Zɛkarya 10
10
Dagwi a rɔda sey bemat mɛ
1Rangal hin Dagwi Darwey rwak e jeng wɛ. A sé e yɛ de e tomsal na balê rwak, na rwak, yaga na pyɛ̂ cap ye to tá yaga kawɛ mwat. 2Yin e kyese na bedâ sekwit tanga bevwoshon, ko yɛn e vɛ́sɛ a yin bɔs na hâ vyóshon zɔng. Behak mɛn be kwɛlɛng hin wɔgɔ, be misang a yin cap-hâ negwi, ko be tɛ̀ yey min ye dyɛng na bɔs zɔng. Yaga ano, yin e kyě gǎ sede vyēl de ya ga vusa hɛ. Yin a sé e ji reyɔm, yaga yin a vɔk lwek wɛt.
3Me, Dagwi Darwey, me wok shom na belek beduk vane de be tak a kwarâ vyēl hom, ko ma sé kyè wɔ̀ tabak hɛn. Me Dagwi Darwey, Dâ Jey Mwa mê gyeng vyēl hom, yɛ a bemât yerê Yuda. Ko ma rɔda tɛ̀ ɛn, be sè sede dwâ como hom wo gap. 4Yi e kwara mo bê sɛ̀ yére bemat nuyel detidetu, vemo de bê se gbarak sede gwofwa bomô duk, vemo de bê se ting sede kwagam rɔgɔs dwa, na vemo de bê vɔk gap sede gbang como. 5Yɛn na bwâng BeYuda ba rɔda bɔrɔs vê repugu mɛn e ji bwɔrɔ̂k nehyok. Yɛn a rɔda tó como, yaga me, Dagwi Darwey, ma sé na yɛn, ko yɛn a rɔda re bemât bedwâ como mwa.
6Ma rɔda tɛ̀ BeYuda be vɔk gap,
mê sey ɛ̀ BeIsrayɛl.
Ma rɔda wok nemwishish mɛn,
ko mê toyo na yɛn mwa vey e lɔ.
Bê sè sede ma ga sang kyɛ́ me hɛn wɛt.
Ma sé Dagwi Darwey, Dagwi mɛn, mê wok won mɛn.
7BeIsrayɛl ba rɔda vɔk gap sede besuga.
Bê vɔk yey pyɛng sede bemat de ba sé sɔ nshî anap.
Nèy mɛn na rɔda di wɛng hemo,
ko nê rɛ̌ na yey pyɛng yaga pyɛ de me, Dagwi Darwey, ma ga ra.
8Ma rɔda yila bemat hom, na me tula hɛn e dem hining.
Mê sey ɛ̀ hɛn, na me tɛ̀ ɛn, be to sè pyak sede raane.
9Mwa ano de ma ga shara hɛn e ji yére bemat jey,
ko yɛn a rɔda bare na me yi e nekwɔn mɛn ne yikyik.
Yɛn ê ras nèy mɛn,
ko nê to vɛ hɛn.
10Ma rɔda toyo na yɛn yi e Misra na Asirya,
na me to nɔng ɛn kwɔ̂n sangal e vwel mɛn.
Ma rɔda nɔng ɛn kwɔ̂n sangal mwa vɔk e neyɛnɛ̂ vwêl Gileyat na Lɛbanɔn arɔng.
Ko mwa ano, vwel o hê radɛ a yɛn.
11Ma rɔda pat ɛn yi e reyɔm mɛn.
Ma rɔda gang bagung nshî gworep,
ko mê tɛ̀ retîs Gwɔrɔt Nil re tɛ́ ɛ hwɔk hwɔk,
Asirya de wó tos to, ma rɔda tɛ̀ wo dyɛng to,
Misra de wa vɔk gap hyiw, bê kwɔrɔ gâp wɛ.
12Ma rɔda tɛ̀ bemat hom be vɔk gap.
Yɛn ê kyě kyè na to e gwi yaga me.
Me, Dagwi Darwey wɛ de ma ha ano.
Currently Selected:
Zɛkarya 10: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
