Ozhi ndu ishi-ozhi 4

Pyita l'asa okfu l'iwhu ndu ishi ndu Ju

1Pyita yẹle Jọnu kpụkwaduru-a okfu ono, whẹ l'ekfuru ndu ono l'ọnu ekfu, ndu l'agbajẹ ẹja nụ Chileke, mẹe onye ishi ndu ọgbogu eze-ụlo Chileke, mẹe ndu ọgbo Sádusii wụru wukfuta whẹ. 2Ẹhu l'eghu ndu ono, wụru bya eghu, nkele ụmadzu labọ ono l'ezhi ndu ono iwhe, aryakwa iya whọ arya asụje l'ee-megee shi l'eworu ono, whẹ woru onwowhe ye Jisọsu l'ẹka mee tẹ whẹ shi l'ọnwu teta nọdu ndzụ. 3Whẹ kpụta whẹ je atuchia l'ụlo mkpọro nkele ọchi gbawarụ nteke ono. Whẹ nọo jeye chi sahụ. 4Ọle igweligwe ndu nụru ozhi, Pyita whẹ zhiru bẹ kwetaru l'iwhe whẹ l'ezhi. Ndu ọwhu bụ unwoke, lị iya nụ rwukwaru iwhe ha g'ọo ụnu madzụ ugbo iri l'ẹbo l'ụmadzu ụkporo ugbo iri.

5O rwulewho echile iya, ndu ishi ndu Ju, mẹe ndu bụ ọgurenya whẹ, mẹe ndu o-zhi-iwu bya edzukobe lẹ Jerúsalẹmu. 6Ánasu, bụ onye ishi ndu l'agbajẹ ẹja nụ Chileke nọdukwawho l'ẹka ono, mẹe Káyafasu, mẹe Jọnu, mẹe Alẹguzánda, mẹwaro iwhe lile, shikota l'eri ndu l'agbajẹ ẹja nụ Chileke; whẹ tụko nọdukota-gezhia l'ẹka ono. 7Whẹ bya eduru ndụ-ishi-ozhi ono dobe l'echilabọ whẹ, jịlahaa whẹ ike onye whẹ gude eme iwhe lile ono mẹe onye zhiru whẹ iya nụ.

8Ume-Dụ-Nsọ ji Pyita ẹhu, o kfulahaa sụ whẹ: “Unubẹ ndu ishi mẹe ndu bụ ọgurenya ndu Ízurẹlu, 9ọ -bụru l'iwhe unu l'ekpe anyi ikpe iya ntanụ-a bẹ bụ ikpe iwhe-ọma, anyi meru onye ẹhu l'adụa mma, mbụ woo, ?ọo gụnu b'e gude mee nwoke ono o mehu? 10t'unu makwarụ, mbụ unubẹ ndu lile, nọ l'ẹka-a mẹwaro ndu Ízurẹlu l'owhu l'ọo ike nke ẹwha Jisọsu Kuráyisutu, bụ onye Názaretu, unu kpọpyaberu l'oswebe l'onwunu b'e gude mee nwoke-e o mehu, yẹbe nwoke bya akfụru l'iwhu unu-a. Ọle Chileke megeeru, bya emee Jisọsu ono, o shi l'ọnwu teta nọdu ndzụ. 11Ọo Jisọsu ono b'e deru okfu ẹhu iya l'ẹkwo Okfu Chileke sụ:

“ ‘L'ọo ẹwhuru ono, unubẹ ndu

l'atụ ụlo jịkaru, l'ọo ọ-ga-lẹ-mkpa,

bẹ bekochaaru bya abụru ẹwhuru, gude ụlo.’#4:11 Egvu. 118:22.

12Ọ tọ dụdu onye ọdo, l'a-dụ ike adzọta anyi ta agụfule iya whọ Jisọsu Kuráyisutu kpụ. Tọ dụhunu ẹwha ọdo lẹ mgboko-o l'owhu, Chileke meru t'a marụ, bụkwanu ẹwha, l'a-dụ ike dzọfuta madzụ, gbahaa nke Jisọsu ono kpụ.”

