Tsefanya 3
3
Yɛrusalɛm
1Gawey e ra gbɔng repomô Yɛrusalɛm, de re ragas sogsô nehywɛ,
ra sé ríshik-rishik, ko re tak a bemât rɛ!
2Re tɛ̀ tong na hâ mwat hwak wɛt,
ko re wok tabak arɔng wɛt.
Re tɛ̀ gap e ra Dagwi Darwey wɛt,
ko re wɔ bagat na Dagwî rɛ wɛt arɔng.
3Bemât fwôm re ba sé sede begukum de be lulum.
Bemât shɔt re ba sé sede bebwá nawiri,
ko be tɛt ɛ pyɛ cak vɔk e nagasi wɛt.
4Bezarap Dagwî rɛ
be paa kwas, ko be mɔt bemat.
Bepiris mɛn
be tɛ̀ pyɛ̂ jɛrɛ ligis,
ko yɛn e gyilsit Badu Dagwi.
5Mwa ano, Dagwi Darwey wo cik a sé e ji rɛ,
ko e sang ra pyɛ́ de ya buru wɛt.
Kanɛ nagasi, e gas a bemat mɛ badu e tē,
e ra ano kahɛ yé gbey jey.
Ko mwa ano, bemat bevês rɛ, be vo rekyen wɛt.
6Dagwi Darwey a ye,
“Ma ga wey na yére bemât jey vit.
Tyɔ́n dal mɛn yê bato-kwɔng ya ga tɛ́ ɛ barin.
Ma ga tik nehyok mɛn hal,
vit a bemat de be kweres ɛ.
Ba ga wey na bapomo mɛn, bemat o ba ga kyè,
vit a mwat de a tɛt ɛ e vɛ.
7Ma ye, ‘Mwin bemat hom bê wok bengyip hom,
bê sey tabak hom,
yɛn ê sang ye bam
a pyɛ de ma ga kana basa a yɛn wɛt.’
Ko mwa ano, yɛn a re nuyel na râ negwɔn neves.”
Yére bemât jey mwa
8Dagwi Darwey a ye,
“Yaga ano, gyéng me hin tyɔng,
gyeng jeng de mê sogo sede mwât nuha.
Ma ga tɛ̀ e yey hom na me tula yére bemât jey,
na vê segwɔm detidetu,
na me shushu shom hom e ra yɛn,
na mwa nepêp lashê yey hom.
Yaga kyâ repugu hom
hê re jey o mwa.
9E bama mo, mê sege lêm yére jey na ye ha ha rat,
yaga na ye yila e ra rezâ Dagwi Darwey zɔng,
na ye ra a yɛ fwom na yey rining arɔng.
10Vê re a me fongol yi e nuyêl bègwɔrɔt Etiyopya,
mwa ano de ba ga shara hɛn yikyik,
ko yɛn ê ba vey nɔng me nenɔrɔ detidetu.
11E jeng o, yin ê ba vo rekyen wɛt,
yaga mwa tomong ves de yin a sogo a me mɛ nehywɛ.
Yaga mê pat yi e tē min
vemo de be dak kaa mɛn na yey pyɛng.
Yin ê sang to paa kwas
e ra raku hom wo jɛrɛ wɛt.
12Yaga mê tik e tē min vemo de be dyɛng bato mɛn
na vê nehywɛ.
Yɛn bê jama kwɔ̂n dal
e ji rezâ Dagwi Darwey.
13Bwang vemo de ba tɛ̄t ɛ e ji BeIsrayɛl
bê to ra pyɛ cak vyes wɛt.
Yɛn ê to ha bɔs
kɛ hâ kwɛlɛng wɛt.
Yɛn ê re pyɛ́, be dyɛngɛs tyang,
ko vit a mwat de ê tɛ̀ a yɛn bengyip.”
Lwɛlɛ̂ yey pyɛng
14Moklo lwɛlɛ, à yin bemat hom vê cik e Siyɔn.
Ye ngyat, à hwo Israyɛl!
Shɛgɛsh na yey min mwa,
à yin bemat hom vê cik e Yɛrusalɛm!
15Dagwi Darwey a ga gáng a hwo tabak mo,
A ga ro a hwo vê repugu mo.
Dagwi Darwey, Gbɔng Gwɔ̀m Israyɛl a sé e tē mo.
Hwô sang to vɔk bengyip wɔgɔ, pyɛ cak yê mǎ hwo wɛt.
16E jeng o, yɛn ê ye e Yɛrusalɛm.
À Siyɔn, hwo wok bengyip wɛt,
hwo hala vɔ mo dɔshɔk wɛt!
17Dagwi Darwey, Dagwi mo a sé e tē mo.
Ê se suga de e di wɛng.
Ê vɔk yey pyɛng sizɔng na hwo.
Ê to turu hwo na tɛ̂ yey mɛ.
Ê vɔk yey pyɛng na hwo na râ lwɛlɛ.
Sede e jeng nzem.
18Dagwi Darwey a ye,
“Mê pát a hwo lashê yey,
ha sé pyɛ byɛs na ye sedusa e nuyel mo.
19E jeng o, mê teshe na vemo de be mɔt o.
Mê sey ɛ vê nà bol,
na me to tula vemo de ba ga kyini hɛn.
Mê tɛ̀ be somo hɛn, na be nɔng ɛn nerey,
e mwa bavwel de ba ga kana tɛ̀ a yɛn ɛ rekyen.
20E jeng o, mê to tula hin,
na me toyo na yin e lɔ e jeng o.
Mê tɛ̀ be nɔng in nerey,
na be somo hin e ji bemât jey mwa,
jeng de ma to toyo a yin
na nerat min mwa e bayis min.”
Dagwi Darwey a ha ano.
Currently Selected:
Tsefanya 3: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
