Ozhi ndu ishi-ozhi 5

Ananáyasu yẹle nyee ya l'adzụ ejire

1Ọo ya bụ, o nweru nwoke lanụ ọbu ẹwha iya bụ Ananáyasu. Yẹle nyee ya, bụ Safáyira bya eje eree alị nke whẹ. 2Ananáyasu habọta aswa alị ono dobe, nyee ya makwarụwho, ọ bya ewota uwudu iya ọwhu, bya anụ ndụ-ishi-ozhi, sụ whẹ l'ọ wakwa mkpakọ iwhe ya retaru l'alị iya ndọwa. 3O noo ya, Pyita sụ iya: “Ananáyasu, ?ọo gụnu meru g'o gude i kweta tẹ Sétanu bata ghu l'obu bya emee ghu t'ị dzụaru Ume-Dụ-Nsọ ejire, mbụ i kweta habọta okpoga, i retaru l'alị ghu? 4Nteke ono, l'iitiki ree alị ono, ?tọ dụ ghu nwe iya? Tẹmenu i regee ya, ?tọ dụ ghu bẹ okpoga iya dụ l'ẹka, ọ bụru ghu marụ iwhe dụ ghu mma, i ge egude iya mee? ?Ọo gụnu meru i kweta t'ẹgube iwhe dụ nno bata ghu l'obu? Aa! Ọ tọ kwa madzụ b'i dzụru ejire. Ọ kwa Chileke.” 5Anụnu, Ananáyasu l'anụ iwhe ono, ọ daa gbaa l'alị nwụhu. Ndu lile, nụru iya nụ tsụlahaa egvu. 6Unwokorọbya wulihu, bya akwaa ya pata pafụ je elia.

7A nọlewho iwhe ha g'ọo awa ẹto, nyee ya shi bata. Ọle ọ tọko madụaro iwhe meru nụ. 8Pyita sụ iya: “?Ọo mkpakọ iwhe gụ lẹ ji ghu retaru l'alị unu ndọwa?”

Nwanyị sụ iya: “Ee, l'ọ kwa mkpakọ iya ndono.”

9Pyita sụ iya: “?Ọo gụnu meru g'o gude gụ lẹ ji ghu chịa idzu t'unu bya adataadaa Ume-Dụ-Nsọ? Lekwa ndu jeru ooli ji ghu gẹ whẹ l'alwawhọ. Ọo whẹ l'a-pafụkwawho gụbedua.” 10Ekfukfu, Pyita l'ekfu iya, nwanyị ono daa gbaa lẹ mgboro ọkpa Pyita kụrwua ẹnya. Unwokorọbya ono batashia, ọ nwụhuwaa, whẹ pata iya je elikube ji iya. 11Ndu chọchi gẹ whẹ hakọta mẹe ndu ọdo, nụru iwhe ono nmahụkota byiibyii.

Ndụ-ishi-ozhi kabaa anọ eme iwhe-awhụrulenya

12Ndụ-ishi-ozhi ono meshiaru ndiwhe igweligwe iwhe-awhụrulenya, dụ-gee biribiri l'echilabọ ndu Ju l'ẹka ono. Ndu lile ono, kweru nke Chileke gẹ whẹ ha l'egudeje obu lanụ je edzukobe l'eze-ụlo Chileke ibẹka iya nke Ọnuzo-Sólomọnu. 13Tọ dụhunu ndu ọdo mmaanụ, l'ẹte alịa l'ọgbo ono, jeru ọtu ama nke tẹ whẹ tsoru whẹ, e gudero lẹ whẹ bụ ndu dụru ndiwhe lẹ nsọ. 14Ọle igweligwe madzụ byalẹkwarua bya ewota ndzụ whẹ ye Onye-Nwe-Ọha, bụ Jisọsu l'ẹka; unwoke mẹe ụnwanyi. 15Whẹ kwobe iwhe ono, ndụ-ishi-ozhi ono l'eme pashịkota ndu iwhe l'eme je edoo l'agụga echi-ụzo, je enyebegee whẹ l'iwhe-azẹe mẹe l'ute, nke ọwhu bụ Pyita -ghatadẹ, o beru ọ bụ m'ọo inyonyo iya harụ whẹ rwua l'ẹhu, t'o mee whẹ tẹ whẹ mehukota. 16Igweligwe madzụ shi lẹ mkpụkpu lẹ mkpụkpu, dụkube-gee Jerúsalẹmu ntse gbakọo, patageeru whẹ ndu ibe whẹ, ẹhu l'eme, mẹe ndu ejo-maa bu l'ẹhu. E mee whẹ, whẹ mehukota.

