Popular Bible Verses from Jọnu 16

Share

Mu kfuwaru unu iwhe-e nke ọwhu ẹhu l'a-dụ unu guu mẹ mu l'unu tụgba bụru nnanụ. Ọlewho áwhụ bụ iwhe l'atsụru unu l'ọnu lẹ mgboko-o, ọle t'unu nwekwaru iya obu. Mu meekwaru mgboko eriri, tụru okoo kpua ya!”

Nteke Ume-Dụ-Nsọ ono bụ iya bụ Ume ire-lanụ byalẹruwho, ya atụko-gewaro iwhe bụ ire-lanụ g'ọ ha kpozhikotaru unu ụzo iya, o noo l'ọ tọ dụ ike nke ẹka iya bẹ l'oo-gude ekfu. Ọlewho iwhe ọ nụru lẹ nchị iya bẹ l'oo-kfuje, ya ekfukwaaruwho unu iwhe l'e-me lẹ mgbe l'iwhu.

Mbụ-a, ọ tọko dụbukwaa iwhe unu shije mu l'ẹka sụ t'a nụ unu byeye ntaa. Unu kfujeru Chileke t'ọ nụ unu iwhe mkpa iya dụ unu, ọo-nụ iya unu. Ọ kwanụ iya bụ nke ọwhu ẹhu l'a-tsọ unu ụtso tsọfu iya unu l'ishi.

Ọle g'ọ dụlee, tẹ mu mekwaa ya t'o doo unu ẹnya, o gbechikwaa karụ unu ree tẹ mu laa. Ọ -bụru lẹ mu ta aladụ bẹ Onye-Ọgbata ono l'ẹte alwakfutakwa unu. Ọle ọo nteke mu larwuleruwho; mu ezhi iya t'ọ lwakfuta unu. Nteke ọ byalẹruwho bẹ l'oo-goshi ndiwhe l'ọ tọ bụdu iwhe whẹ l'arị l'ego l'iwhe-dụ-ẹji bụ, b'ọ bụ, goshikwa whẹ whọ l'ọ tọ bụdu iwhe whẹ rịru l'ọo ya bụ ọdu chịriri bẹ bụ iya nụ, goshi whẹ l'ọ tọ dụ iwhe whẹ rịru l'ọo ikpe Chileke bẹ bụ iya nụ. O noo gẹ l'oogude goshi whẹ l'ikpe nmarụ whẹ ndono.

O nokwawho g'ọ dụ l'ẹhu unu ndono. Ntaa bẹ unu l'a-nọ atsụ ude, ọle ujiku lanụ bẹ mu l'unu l'a-whụkwaa ọdo, nteke ono bẹ unu l'a-nwụ ọnu-ọchi. Ọ tọ dụhedu onye l'anafụbaa unu ẹhu-ụtso unu ono nteke ono. “O -rwulewho nteke ono bẹ l'ọo tọ dụheduwaro iwhe unu bya l'ajị mu. Iwhe mu l'eme t'o doo unu ẹnya bụ lẹ-a: iwhe bụ iwhe unu shi mu l'ẹka sụ tẹ Nna nụ unu bẹ l'ọo-nụkota unu.

Iwhe mu l'eme tẹ mu karụ unu bụ l'unu l'arya ẹkwa gụa áwhụ, ọle ọwhube ndiwhe bẹ ẹhu l'a-nọ atsọ ụtso. Unu l'a-nọkwa atsụ ude l'ime obu, ọle ude ono l'e-megekwaa gbanwee, unu anwụa ọnu-ọchi.