Ozhi ndu ishi-ozhi 6

A họtaru ụmadzu ẹsaa tẹ whẹ yejeru ndụ-ishi-ozhi ẹka

1O be nteke a nọnyaaru, ndu l'etso ụzo Jisọsu l'aka shii aka eje eje; ndu Ju, bụ okfu Giríku bẹ whẹ l'ekfu gụlahaaru ndu Ju ọwhu l'ekfu okfu Híburu awhụ. Iwhe kparụ iya bụru lẹ mbọku-mbọku, a -wata oke nri, ọ tọ dụdu onye l'akpajẹ ishi nke t'e ketaru ụnwu-mbunu ibe whẹ, l'ekfu okfu Giríku nri. 2Ndụ-ishi-ozhi iri l'ẹbo ono bya ekua ndu l'etso ụzo Jisọsu gẹ whẹ ha sụ whẹ: “Ọ tọ dụkwa ree t'anyi kwobe lẹ nri sụru nri ta asụ haa anọ ezhi okfu Chileke. 3Ọo ya bụ, ụnwunna anyi, unu họfuta ụmadzu ẹsaa l'ime unu t'anyi ye whẹ okfu nri ono l'ẹka. Ndu ono l'a-bụ ndu, l'aama ẹka ọma; Ume-Dụ-Nsọ eji whẹ ẹhu; whẹ abụru ndu marụ ágụ. 4Anyịbedua l'onwanyi, bụ ndụ-ishi-ozhi l'e-whubelewho iwhu l'anọ ekfu anụ Chileke mẹe anọ ezhi ozhi-ọma.”

5Whẹ zụa gbẹregbedegbemu l'iwhe ono, ndụ-ishi-ozhi sụru t'e mee ono. A bya ahọta Sutívinu, bụ nwoke wowaru onwiya ye Onye-Nwe-Ọha l'ẹka ọkpobe eyeye; Ume-Dụ-Nsọ jikwa iya whọ ẹhu. Whẹ họta Fílipu mẹe Pọrókorosu, mẹe Nikénọ, mẹe Táyimọnu, mẹe Pámẹnasu, mẹe Nịkolanu, bụ onye Ántiyọku; onye ọha ọdo, mewaru onwiya onye Ju. 6Ndu ono, l'etso ụzo Jisọsu duta whẹ dukfuta ndụ-ishi-ozhi. Whẹ bya abyabẹ-gee whẹ ẹka l'ishi kfuru nụ Chileke l'iswi ẹhu whẹ.

7Okfu Chileke kabaa odzuru mgboko. Ndu l'etso ụzo Jisọsu lẹ Jerúsalẹmu kwata akwata aka shii aka eje eje. Igweligwe ndu l'agbajẹ ẹja nụ Chileke kweta l'ozhi-ọma ono, bya eworu onwowhe ye Onye-Nwe-Ọha l'ẹka.

Eegude Sutívinu

8Sutívinu ono bụru onye Chileke meru eze-iwhe-ọma, gudekwa iya whọ ere ire, nke ọwhu l'ọoduje ike mee iwhe-awhụrulenya, dụ-gee biribiri l'iwhu ndiwhe. 9Tọ dụ iya bụ l'o nweru ndu ọgbo ndzuko ndu Ju byakfutaru Sutívinu, whẹ l'iya likfuru lẹ ntụtego. Ndu ono shi bụru ohu. Ẹka ndu ono shigee bụ Sayiríni, mẹe Aleguzándiriya, mẹe Silísiya mẹe Éshiya. 10Ọle Ume Chileke bẹ nụru Sutívinu mmamagụ, nke ọwhu l'ọobuje: o -yewaa ọnu, ya eje adụhe onye l'a-makwadụ iwhe ọdo onye ọbu l'e-kfu. 11Whẹ je eye ndu madzụ okfu lẹ nchị, tẹ whẹ sụje: “Anyi nụru nteke Sutívinu l'ekfurwushi Mósisu yẹle Chileke.” 12Whẹ gude nno kpalia ndiwhe, mẹe ndu bụ ọgurenya ndu Ju, mẹe ndu o-zhi-iwu. Whẹ bya akpụta Sutívinu kpụjeru ndzuko ọgbo-ikpe ndu Ju. 13Whẹ je eduta ndu bya agbalahaa ya ẹka-ebe, ebo iya ibo sụ: “Nwoke-e ta adụkwa nteke l'ọotoo nọje ekfubyishi eze-ụlo-ọ dụ nsọ mẹe iwu Mósisu. 14O noo l'anyi nụru ẹka l'ookfuje sụ lẹ Jisọsu-a, bụ onye Názaretu bẹ l'ee-megee nwutsushia eze-ụlo-ọ, ya abyakwawhọ bya agbanweshikota omelalị anyi, shi l'ẹka Mósisu.” 15Iwhe bụ ndu lile ono, nọkota l'ụlo-ikpe ono tụko chịru ẹnya wụbe Sutívinu l'iwhu. Iwhu iya l'egbulewho zaazaa g'ọo iwhu ojozhi-imigwe.

Currently Selected:

Ozhi ndu ishi-ozhi 6: Ezaa

Highlight

Copy