Zɛkarya 9
9
Bê yɛrɛ a yére bemât jey shɔt
1Hâ siitit yi na Dagwi Darwey a hemo:
Dagwi Darwey e bɛrɛng yére BeIsrayɛl, e bɛrɛng mwa bemasi arɔng. Ko e yɛrɛ a sevwêl Hadrak na gbɔng repomô Damaskus shɔt. 2Shɔt o ya rɔda hwo e ra repomô Hamat de ra sé bagat na Hadrak, ya hwo e ra bagbɔng bapomô Tur na Sidɔn mwa arɔng de bemat mɛn ba vɔk netsitsɛng sizɔng. 3Bemât Tur o ba lɔk a bato mɛn gbɔng kwɔ̂n dal, ko ba tula dyam pyɛng na dyam shinang vit a yere mo, sede bagwɔ̂t fongol! 4Ko Darwey a rɔda sey ɛ kayɛ pyɛ de ba vɔk. A rɔda wey na bedwa-nshi mɛn e gworep, ko kya ha rɔda re gbɔng repomo mo buruk.
5Bemât bagbɔng bapomô Ashkɛlɔn na Gaza ba rɔda di ano, ko ba rɔda vow na bengyip sizɔng. A rɔda sè tyɛng ano na Ɛkrɔn, yaga pyɛ́ de bemat o ba kana sɛt yey mɛn e ra yɛ ya ga wey. Gbɔng gwɔ̀m Gaza a rɔda wey, ko bê hala Ashkɛlɔn vit a mwat e ji mo. 6Bemât yére detidetu ba rɔda wɔ̀ sangal e Ashdot. Dagwi Darwey a ye, “Ma rɔda tɛ̀ BeFilisti vemo de be tos bato mɛn be dyɛng vɛ. 7Yɛn ê to re banama na nemi e ji vɛ, kɛ bwang pyɛ̂ re yemo de ya sé kyiri wɛt. Mwa bwang vemo de ba hywit ɛn na neken ba rɔda sè e ji bemat hom, bê sè sede ruhup hwak e ji yerê Yuda. Ma rɔda sey bemât Ɛkrɔn, na be tɛ́ ɛn bak bemat hom, sede remo de ma kana sey BeYebus. 8Ma rɔda gyeng Gbɔng Duk Re a me Fongol, ko mê dul bemât como sana hwo e ra wɛ. Ma rɔda nɔ̂ng bemât gap gwong, na be to ngyit bemat hom wɛt, yaga ma ga di yerê rezot de bemat hom ba ga kana sɔ.”
Gbɔng gwɔ̀m de e kyè vey e Siyɔn
9À yin bemât Siyɔn, rɛ̌ hin na nzem yɔkyɔk!
À yin bemât Yɛrusalɛm, ra in biibi na yey pyɛng.
Di in, gbɔng gwɔ̀m min a sé kyè vey!
E kyè vey na kaà wɛng,
mwa ano, a dyɛng to mɛ,
a laga madung, hwêy madung mwa.
10A rɔda paa bekyɛkyɛ̂ como yi e Israyɛl,
ê hashe bedwa yi e Yɛrusalɛm.
Begbang de be tó mɛ como, ê kwɔrɔs vɛ,
ê yâng bemât yére dyuk, be sangal tyang.
A rɔda re negwɔm yi e yɛnɛ̂ gworep gwomo vɔk e gworo,
yi e Gwɔrɔt Ɛifaratɛs vɔk e neyɛnɛ̂ jey.
Dagwi ê to toyo na bemat mɛ
11Dagwi Darwey a ye,
“Yaga ma ga wuna me na sira tanga yin,
hemo de ba wuna hɛ na nemî nɔrɔ̂ yas de be yɛt a me,
ma rɔda paa bemat min yi e kwɔ̂n sesam,
yi e kwɔn de ha sé sede gwovɔng vit a nshi.
12To in wɛrin, à yin besam,
yin sɛt yey e ra tuk de bê hala hin washak!
To in vɔk e kwɔ̂n dal min.
Ma sé ha a yin a remo wɔgɔ,
ma rɔda tala hin pyɔlɔ min zang ba,
yaga rezot de yin a ga kana sɔ.
13Ma rɔda ra fwom na BeYuda sede gbang hom,
na BeIsrayɛl sede ket o.
Mê cɔgɔs bemât Siyɔn e ra BeGirik,
ko mê ra fwom na yɛn sede wal como.”
14Dagwi Darwey a rɔda dura to mɛ e ra bemat mɛ,
a rɔda tabas na ket sede gbara de wo tē dɛbɛt.
Darwey, Dagwi Darwey ê pɛl durum,
a rɔda kyè e ji gwogul rwak yi e bak rwa batin.
15Dagwi Darwey, Dâ Jey Mwa a rɔda gyep bemat mɛ,
ko yɛn a rɔda wey na vê repugu mɛn.
Yɛn ê ta rewɔng e de como sede bemât sefeng,
ko ba rɔda lusha nemî vê repugu mɛn,
nê tele sede nemî yas de be yɛt vɔk na Dagwi,
nemo de be lusha e ra gàgbang rangâs yas na shǐ.
16Jeng de tuk hane hê ba vey,
Dagwi Darwey a rɔda ba sey bemat mɛ,
sede lwêk vyēl e sey vyēl mɛ yi e dem ves.
Yɛn a rɔda lolo e vwel o,
sede dyéngere ryat yê kpîn negwɔm.
17Vwel o ha rɔda sè rat, pyɛ bɛrɛng tyɔng wɛt!
Bebôt bemât hɛ bê ras na gap,
na pyɛ̂ yeneng tanga nshî anap hɛ.
Currently Selected:
Zɛkarya 9: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
