Tsefanya 1
1
1Ha de Dagwi Darwey a ha a Tsefanya Kushi Gedaliya Amariya Hɛzɛkiya, e jeng negwɔm Yɔsiya Amɔn, gbɔng gwɔ̀m Yuda à hemo:
Reyɔm de re kyè vey
2Dagwi Darwey a ye,
“Mê yishing kayɛ pyɛ e jey.
3Mê yishing bemat na ngyāma mwa,
mê yishing benon lagwi, na betɔk gworep.
Bemat beves bê gaba,
jeng de ma wey na bemat mwa yi e jey.
BeYuda
4Mê nára vwɔ̂ yol hom e ra BeYuda
tanga e ra bemat mwa de ba sangal e Yɛrusalɛm.
Mê gangas bwang bemât Baal de ba pɔl e kwɔn o
na bazâ bepiris mɛ.
5Yɛn vemo de be tē guduruk e ra beragyip nelɔ mɛn,
na be re a netangacɛ̂n lagwi fongol,
na vemo de be tē guduruk na be sisa na rezâ Dagwi Darwey,
ko be to sisa na rezâ Molek arɔng,
6na vemo de ba ga doyo yi e de raà Dagwi Darwey,
ko yɛn e to jama hɛ, kɛ be rangal reha mɛ wɛt.
7Sǎ hin yuu e nuyêl Darwey Dagwi Darwey!
Yaga jeng Dagwi Darwey ya ga vey bagat.
Dagwi Darwey a ga yong nɔrɔ̂ yas de be rangas,
ko a ga tik jaram bemat de a rini hɛn narâ nɔrɔ mo.
8E jeng narâ nɔrɔ̂ Dagwi Darwey o,
mê tabak bemât nuyel na nèy bewên gbɔng gwɔ̀m,
tanga mwa vemo de be raa negwɔn bemât yére dyuk.
9E jeng o, mê tabak vemo de be re a pyɛ̂ sekwit fongol,
na vemo de be sila duk rê fongôl bedagwi mɛn
na pyɛ̂ shigi na yê kwɛlɛng.”
10Dagwi Darwey a ye,
“E jeng o, bê wok sesin yi e Ruhûp Betɔk,
na dâk sekun yi e Majey Pwas,
tanga wûs beta de be gabsa yi e beraku.
11Dak in sekun, mwa yin de yin a sé sangal e Nɛk Rɛsɛl Pyɛ́,
yaga bejik min mwa ba ga wey.
Ko vemo de be ra nejik na dyam pyɛng
ba ga wey vit arɔng.
12E jeng o, mê kyě ngyɛgɛt Yɛrusalɛm na bekywa-kya,
na me tabak vemo de be sangal bɛs.
Yɛn vemo de be tē e neyey mɛn, ‘Dagwi Darwey ê ra pyɛ cak wɛt,
kɛ ryat o kɛ vyes o.’
13Bê hashe pyɛ̂ nedanerey mɛn,
ko be gangas nelɔ mɛn.
Yɛn ê lɔkɔs nelɔ,
ko yɛn ê sangal e ji nɛ wɛt.
Yɛn ê tus hirî anap,
ko yɛn ê sɔ nshî mo wɛt.”
Gbɔng jeng Dagwi Darwey
14Gbɔng jeng Dagwi Darwey ya ga vey bagat,
ya sé bagat, ko ya sé kyè vey dey-dey.
Wûs jeng vêy Dagwi Darwey o ha sé ves tyɔng wɛt,
suga ê ba tosho ding-ding.
15Jeng o yê ba sè jeng shom vyes,
jeng reyɔm na ye rezot, jeng wey, na ye lashê pyɛ́.
Jeng mwangalang, na ye sangal yɔɔm,
jeng bale, na ye wut de wa man sedesi.
16Jeng pɛsɛ̂l durûm como na yê môk yɛ,
e ra bapomo de ba gwɔrɔ vɛ na jwa,
na tyɔ́n bato-kwɔng arɔng.
17Mê vey na reyɔm o e ra bemat o,
ko yɛn ê kyě ra kekap sede bebók,
yaga yɛn a ga ra a Dagwi Darwey banɛn.
Bê losho nemi mɛn sede fongol,
ko banama mɛn sede beving.
18Dyam pyɛng na dyam shinang mɛn yê tɔk viri hɛn wɛt,
e jeng shôm Dagwi Darwey.
Kyâ repugu mɛ, hê re jey o mwa hywiri,
yaga ê wey na mwa vemo de ba sé e ji jey dey-dey.
Currently Selected:
Tsefanya 1: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