Aakpa ndụ-ishi-ozhi ẹhu ọdo

17Ọo ya bụ, onye ishi ndu l'agbajẹ ẹja nụ Chileke mẹe ndu ọli iya, bụ iya bụ ndu ọwhu tso l'ọgbo Sádusii tangịrihu, kwoderu whẹ ekwo. 18Whẹ je egudeshia ndụ-ishi-ozhi ono je achịru ye l'ụlo mkpọro. 19O rwulewho l'ẹnyashi, ojozhi-imigwe, shi l'ẹka Onye-Nwe-Ọha bya agụhashia ụzo ụlo mkpọro ono, bata je edufuta ndụ-ishi-ozhi ono sụ whẹ: 20“Unu je akfụru l'ime eze-ụlo Chileke kọkotaru ndiwhe akọ ndzụ, shi l'ẹka Kuráyisutu.” 21Ndụ-ishi-ozhi ono kwe iya. O be l'ụtsu iya, whẹ je anọdu l'ọma-ogboduwhu eze-ụlo Chileke zhilahaa iwhe. Ọo ya bụ l'onye ishi ndu l'agbajẹ ẹja nụ Chileke mẹkwawho ndu ọli iya, ekukoo ndu ọgbo-ikpe ono gẹ whẹ ha, bụ iya bụ ndu ishi ndu Ízurẹlu tẹ whẹ chịa ọkpobe idzu. Whẹ zhia t'e je l'ụlo mkpọro je atụfu ndụ-ishi-ozhi ono kpụtaru whẹ. 22Ndu e zhiru jeshia, whẹ ta awhụ whẹ l'ụlo mkpọro ono. Whẹ dawhu azụ bya asụ ndu ikpe ono agha: 23“Anyi rwukwaru, a tuchirwee ụlo mkpọro atuchirwe pyịa ya ẹka. Ndu nche nọdu-gekwaa nche l'ọnu-ụlo mkpọro ono. Anyi bya atụhaa ụzo, tọ dụ onye anyi whụru l'ime iya.” 24Onye ishi ọgbogu eze-ụlo Chileke mẹe ndu ishi ndu l'agbajẹ ẹja nụ Chileke nụa iwhe ono, ọ gbachia whẹ ẹnya, whẹ rịlahaa iwhe l'e-me nụ.

25Nwoke lanụ gbata bya asụ whẹ: “Unu marụ-a l'ọo unwoke ọbu, unu tụru mkpọro bẹ kfụwaru l'ọma-ogboduwhu eze-ụlo Chileke ẹgube whọ, ezhi ndu nọ l'ẹka ono iwhe.” 26Onye ishi ndu ọgbogu ono lụfu, chịta ndu ọgbogu je egude ndụ-ishi-ozhi ono kpụta-whu azụ. Ọle ndu ọgbogu ono te emedu mgbagiru nteke whẹ l'akpụta whẹ, nkele whẹ l'atsụ egvu, a -nọnyaa ndiwhe gude ẹwhuru tugbua whẹ.

27Whẹ kpụta ndụ-ishi-ozhi ono bya edobe l'iwhu ndzuko ọgbo-ikpe whẹ. Onye ishi ndu l'agbajẹ ẹja nụ Chileke jịlahaa whẹ ajị sụ: 28“?Ọ kwa l'anyi kfuru iya unu kfushiaru unu ike sụ unu t'unu be egudehekwa ẹwha nwoke ono ezhi iwhe? Unu lewaro ntaa g'unu gude iwhe ono, unu l'ezhi nno zhigba Jerúsalẹmu. Iwhe unu l'emelewho bụ t'unu tukobe anyi ọchi nwoke ono l'ishi.”

