Ozhi ndu ishi-ozhi 3

Eeme onye ngvụru t'o mehu

1O be ujiku lanụ, Pyita yẹle Jọnu lịru eje l'eze-ụlo Chileke l'atangụ ẹto nke eswe, bụ nteke l'eekfujeru nụ Chileke. 2O nweru nwoke ọbu, ne iya bya l'anwụ-deshia, ọ dawaa ngvụru; l'aapatajẹ iya mbọku-mbọku bya edobe l'ọnuzo ẹka l'eeshije abahụ l'eze-ụlo Chileke, ibẹka iya ọwhu l'eekuje “Ọnuzo-l'ama-ụma”. Nwoke ono bẹ l'aapatajẹ bya edobe l'ẹka ono, t'ọ nọduje l'ẹka ono aryọta ndu l'abahụ l'eze-ụlo Chileke iwhe. 3Ọ whụlewho Pyita yẹle Jọnu gẹ whẹ l'abata l'ime eze-ụlo Chileke ono, ọ ryọlahaa whẹ iwhe. 4Pyita yẹle Jọnu dazhịbe iya ẹnya. Whẹ lenyaa ya, Pyita sụ iya: “Lee anyi ẹnya!” 5O lelahaa whẹ ẹnya dobenu sụ g'o nweru iwhe whẹ bya l'anụ iya. 6Pyita sụ iya: “Mu te enwekwa okpoga, mu l'a-nụ ghu, ọle iwhe ọwhu mu nweru bẹ mu l'a-nụ ghu: L'ẹwha Jisọsu Kuráyisutu onye Názaretu, gbalihu jee ije!” 7Ọ lọta nwoke ono l'ẹka-ụtara lọ-lia ya imeli. Nteke onowho, ọkpa iya whẹ ẹbo mẹe nkwo ọkpa iya tetachaa ya. 8Ọ kfulihu, kfụru akfụru jelahaa ije. O tsoru whẹ bahụ l'ọma-ogboduwhu eze-ụlo Chileke. L'ọokfu nkfụ, ete ẹswa, ejewhe etu Chileke ẹwha. 9O be nteke madzụ lile whụgbaleru iya whọ gẹ l'oojewhe, etu Chileke ẹwha, 10whẹ hụbekota iya ama l'ọo ya bụ onye-e, shi nọdu lẹ Ọnuzo-l'ama-ụma l'eze-ụlo Chileke aryọ aryọ. Ọ kpụbe whẹ ọnu okfu, tụfu whẹ ẹhu, mbụ iwhe ono, meru l'ẹhu nwoke ono.

Pyita l'asa okfu l'eze-ụlo Chileke

11O be nteke ndiwhe whụru g'ọ kụkuru Pyita yẹle Jọnu onwiya, etso whẹ eshi ẹka whẹ shiru, whẹ gbakọo bya anọdu ele whẹ l'ọnu-ụlo ọwhu, bụ Ọnuzo Sólomọnu. Ọ tụfu whẹ ẹhu. 12Pyita whụlewho ndu ono, ọ sụ whẹ: “Unubẹ ndu Ízurẹlu, ?ọo gụnu meru g'o gude iwhe-e tụfu unu ẹhu? Mbụ ?ọo gụnu meru unu l'ele anyi gẹ-woo l'ọo ike ẹka anyi bẹ anyi gude mee tẹ nwoke-e jee ije? Ọdua l'ọo g'anyi bya abụ-beru ndu l'akwabẹ Chileke ugvu? 13Ọ kwa Chileke nke nna anyi oche whẹ, mbụ Chileke ono, bụ Chileke nke Ébirihamu, bụkwaruwho Chileke nke Áyiziku, bụru Chileke nke Jékọpu, ọ kwa iya gudewaa iwhe-e, meru nụ goshi ọdu-biribiri nke Nwa iya, bụ Jisọsu. Mbụ onye ono, unu kpụru nụ ndu Romu, unu jịkakwa iya whọ l'iwhu Páyileti. Lẹ Páyileti ono chịhawaru l'obu iya lẹ ya bya l'aha iya t'ọ laarụ onwiya. 14Unu jịka Onye ono, dụ nsọ, bụkwawho Onye dụ chịriri, o gbechia bụru onye ono, gburu ọchi bẹ unu sụru t'a haarụ unu t'ọ laarụ onwiya. 15Unu shi nno gbua onye ono, bụ iya l'anụ ndzụ, ọle Chileke bẹ meru, o shi l'ọnwu teta nọdu ndzụ. Iwhe ono bẹ anyi gudekwa ẹnya anyi whụa. 16Nwoke-e, unu l'ele ẹgube-ẹ, ebebenu ọ bụru onye unu marụ-a, bụkwa ike nke Jisọsu ono bẹ meru iya o mehu, o noo l'anyi kweru l'ike dụ l'ẹwha Jisọsu ono. Ọ kwa okweta l'ike nke Jisọsu bẹ meru nwoke-e l'iwhu unu g'unu ha, ẹhu iya dzua ya oke-e.

