Habakuk 3
3
Won Habakuk
1Wôn Habakuk, zarap Dagwi à hemo.
Be ra mɛ lwɛlɛ̂ sesin.
2À Dagwi Darwey, ma ga wok rehâ negwɔn mo,
ko ma vɔk bengyip pyɛ de hwà ga ra.
To ra a remo e jeng mot
Dura a remo e jeng mot gbɔng pyɛ́ de hwá kyě ragas raane.
Tosho reyɔm mot, mwa ano de hwà vɔk shom na wot.
3Dagwi a to sé kyè vey yi e vwêl Ɛdɔm,
Dagwi Wo Jɛrɛ a sé kyè vey yi e Beraku Paran.
Nedyɛt mɛ nà bang lagwi,
ko jey ya sila na somo mɛ.
4E kyè vey na negbêy té dɛbɛt mɛ.
Negbey ne tabas yi e vwɔ mɛ,
a sé e gwɛ de a lɛrɛ ɛ reto mɛ.
5E tanga tomo na tumbang,
ko e tɛ̀ reku re raa e bama.
6Jeng de e tumal, ko jey ye digis.
Yére bemât jey ye vow ras de a di yɛ.
Beraku de ba sé nesheneshey ba waram hɛn.
Berahwol de ba sé gbak-gbak ba té ɛn tas.
Begwong mɛ ba sé ano yimo raane.
7Ma bɛrɛng bǔk BeKushan ba gabsa,
ko bahwô bǔk BeMidyan ba vow.
8À Dagwi Darwey, a sé e bègwɔrɔt o de ba nɔng o shom arɛt?
A sé e nerɔt o de na lashe a hwo yey a?
A sé e gworep o de gwa beseng a hwo yey a?
Hwà tɛ̀ bale be sè bedwa mo,
hwà tɛ̀ balê rwak be sè kyɛkyɛ̂ bedwa mo wɔ̂ wɛng e ji como.
9Hwà yong gbang mo, zing mo wa sila na ket.
Hwà kyě vugus jey na nerɔt.
10Jeng de beraku ba di o, ko ba hwo gunus hɛn na bengyip.
Tɛmɛ-nshi na hwo tele yi e larwak.
Gworep gwa lulum,
ko bagung gwɛ ba tē funglang e rak o.
11Gwi na pwɛl ba nɔng negbey wɛt,
jeng de ba di nebwerep kwerês ket mo fyàw,
tanga nedɛbɛt bara mo de wa nɛp.
12Hwó kwey e jey na shom,
ko hwó bɔrɔs yére bemât jey na lashê yey.
13Hwà nusu na hwo wɔ sey bemat mo,
na hwo wɔ sey womo de hwà mɔmɔ na něy.
Hwà bunut mwât nuyêl negwɔm neves mwa vit,
ko hwà wey na bemat mɛ hywiri.
14Ket mo ba luga mwât nuyêl bemât como mɛ,
jeng de ba vey sede gwogul rwak de gwô shara hot.
Ba vɔk yey pyɛng sede bemat de be mɔt bepɛng e lɛrɛ.
15Hwà bɔrɔs e ra gworep na bedwa mo,
ko tɛmɛ-nshi mo nà paa fulu.
16Ma wok pyɛ̂ mwa, ko bek hom ha vow.
Bèbɛrɛ̂k nu hom ba vow na bengyip.
Rebek hom ra tɛ́ ɛ jwɛɛnɛn,
ko ma kyě tiris bol hom zɔng.
Ma rɔda gyeng yuu sɛ̌ jeng o ya pom,
jeng yôm vemo de ba hwo e ra wot.
17Mwa ano de batîn regwi ba ga túruk wɛt,
ko vit a nèy anap e ra batîn anap o arɔng.
Mwa ano de pàt ba mara wɛt,
ko hiri arɔng ba vɔk pyɛ̂ yeneng wɛt.
Mwa ano de tyīmit ya kushu hywiri,
ko karâ berɔndɔng ba sé hal.
18Ko mwa ano ma rɔda re nuyel na vɔ̂k yey pyɛng na Dagwi Darwey.
Mê shɛgɛsh na Dagwi mwât sey me.
19Darwey Dagwi e nɔngɔs me gap.
E tɛ̀ bol hom be sè ting sede ve vow,
ko e tɛ̀ me kyě kyè e nekwɔn de na dal e rak o.
Lwɛlɛ mo gwa sè e vwô mwât kyé na lɛlɛ.
Be ra gwɛ na yōm.
Currently Selected:
Habakuk 3: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