29Pyita yẹle ndụ-ishi-ozhi ono sụ whẹ: “Ọ kwa iwhe Chileke sụru t'anyi mee bẹ anyi l'e-meje. Ọ tọ bụkwa ọwhu madzụ kfuru. 30Chileke nna anyi ochee whẹ meru tẹ Jisọsu shi l'ọnwu teta nọdu ndzụ, g'unu kpọpyabe-geeru iya l'oswebe, ọ nwụhu. 31Chileke wolia ya dobe l'ẹka-ụtara iya, mee ya Nnajị-Ọha l'owhu mẹe Onye-Ndzọta, nggẹ o shi l'ẹka ono goshi ndu Ízurẹlu ụzo, whẹ l'e-shi daa onwowhe ụta haa ome iwhe-dụ-ẹji lwakfuta Chileke, nggẹ ọ gụaru whẹ nvụ lẹ iwhe-dụ-ẹji, whẹ l'emegbabe. 32Iwhe lile bẹ anyi bụkota ẹka-ebe iya. O nokwawho gẹ Ume-Dụ-Nsọ ono, Chileke l'anụje onye l'anụru iya okfu bụkwawho onye ẹka-ebe.”

33Ndu ikpe ono nụle iya whọ, whẹ vọru ọku ghụa ẹhu, chịa lẹ whẹ l'e-gbushi ndụ-ishi-ozhi ono. 34Onye lanụ l'ime whẹ, ẹwha iya bụ Gamáliyelu gbalihu tẹ ya yee ọnu. Gamáliyelu ono tso l'ọgbo ndu Fárisii, bụkwawho onye o-zhi-iwu Mósisu, bụkwaruwho onye ndiwhe l'eyeru ẹso. Ọ sụ t'a chịta ndụ-ishi-ozhi ono chịfu etezhi. 35Whẹ lụfulewho, ọ sụ ndu ikpe ono: “Ndu Ízurẹlu, unu gebekwawho! Unu kwakwaa ẹnya l'iwhe unu l'abya ome ndu-a. 36L'unu makwarụ l'o nwejehawaru nteke nwoke ono, ẹwha iya bụ Tiyúdasu gbalihujeru sụ l'ọo ya bụ onye lanụ, dụ nụ. Ndu, rwukwaru ụnu madzụ tsolahaa ya. E bekokwaaru gbua ya. Ndu ono, l'etso iya ono gbakashịhu. Ọgbo iya ono, ọ watarụ laa nke mmaanụ. 37E megekwaa, o belewho nteke a gụderu ọgu, Júdasu, onye Gálili fụtakwa. Ọ hakwarụwho ndu Ju chịtakwawho, whẹ tsoru iya. E gbukwaa ya who. Ndu ọli iya ono tụko gbakashịhu. 38O nokwawho gẹ nke ndu-a bya l'a-dụ ntaa. Iwhe mu l'ekfuru unu bụ, t'ọ bọ dụkwa iwhe unu l'e-me ndu-a. Unu pakwarụ whẹ haa. Ọ -bụru l'iwhe-e, whẹ kụbafutaru-a, ọdo bụ iwhe-e whẹ l'eme, ọ -bụru l'o shi l'ẹka madzụ bẹ l'ọo-lakwa-a. 39Ọle nteke o shi l'ẹka Chileke, bẹ unu l'afụkwaa kpọshia iwhe whẹ l'eme. Ọ -bụru l'ọo Chileke b'o shi l'ẹka bẹ unu l'e-megekwaa bya awhụa l'ọo Chileke ọbu l'onwiya bẹ unu l'alwụshi ọgu.”

Ndu ikpe ono mee iwhe Gamáliyelu kfuru. 40Whẹ kua ndụ-ishi-ozhi ono ye t'e chia whẹ iwhe, nmaarụ whẹ ọkwa sụ whẹ t'ọ bọ dụkwa mbọku, whẹ l'e-gudebaa ẹwha Jisọsu ekfu okfu ọdo, whẹ parụ whẹ haa. 41Ndụ-ishi-ozhi ono fụta l'iwhu ndzuko ọgbo-ikpe ono; tụgbua. Ẹhu l'atsọ whẹ lẹ Chileke bẹ gụtaru whẹ lẹ ndu dụ ree, nke tẹ whẹ jee iwhe-ọtsulanu l'okfu ẹka Jisọsu. 42Whẹ ta aha ozhi iwhe l'ọma-ogboduwhu eze-ụlo Chileke mẹe l'uwhu l'uwhu mbọku-mbọku; aryakwawho ozhi-ọma ono arya l'ọo Jisọsu bụ Onye Ndzọta ọbu, Chileke kweru ụkwa iya ọbu, bụ Kuráyisutu ọbu.

Currently Selected:

Ozhi ndu ishi-ozhi 5: Ezaa

Highlight

Copy