Zɛkarya 8
8
Dagwi Darwey a rɔda to yâng Yɛrusalɛm cik
1Dagwi Darwey, Dâ Jey Mwa a to ha a me ha hemo, a ye, 2“Ma tɛ̀ yey na Yɛrusalɛm sizɔng, mê pugu kawɛ mwat de a ra wɛ. 3Ma rɔda toyo vɔk e Yɛrusalɛm, ko mê sangal ɛ e rakû Siyɔn. Ba rɔda tâng wɛ à gbɔng repomo rê tsak o, ko bê tâng rakû Siyɔn o à rakû Dagwi Darwey, Dâ Jey Mwa. 4Bemakuk na begaha de be kyè na begele na becwang yaga kwopa, ba rɔda to sangal e bemajêy gbɔng repomo mo sede raane. 5Ko nehyok o na rɔda to sila na nèy bewen na behwong e de jɔgɔ.
6“Gyeng bwang bemat de ba toyo yi e de sesam bê bare, pyɛ́ yemo yê kyɛm ye té ano wɛt, ko me, Dagwi Darwey, Dâ Jey Mwa, pyɛ cak ya dal me wɛt.
7“Ma rɔda sey ɛ bemat hom yi e bavwel mwa de ba ga kana kyè na yɛn vɔk ɛ. 8Ko mê vey na yɛn vey sangal e Yɛrusalɛm. Yɛn a rɔda sè bemat hom, ko ma rɔda sè Dagwi mɛn, ma rɔda ye waa a hɛn wɛt, ko mê gas a yɛn badu e tē.
9“Me wɛ à Dagwi Darwey, Dâ Jey Mwa. Ma yâng bemat hom, vɔk in yey ting! Bezarap hom ba kana ha neha e jeng de bá to sè bomo retîs lɔ̂k Gbɔng Duk Re Fongol. Ko a remo, yin a sé wok neha nining o. 10Gyam jeng yane, mwa fwom min gwa sé yapyi zɔng, ba tala hin pyɛ yaga gwɛ wɛt, ko yi e yas min yin a sɛ̀ pyɛ cak wɛt arɔng. Ko vit a mwat de á tɔk kyě kyè tyang yaga bemât jugu. Ma tɛ̀ bemat mwa be ra repugu na bemɛn. 11Ko a remo, ma sé ra na bwang min de yin a toyo yi e de sesam sede raane wɛt. 12E ji sangâl netyang, yin a rɔda tus pyɛ́ e hiri min, batîn anap min ba rɔda tɔs nèy naka, vwel o ha rɔda vɔk nerât pyɛ̂ hiri arɔng, ko mwɛngɛ gwa rɔda vey a hɛ naka. Ma rɔda nɔng in nerat nemo mwa. 13À yin BeYuda na BeIsrayɛl! Raane, bemât yére dyuk bá dusa bemɛn, bá tē, ‘Tik na rezot yerê remo de ra hwo e ra Yuda na Israyɛl re hwo e ra yin!’ Ko ma rɔda sey in; ko jeng de bemât yére dyuk vane ba rɔda tɛ̀ nerat e ra bemɛn, bê tē, ‘Tik na nerat yerê nemo de Dagwi a tɛ̀ e ra Yuda na Israyɛl ne se e ra yin!’ Yaga ano, vɔk in yey ting! Yin vɔk bengyip wɛt!
14“Jeng de bedabeda min bá nɔng me shom, ma tɛ̀ e yey na me tɛ̀ rezot re hwo e ra yɛn. Ma sege barê yey hom wɛt, ko ma ra pyɛ de ma ga kana tɛ̀ e yey hom. 15Ko e gwong gwining o, a remo, ma sé tɛ̀ e yey na me tɛ̀ nerat e ra bemât Yɛrusalɛm na BeYuda, ko mê sege barê yey hom arɔng wɛt. Yaga ano, yin vo bengyip wɛt! 16Ko yin pyɛ́ de yin ê ra à yemo: Há in a bemin tsak o, gas in badu e tē e beduk shɔt min, yaga na yin a sangal tyang. 17Yin yong begwong de bê mǎ bemin wɛt. Yin sira hin na bɔs e jeng nɔ̂ng nuha wɛt. Me kyɛ́ me ra ano zakzak.”
18Dagwi Darwey, Dâ Jey Mwa a to ha a me ha hemo, a ye, 19“À yin BeYuda, tik in rê pyɛ́ de yin e ragas e pwɛl gwo nenaas, na gwo netungun, na gwo netaama na gwo kuru, ha rɔda tɛ́ ɛ nzem yey pyɛng, jeng sesin ya rɔda tɛ́ ɛ jeng rɛɛ na râ biibi. Yaga ano, simo hin hâ tsak o, na sangâl netyang.
20“Jeng ya sé kyè vey de bemat yi e bapomo e kawɛ bak ba rɔda vey e Yɛrusalɛm. 21Vemo de ba yi e repomo remo ba rɔda wɔ sɛ̀ vê repomo rere, bê yang ɛn, ‘Wot a sé kyè wɔ̀ ra won na Dagwi Darwey, Dâ Jey Mwa, na a tɛ̀ a wot nerat.’ Ko yɛn ê ye, ‘Ey, wot ê vey!’ 22Ko bemat pyak yi e yére bemât jey de ya vɔk reto sizɔng ya rɔda vey ra won na yɛ, na a tɛ̀ a yɛn nerat. 23E negasi nane, bemât yére dyuk pyak ba rɔda ba sɛ̀ WoYuda gwining, bê kaba hɛ gak, bê yang ɛ, ‘Wot e simo, hwo tik ot, na wot a raa hwo, yaga wot a wok, Dagwi a sé tanga yin!’ Me Dagwi Darwey, Dâ Jey Mwa ma ha ano.”
Currently Selected:
Zɛkarya 8: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
