Zɛkarya 11
11
1À vwêl Lɛbanɔn, wuma ri mō,
yaga na kya he re cɔ́gɔt sída mō.
2Tosho hin, dak in bèkun, à cɔ́gɔt fir
yaga cɔ́gɔt sida mo ya ga gabsa.
Cɔ́gɔt ryey o yane ya ga wey!
À yin cɔ́gɔt ouk yê Bashan,
tosho hin, dak in sekun,
yaga ba ga tow rehwot de ra vɔk cɔ́gɔt tyɔng wɛt!
3Wok in, belêk bemat be tosho na lashê yey sizɔng,
yaga kwɔ̂n gyeng yas mɛn rat o ha ga wey!
Wok in, begukum be lulum,
ba ga wey na nekwɔn sangal mɛn e bahwôt Rɔt Yɔrdan!
Belêk vyēl beba
4Dagwi Darwey, Dagwi hom a yang me, “Ra sede hwo wɛ a lwêk vyēl yemo de be kyè wɔ̀ yɛt yɛ. 5Vemo de be seres yɛ na be yɛt be di neves pyɛ de yɛn e ra wɛt, ko vemo de be rɛsɛl yɛ be tē, ‘Somo hin Dagwi Darwey, wot a ga tɛ́ ot bedaberey!’ Ko belêk vyēl mɛn be ka wok nemwishish mɛn mwa wɛt.” 6Ano arɔng, “Ma rɔda to me wok nemwishish mwat hwak e vwel o wɛt. Mê tɛ̀ bemat o mwa na gbɔng gwɔ̀m mɛn e nɛ̂n bemât vwara mɛn. Begbɔng begwɔ̀m o ba rɔda lashe vwel o, ko ma rɔda sey ɛ bemat o yi e vɔ mɛn wɛt.”
7Yaga ano, ma tɛ́ me lwêk vyēl de ba ga yong na be yɛt yɛ, vyēl o yemo de be tak a yɛ. Ma hwo jut begele beba, ma vo a gwining rezâ “Simi”, ko gwo neba ma tâng gwɛ à “Wunâ to”, ko ma gyenges kwarâ vyēl o. 8Ma tɔk niri na belêk vyēl betat de ba kyɛ́ ɛn me wɛt, ko ma paa ɛn e ji pwɛl gwining. 9Ko ma yâng kwara mo, “Ma rɔda to me sè lwek min wɛt. Tik vemo de bê kushu be kushu. Tik vemo de bê weres be weres. Vemo de ba pɔl ɛ ba rɔda weres na bemɛn.”
10E bama mo, ma jut gwele de ba tâng gwɛ à “Simi”, ko ma kwɔrɔ gwɛ, na me dura mɛ, Dagwi Darwey a ga gang wuna-na-sira de a kana ra na mwa yére bemat jey. 11A gang hɛ tuk hane. Bejik vyēl de bá sè bɛrɛng pyɛ de yá té, ba tɔk, Dagwi Darwey a sé ha na yɛn yi na pyɛ de ma ra. 12Ko ma yang ɛn, “Ka sede yin a simo, ko yin tala me byɛ hom. Ka ano wɛt, ko yin vɔk yɛ zɔng.” Yaga ano, yɛn a hwo tala me dyam pyɛng shɛkɛl naga betat.
13E bama mo, Dagwi Darwey a yang me, “Dyām a yane de yɛn a di, ya sé naka yaga me a! Bomo a zu yɛ̄!” Yaga ano, ma jut yɛ, ko ma wɔ̀ bomo a zu yɛ e lalâ Gbɔng Duk Re Fongol wo Dagwi Darwey. 14Ano arɔng, ma kwɔrɔ gwele gwo neba de ba tâng gwɛ à “Wunâ to”, na me dura mɛ, ba ga gas sangâl negwa de na sé e tê BeYuda na BeIsrayɛl.
15Dagwi Darwey a yang me, “To ra sede lwêk vyēl de a vɔk nerat wɛt. 16Yaga ma rɔda tɛ̀ lwek o hwak e ra vwel o, womo de pyɛ mɛ cak ya rɔda sè na vyēl de ya weres, kɛ nèy o de na vusa hɛn, kɛ a pege yemo de ya mǎ hɛ, kɛ a wɔ̀ gyeng yemo de ya sé tyang arɔng wɛt. Ko a rɔda sǎ e de rerês banamâ yemo de ya dal na nerat mwa na hê bol o.
17“Yàa kukuuk! Gawey e ra lwêk vyēl de a vɔk nerat wɛt,
womo de e kyè e hala vyēl o!
Tik na wal wo tara vwɔ mɛ,
na wo pat yis mɛ rê vwɔ yege arɔng!
Tik na vwɔ mɛ gwo sɔ ɛ vit,
ko yis mɛ he tɛ́ ɛ buga gbak-gbak!”
Currently Selected:
Zɛkarya 11: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
