele iya who ajị ono, ọ bya alụfu jekfuwhu ndu Ju ono azụ ọdo je asụ whẹ: “Ọ tọ dụkwa ejo-iwhe mu whụru nwoke-e meru. 39Ọle eshi-ọwhu omelalị unu bụ tẹ mu hajẹeru unu onye mkpọro lanụ t'ọ la m'e ridelewho oge O-je-ghata ?ọ dụ ree mẹ mu haarụ unu Eze ndu Ju ọbu?”

40Whẹ swọkporohu sụ: “Ọ tọ bụdu onye ọwa bẹ l'ịi-harụ anyi-o, hachiaru anyi Barábasu t'ọ la!” Barábasu ọbu, whẹ sụru t'a haarụ whẹ bẹ bụkwa onye l'ana nfụ.

Currently Selected:

Jọnu 18: Ezaa

Highlight

Copy