17“Sụa, ụnwunna mu, mu makwarụ-a l'iwhe ono, unu lẹ ndu ishi unu meru Jisọsu bẹ unu meru iya l'ọma ama. 18Chileke shi l'ẹka ono mee iwhe ọ dụ mbụ kfua l'ọnu ndu nkfuchiru iya gẹ whẹ ha lẹ nteke ndụ-ichee, sụ lẹ Onye Ndzọta ono, o kweru ụkwa iya ono l'e-je iwhe-ọtsulanu. 19Ọo ya bụ, t'unu dakwaawhọ onwunu ụta haa ome iwhe-dụ-ẹji, lwakfuta Chileke. Unu lwawhu azụ, lwakfuta Chileke t'o huchafu iwhe-dụ-ẹji, unu metagbaberu, 20nggẹ ẹhu-ọdu-guu eshikwanu l'ẹka Onye-Nwe-Ọha rwube unu ẹka mẹkwawho nke ọwhu Chileke l'e-zhi Onye Ndzọta ono t'ọ bya, bụ iya bụ onye ọ họfutahawaru unu. Onye ono bụ Jisọsu. 21Ọo-nọdu l'imigwe jeye nteke Chileke l'e-me iwhe lile, ya adụ-whu azụ g'o shihawaa dụ lẹ mbụ, bụ iya bụ iwhe ono, Chileke shi l'ọnu ndu nkfuchiru iya kfuru anyi nteke ndụ-ichee. 22Lẹ Mósisu bẹ kfukwaru sụ: ‘Onye-Nwe-Ọha, bụ Chileke l'e-shi l'ime ụnwunna unu họta onye nkfuchiru Chileke, zhi iya t'ọ bya g'o zhiru mbẹdua. Onye ono bẹ unu l'a-nọ anụjeru okfu l'iwhe lile, o kfuru, unu emeje iya eme. 23Onye l'ẹte anụru onye nkfuchiru Chileke ono okfu bẹ l'aa-họfu l'echilabọ ndu nke Chileke, mee t'ọ laa l'iyi.’ 24Iwhe bụ ndu nkfuchiru Chileke gẹ whẹ ha, wata lẹ Sámuwẹlu je akpaa lẹ ndu ọwhu l'etso iya nụ, bẹ tụkokwaru kfukota okfu iwhe-e, l'emekaa nta-a. 25Iwhe ono, Chileke shi l'ọnu ndu nkfuchiru iya sụ lẹ ya l'e-me ono bẹ bụkwa unu b'o kfuturu iya, nkele ọo unu bụ ụnwu ndụ-ichee ono, Chileke kwetaru ụkwa iwhe nteke ono, ọ sụru Ébirihamu: ‘Ọo l'ẹpa ghu bẹ mu l'e-shi gọoru ndu mgboko owhu ọnu.’ 26Chileke yeru Onye l'ejeru iya ozhi, bụ Jisọsu sụ t'o vuru ụzo byakfuta unu bya agọoru unu ọnu-ọma, bụ iya bụ l'oo-me unu g'unu ha l'ẹhu l'ẹhu, t'unu gbẹeru iwhe-dụ-ẹji ono, unu l'emegbabe azụ.”

Currently Selected:

Ozhi ndu ishi-ozhi 3: Ezaa

Highlight

Copy