13Whẹ nụlewho gẹ Pyita yẹle Jọnu l'asa kaa kaa, l'ẹka whẹ bụkwa madzụ mmaanụ, l'abụa lẹ whẹ jeru ẹkwo, ọ tụfu whẹ ẹhu. Ẹnya rwua whẹ lẹ Pyita whẹ bụ ndu whẹ lẹ Jisọsu shi atụ ọli. 14Whẹ ta amahẹ iwhe whẹ l'e-kfu gẹ nwoke ọbu, e meru, o mehu ọbu kfụkubekwa whẹ-e l'ẹka ono. 15Whẹ sụ Pyita whẹ tẹ whẹ lụfu l'iwhu ọgbo-ikpe ono tẹ whẹ chịa idzu. Pyita whẹ lụfulewho, whẹ chịlahaa idzu. 16Whẹ sụ: “?Ọo gụnu bẹ anyi l'e-me ndu-a? Iwhe bụ Jerúsalẹmu l'owhu bẹ madzuwaru ntaa l'ọo whẹ bẹ Chileke shi l'ẹka whẹ mee tẹ nwoke-e mehu. Anyi ta atụkwa iya ẹgo. 17Sụ l'iwhe anyi l'e-me nggẹ t'e kfukashihe iya t'o dzuru alị ndu Ju bụ t'anyi yeshia whẹ egvu ike, tẹ whẹ be ewhotahekwa ẹwha nwoke ono ọdo.” 18Whẹ bya ekua Pyita whẹ, naarụ whẹ nkemu sụ whẹ tẹ whẹ be ewhotabahekwaa ẹwha Jisọsu ọdo, whẹ te egudehunu ẹwha iya zhia iwhe l'edzudzu-ọha ọdo.

19Pyita yẹle Jọnu bya eyee ọnu sụ: “Unu ghanụ-a ya hata, ?ọo ole ka ree l'iwhu Chileke: ?Ọo t'anyi nụjeeru Chileke okfu, tọo t'anyi nụjeeru iya unu? 20Nkele anyi ta adụkwa ike aha okfu iwhe anyi gude ẹnya anyi whụa, nụa ya lẹ nchị anyi.” 21Whẹ bya anashịaru whẹ nkemu ike haa whẹ, whẹ lashia. O noo l'ọ tọ dụdu iwhe whẹ marụ, bụkwanu ọkpareka iwhe whẹ l'e-goo ẹka meshia whẹ iwhe ike, nkele ndiwhe tụkoru ekele Chileke ekele iwhe ono, meru nụ. 22Nwoke ono, e meru o mehu l'ụzo ono, dụ biribiri bẹ nọghatawaru awha ụkporo ugbo labọ.

Ndu nke Chileke l'ekfu anụ Chileke t'ọ nụ whẹ ike

23A halẹwho Pyita whẹ, whẹ tụgburu jekfushia ndu whẹ lẹ whẹ l'alịje, je akọkotaru whẹ iwhe lile, ndu ishi ndu l'agbajẹ ẹja nụ Chileke mẹe ndu bụ ọgurenya ono kfuru. 24Whẹ nụ-gele iya whọ, whẹ gude obu lanụ kwata ekfu anụ Chileke sụ: “Onye-Nwe-Ọha, bụ Chileke, Onye meru igwe mee alị, mee eze mini mẹwaro iwhe lile, dụkota l'ime iya; 25gụbe onye gude ike Ume-Dụ-Nsọ mee onye-ichee anyi ono, bụ Dévidi, onye shi ejeru ghu ozhi, o dee sụ:

“ ‘?Ọo gụnu meru iwhe ndu mba lile gude ẹhu-eghughu aba hanyị-hanyị?

“ ‘?Ọo gụnu meru iwhe ndiwhe

l'achịje ejo idzu nke mmaanụ?

