Tsefanya 2
2
Shɔt e ra vê repugû BeIsrayɛl
1À yin yerê bemât jey de vit a hin na rekyen!
Tula hin, tula hin mwa!
2Gyam na be pɛsɛl hin sede byɛmɛ,
gyam na nepêp shôm Dagwi Darwey ne hwo e ra yin,
gyam na jeng shôm Dagwi Darwey ye vey e ra yin.
3Jama hin Dagwi Darwey,
à yin de yin a dyɛng bato min e ji jey.
Yin de yin e ra pyɛ de a nɔng in nu e ra yɛ.
Jama hin necik, jama hin dyɛ̂ng to,
gyeng jeng shôm Dagwi Darwey yê kwéy in.
BeFilisti
4Bê hala repomô Gaza hal,
ko Ashkɛlɔn wô tɛ́ ɛ barin,
Vey e tê-gwi, bê ro bemat mwa yi e Ashdot,
ko bê wey na Ɛkrɔn sede ba lùt cɔgɔt.
5Gawey e ra yin BeKereti de yin a sangal e kwogôm gworep!
Hâ Dagwi Darwey hemo ha sé e ra yin!
À Kanaan, vwêl BeFilisti,
mê wey na yin, ko bê tɛt ɛ mwat hwak wɛt.
6Vwel de ha sé e kwogôm gworep
hê tɛ́ ɛ kwɔ̂n gyengês yas,
kwɔn de belek bê gyenges ɛ vyēl mɛn,
na kwɔn de bê lɔkɔs ɛ kara vyēl o arɔng.
7Hê tɛ́ ɛ hê bwang bemât yerê Yuda
ko yɛn ê sè kwɔ̂n gyengês yas e hwomo.
Nawiri, yɛn ê pɔlɔs e nelɔ BeAshkɛlɔn,
yaga Dagwi Darwey, Dagwi mɛn ê gyeng ɛn,
ê to toyo a yɛn na nerat mɛn.
Bavwêl Mowap na Amɔn
8Ma ga wok lɛlɛ BeMowap
na byɛnɛ̂ng BeAmɔn,
de be lɛ̄lɛ bemat hom,
ko yɛn e dak kaa, bê re vwel o.
9Yaga ano, Dagwi Darwey, Dâ Jey Mwa, Dagwî Israyɛl a sira hɛ a ye,
“Mwin, Mowap wô sè sede Sɔdɔm,
ko BeAmɔn bê sè sede Gɔmɔra
be sè kwɔ̂n batîn rɔgɔ, na bavɔng nevwashe,
bê sɛ̀ pyɛ́ e vɛ wɛt nesheneshey.
Bwang bemat hom bê wɔ̀ jugu vɛ,
ko yerê bemât jey hom de ba dal bê vɔk vwel o hɛ tɛ́ ɛ nap mɛn.”
10Pyɛ́ de bê tala hɛn mɛ yaga dâk kaa mɛn a yemo,
yaga remo de yɛn a byɛs bemât Dagwi Darwey, Dâ Jey Mwa,
ko ba to haras a yɛn.
11Dagwi Darwey ê tɛ̀ yɛn a vɔk bengyip mɛ,
jeng de a wey na bedagwî vwel o mwa.
Ko bemât yére bemât jey vê kawɛ bak bê re a yɛ fongol,
kavɛ mo e kwɔ̂n sangal mɛn.
Vwêl Etiyopya
12“À yin BeEtiyopya, yin arɔng,
bê wey na yin na wal hom.”
Vwêl Asirya
13Dagwi Darwey ê nára vwɔ̂ yol mɛ e ra bavwêl rwa bato arɔng,
na a wey na vwêl Asirya.
Ê wey na gbɔng repomô Nineve he tɛ́ ɛ barin,
hê to sè gbingiring sana nshi arɔng.
14Karâ vyēl na berɔndɔng bê dyɛngɛs e hwomo,
tanga kayɛ yére ngyāma arɔng.
Benon beraku na beying-gyi bê sangal ɛ naturuk.
Ying-gyi yê tosho yi e bapɔk bègɛt duk o, ko behwǎk e ri mo.
Ko babîm cɔ́gɔt sida de ba kana yong mɛ beduk o
bê hala vɛ dɛdɛrɛng e jey.
15Pyɛ ma yemo de yê té na gbɔng repomo de ra dak kaa na retô rɛ,
de ra kana bare pyɛ cak yê té na rɛ wɛt.
Ra tē e barê yêy rɛ, “E me zɔng — vit à hak sede me!”
Repomo mo ra ga tɛ́ ɛ gbɔng barin,
kwɔ̂n sangâl ngyāma!
Bemat mwa de be kwey rɛ
be té cwɛ̀ɛp, be zigim bato mɛn zɔng.
Currently Selected:
Tsefanya 2: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
