Jọnu 17

Jisọsu l'ekfu anụ Chileke

1Jisọsu kfugelewho iwhe ono, ọ palia ẹnya imeli ele igweli sụ: “Nna, m'ọ gbabeekwaru; menu-a tẹ ndiwhe whụa ọdu-biribiri nke Nwa ghu nke ọwhu Nwa ono l'e-mekwawho tẹ ndiwhe whụa ọdu-biribiri nke ghu. 2O noo l'ọo ghu nụru iya ike, ọ kakọta madzụ lile ẹkuku. Iwhe i kwoberu mee ya nno bụ nke ọwhu l'ọo-nụje ndu ono, i yeru iya l'ẹka ndzụ tututu-mịmimi. 3Ndzụ tututu-mịmimi ono bụru tẹ whẹ marụ ghu, gụbe onye ono, bụ ghu bụ ọkpobe Chileke ono kpụ, whẹ amakwarụwho Jisọsu Kuráyisutu, bụ onye ọ bụ ghu zhiru t'ọ bya. 4Mu nọdukwa l'eli-mgboko-o goshi ndiwhe ọdu-biribiri nke ghu, eshi-ọwhu mu tụkoru iwhe lile ono, i zhiru mu tẹ mu bya emee mekota. 5Nna, menua ntaa tẹ mu nọdu l'ọdu-biribiri ono, mu shihawa nọdu l'atatiwhu ghu; mbụ ọdu-biribiri ono, mu shihawaa nọduta tẹmenu mgboko dụde.

6“Mu meekwaru ndu ono, ị họtaru lẹ mgboko-o ye mu l'ẹka ono, whẹ marụ ghu. Ọo gụbedua nwehawa whẹ, ọ bụru gụbedua woru whẹ ye mu l'ẹka, whẹ mekotawaa okfu ghu. 7Ntaa bẹ whẹ mawarụ l'iwhe lile, ị nụru mu bẹ shi ghu l'ẹka. 8O noo lẹ mu zhiwaru whẹ ozhi ono, i zhiru mu, whẹ natawa iya. Whẹ makwarụwho l'ọo ọkpobe-okfu, mbụ l'ọo ẹka, ị nọ bẹ mu shi bya, whẹ kwetaakwa l'ọo ghu zhiru mu tẹ mu bya.

9“Mu l'ekfu anụ ghu l'iswi ẹhu whẹ. Ọ tọ kwa ndu mgboko bẹ mu l'ekfuru ghu okfu ẹhu whẹ. Ọ kwa ndu ono, i yeru mu l'ẹka bẹ mu l'ekfu nke whẹ, o noo lẹ whẹ bụ nke ghu. 10Iwhe lile bụ nke mbẹdua bụkwawho iwhe ghu, iwhe lile ọwhu bụ nke ghu bụkwaruwho nke mbẹdua. Ọ bụru whẹ l'egoshi ọdu-biribiri nke gụbe Chileke. 11Lee lẹ ntaa bẹ mu l'alwakfutawa ghu. Mu ta anọhekwa lẹ mgboko-o, ọle whẹbedua nọdukwadu-a lẹ mgboko. Nna, dụ Nsọ, gudenu ike ono, dụ l'ẹwha ghu kwachia whẹ, mbụ ẹwha ghu ono, ị nụru mu ono nke ọwhu whẹ l'a-bụ nnanụ gẹ mu lẹ ghu bụ nnanụ. 12Nteke ono, mu shi nọdu swiru whẹ ono bụkwa ike ono, dụ l'ẹwha ghu ono, ị nụru mu bẹ mu shi gude kwachia whẹ. Akwachi ono bụ lẹ mu cheekwaru whẹ tọ dụ m'ọo onye lanụ, whuhuru ewhuhu, t'a gụfulewho onye ono, ọ gbarụ t'o tuwhahu. Iwhe meru iya bụkwaru nggẹ iwhe e deru l'ẹkwo Okfu Chileke emee g'e kfuru iya. 13Ọle ntaa bẹ mu l'alwakfutawa ghu. Iwhe lile bẹ mu tụkoru ekfushikaaru ghu ntaa, mu nọkwadu lẹ mgboko-o nke ọwhu whẹ l'e-nweru ẹhu-ụtso nkemu, ya edzua whẹ oke l'ẹhu. 14Mu kfuwaru whẹ okfu, shi ghu l'ọnu; ndu mgboko kpọwaa whẹ ashị, nke l'ọo lẹ whẹ ta abụdu ndu nke mgboko-o, lẹge mbẹdua l'abụa onye nke mgboko-o. 15Mu te ekfukwaru ghu t'i wofu whẹ lẹ mgboko, gbahaa t'ị kwachia whẹ t'ọ bọ dụ iwhe Onye-Ejo-Ụboku ono, bụ Oshifutuswe l'e-me whẹ. 16Ọo gẹ mu l'ẹte abụa onye nke mgboko-o bụ gẹ whẹ l'abụa ndu nke mgboko-o. 17Okfu nke ghu bụ ọkpobe-okfu. Gudenu ọkpobe-okfu ghu ono mee whẹ tẹ whẹ bụru ụnwu ghu. 18Ọ kwawhọ lẹ g'i zhiru mu tẹ mu bya lẹ mgboko, bụ gẹ mu l'ezhi whẹ tẹ whẹ je lẹ mgboko. 19Ọ bụkwaruwho okfu ẹhu whẹ be mu kwoberu wota onwomu gbaa ẹja ẹhu whẹ nke ọwhu whẹbedua l'a-bụ nke ghu ọkpobe abụbu.