26Ndu eze, l'achị mgboko

kwakọbe-geeru nke ọgu, ọwhube ndu ishi

dzukobegekwaawho tẹ whẹ

kpọshia iwhe Onye-Nwe-Ọha l'eme,

mẹkwawho tẹ whẹ kpọshia

nke Onye ono, ọ họtaru, bụ Kuráyisutu.’#4:26 Egvu. 2:1,2.

27Ọo ezhi-okfu lẹ whẹ dzukoru lẹ Jerúsalẹmu l'ẹka-a, mbụ Hẹ́rodu, mẹe Pọ́nchosu Páyileti, mẹe ndu l'ẹte abụa ndu Ju, mẹe ndu Ízurẹlu tẹ whẹ lwụshi Nwa ghu ono, dụ Nsọ, bụ Jisọsu ono, ị họtaru ọgu. 28Ọle iwhe ono, whẹ tụkoru eme bụ tẹ whẹ mee iwhe ị chịhawaru l'idzu sụ l'o noo gẹ l'ee-me iya. 29Ntaa, Onye-Nwe-Ọha! Leedawho ẹgube nkemu, whẹ l'anarụ anyi. Ọo ya bụ, nụnu anyịbe ndu l'ejeru ghu ozhi ike, t'anyi ba atsụ-jezhia egvu ilile ilile nke ookfu okfu ghu ono. 30Yetanu ẹka mee tẹ ndu ẹhu l'eme mehukota mẹe t'anyi gude ẹwha Jisọsu, bụ Nwa ghu ono, dụ nsọ meshia iwhe-awhụrulenya, dụ-gee biribiri.”

31Whẹ kfugeeru nụ Chileke, ẹka ono, whẹ nọdu nmakọta jijiji. Ume-Dụ-Nsọ bya eji whẹ ẹhu. Whẹ kwata zhilahaa ozhi-ọma Chileke lẹ ba atsụ egvu.

Ndu nke Chileke l'agba mgba l'iwhe lile

32Tọ dụ iya bụ lẹ ndu lile ono, kweru l'ọo Jisọsu bụ Onye-nwe-whẹ-nụ gẹ whẹ ha tụko nmagba bụru nnanụ. Obu whẹ bụru nnanụ. Tọ dụhe onye ọwhu l'asụjekwadu l'iwhe ọwhu ya nweru bẹ bụ nke ẹka iya. Iwhe lile bẹ whẹ tụkoru nmagbabẹ nweru l'ọha. 33Ndụ-ishi-ozhi gude ike, parụ ẹka agba ama l'edzudzu-ọha lẹ Onye-Nwe-Ọha, bụ Jisọsu shiwaa l'ọnwu teta nọdu ndzụ. Chileke l'emekwaru whẹ whọ eze-iwhe-ọma, parụ ẹka shii gẹ whẹ ha. 34Iwhe bụ gẹ whẹ hakọta ono whụkota iwhe mkpa iya dụ whẹ. Iwhe bụ ndu nweru alị mẹe ụlo reshikota iya, 35chịtaru ndụ-ishi-ozhi ono okpoga, whẹ retaru iya. Whẹ l'ekekashijeru madzụ lile okpoga ono, eketaru onyenọnu lẹge mkpa nkiya hatabe.

36O noo g'ọ nwụru, meru iwhe Jósẹfu mekwaruwho nkiya nno. Jósẹfu ono bụ onye Lívayi, onye a nwụru lẹ Sáyipurọsu. Iwhe ndụ-ishi-ozhi gụberu iya bụ Bánabasu, bụ iya bụ onye l'agbẹje ndu ọdo ọkpu-ike. 37Yẹbedua je eree alị iya, chịta okpoga iya bya eworu ye ndụ-ishi-ozhi l'ẹka.

Currently Selected:

Ozhi ndu ishi-ozhi 4: Ezaa

Highlight

Copy