Popular Bible Verses from Jọnu 17

Share

Okfu nke ghu bụ ọkpobe-okfu. Gudenu ọkpobe-okfu ghu ono mee whẹ tẹ whẹ bụru ụnwu ghu.

Ndzụ tututu-mịmimi ono bụru tẹ whẹ marụ ghu, gụbe onye ono, bụ ghu bụ ọkpobe Chileke ono kpụ, whẹ amakwarụwho Jisọsu Kuráyisutu, bụ onye ọ bụ ghu zhiru t'ọ bya.

“Ọ tọ bụlekwaa ndu ọwa kpụ bẹ mu l'ekfu anụ ghu l'okfu ẹhu whẹ; mu l'ekfukwawho anụ ghu l'okfu ẹhu iwhe bụ ndu lile l'a-nụ ozhi-ọma, whẹ l'e-zhi kweta nke mbẹdua. Mu l'ekfukwawho anụ ghu t'i mee tẹ whẹ bụru nnanụ gẹ whẹ ha. T'ọ bụleruwho lẹge gụbedua, bụ Nna nọ mu l'ime, mu nọdu ghu l'ime bụ lẹge whẹ l'a-nọdu anyi l'ime, tẹ whẹ bụru nnanụ nke ọwhu ndu mgboko-o l'e-kweta l'ọo ghu zhiru mu tẹ mu bya.

Mu te ekfukwaru ghu t'i wofu whẹ lẹ mgboko, gbahaa t'ị kwachia whẹ t'ọ bọ dụ iwhe Onye-Ejo-Ụboku ono, bụ Oshifutuswe l'e-me whẹ.

Ọdu-biribiri ono, ị nụru mu bẹ mu wookwaru ye whẹ l'ẹka nke ọwhu whẹ l'a-bụ nnanụ lẹge mu lẹ ghu bụ nnanụ. Mu nọdu whẹ l'ime, gụbedua anọdu mbẹdua l'ime nke ọwhu whẹ l'a-bụ nnanụ ọkpobe abụbu nggẹ ndu mgboko amakwanụru l'ọo ghu zhiru mu, makwarụwho l'ọo lẹge i yeru mbẹdua obu bụ g'i yeru whẹ iya.