20“Ọ tọ bụlekwaa ndu ọwa kpụ bẹ mu l'ekfu anụ ghu l'okfu ẹhu whẹ; mu l'ekfukwawho anụ ghu l'okfu ẹhu iwhe bụ ndu lile l'a-nụ ozhi-ọma, whẹ l'e-zhi kweta nke mbẹdua. 21Mu l'ekfukwawho anụ ghu t'i mee tẹ whẹ bụru nnanụ gẹ whẹ ha. T'ọ bụleruwho lẹge gụbedua, bụ Nna nọ mu l'ime, mu nọdu ghu l'ime bụ lẹge whẹ l'a-nọdu anyi l'ime, tẹ whẹ bụru nnanụ nke ọwhu ndu mgboko-o l'e-kweta l'ọo ghu zhiru mu tẹ mu bya. 22Ọdu-biribiri ono, ị nụru mu bẹ mu wookwaru ye whẹ l'ẹka nke ọwhu whẹ l'a-bụ nnanụ lẹge mu lẹ ghu bụ nnanụ. 23Mu nọdu whẹ l'ime, gụbedua anọdu mbẹdua l'ime nke ọwhu whẹ l'a-bụ nnanụ ọkpobe abụbu nggẹ ndu mgboko amakwanụru l'ọo ghu zhiru mu, makwarụwho l'ọo lẹge i yeru mbẹdua obu bụ g'i yeru whẹ iya.

24“Nna, i wowaru whẹ ye mu l'ẹka. Iwhe mu l'ekfu bụru t'ọ bụru l'ẹka mu nọ bẹ ndu ono l'a-nọdukwawho. Ọ kwanụ iya bụ nke ọwhu whẹ l'egude ẹnya whẹ whụ ọdu-biribiri nkemu, mbụ ọdu-biribiri ono, i kwoberu l'i yeru mu obu nụhaada mu rọo tẹmenu mgboko bya adụ. 25Gụbe Nna dụ chịriri, ndiwhe tẹke amakwaa onye ị bụ, ọle mbẹdua makwarụ ghu, tẹhenu ndu-a maakwarụ l'ọo gụbedua zhiru mu tẹ mu bya. 26Mu mewaru whẹ marụ ghu, mu jekwa l'e-me tẹ whẹ marụ ghu reereeree nke ọwhu n-yemobu ono, i yeru mụbe Jisọsu l'a-dụ l'ime whẹ, mbẹdua anọdukwawho l'ime whẹ.”

Currently Selected:

Jọnu 17: Ezaa

Highlight

Copy