Markus 6

Bemât Nazarɛt ba kyɛ́ ɛn Yɛsu

(Mat 13:53-58; Luk 4:16-30)

1Yɛsu a tik Kafarnahum, ko a kyè vɔk e repomô lɔ mɛ. Bemât masâ fwom mɛ ba raa hɛ. 2Sede Tuk Shábat ha vey, a yel e duk re fongol mɛn, ko a hwo basa a yɛn. Bemat pyak de ba wok ɛ ba langat hɛn, ba tē, “Mwat womo a tɔk pyɛ́ yemo mwa yi e gwa ano arɛt? E wà de a basa a yɛ pyɛ́ yemo de e ra mɛ̀ pyɛ̂ bes ano arɛt? 3À besa! E mwât yɛ̂t cɔ́gɔt a womo wɛt arɛt? Yɛ a sé hwêy Marya wɛt a? Begwa mɛ, à Yakɔp, na Yoses, na Yuda, tanga Simɔn wɛt a? Bepolgwo mɛ ba sé na sangal e ngamo wɛt arɛt?” Yaga ano, yɛn a kyɛ́ ɛn hɛ.

4Ko Yɛsu a yang ɛn, “Bemât mwa be nɔngɔ̂s zarap Dagwi nerey; sɛ̌ bemât repomo mɛ, na cáng mɛ, tanga belɔ mɛ be nɔngɔs hɛ nerey wɛt.”

5A tɔk ra pyɛ̂ bes e repomô lɔ mɛ yɛt wɛt, ko a tɛ̀ vɔ mɛ e ra bemât serɔ tyɔng zɔng, na a tɛ̀ ɛn tyang. 6A langat hɛ sizɔng, yaga yɛn a tɛ̀ gap mɛn e ra yɛ wɛt.

E bama mo, Yɛsu a kyě kyè e ji nebapomo, a kyě basa a bemat.

Yɛsu a tomo bemât masâ fwom mɛ

(Mat 10:5-15; Luk 9:1-6)

7A yishi bemât masâ fwom mɛ kuru na vɛ beba e dem hining, yaga na a tomo hɛn bibeba. A nɔng ɛn retô paà cēng, 8ko a yang ɛn, “Yin jut pyɛ cak yaga kwɛngɛl o wɛt sɛ̌ gwele zɔng. Yin vɔk kpam-tuk, kɛ malâ won, kɛ dyām e berabak min wɛt. 9Kyè in na bekpatak, ko yin to gwɛ̌ gworugu gwohwak wɛt.” 10Ko a to yang ɛn, “Kahɛ lɔ de yin ê gyirik ɛ̀, sangal hin e lɔ mo sɛ̌ jeng de yin e ba sogo. 11Ka sede yin a pom e kwɔn hak de bemat o ba sey in wɛt, kɛ ba wet betong na yin wɛt, ko pagat hin búm de gwa dyɛng e bol min, na yin a nusu hin. Hane hê sè túsa vɔk na yɛn!”

12E bama mo, bemât masâ fwom mɛ ba nusu, ko yɛn a kyè wɔ̀ shara a bemat wɔgɔ, yɛn a doyo yi e banɛn mɛn. 13Yɛn a paa cēng pyak, ba shushu vê serɔ pyak na něy arɔng, ko ba tɛ̀sɛ hɛn tyang.

Rekû Yohana wo batisma

(Mat 14:1-12; Luk 9:7-9)

14Gbɔng Gwɔ̀m Herodes a wok rehâ pyɛ́ yemo mwa, yaga rehâ Yɛsu rá kana shara hɛ e kahɛ kwɔn. Bemat behak ba tē, “Ba ga to sene Yohana wo batisma yi e reku! Pyɛ ma yemo de ya tɛ̀, a vɔk reto na a ra mɛ̀ pyɛ̂ bes yemo.”

15Behak kwong ba tē, “A sé e Eliya.” Ko behak ba tē, “Yɛ a sé zarap Dagwi, sede hwak e ji bezarap Dagwi vê raane.”

16Ko sede Herodes a wok ano, a ye, “Yaa kukuuk! A sé e Yohana de ma kana tɛ̀ be tùt rato mɛ, ko a to sé na neken!”

17Yaga yɛ pyɛ mɛ á kana tɛ̀ be vo Yohana, be rɔgɔs hɛ, na be tɛ̀ ɛ e lɔ̂ ngyang. Retîn pyɛ de ya tɛ̀ a ra ano a ret ngan: Á kana jut hwâ gwa mɛ Filip, ko a ra weneng mɛ. Ba tâng hwā mo, à Herodyas. 18Ko Yohana a tâng Herodes, “A sé tyɛng de hwà jut hwâ gwa mō e weneng wɛt!”

19Ko Herodyas a hwo bɛɛ Yohana ves, a simo na be mɔrɔ hɛ, ko a sɛ̀ gwong o wɛt, 20yaga Herodes o a wokos bengyip Yohana, yaga yɛ a tɔk, Yohana mo a sé mwat rwat, ko a to sé mwât Dagwi. Yaga ano, a simo na pyɛ cak ye ra neken mɛ wɛt. Herodes a simo na a wokos há mɛ, mwa ano de a tang ɛ zii kayɛ jeng de a wok há mɛ mo.

21E yɛnɛ mo, Herodyas a sɛ̀ gwông râ pyɛ cak. Sede tûk tɔ̂ Herodes ha doyo, ko a yong a bemɛn begwɔ̀m, na begwɔ̀m bemât como, tanga bedaberey sevwêl Galili pyɛ́. 22Jeng de yɛn a sé re pyɛ́, hwông Herodyas a yel, ko a rɛ̌ a yɛn. Rɛ́ɛ mo ha pɛngɛ a Herodes tanga vemo de ba sé e sangal tanga yɛ yey sizɔng. Ko gbɔng gwɔ̀m o a yang hwong o, “E sɛ́ de hwó simo na me nɔng o arɛt? Mê nɔng o kayɛ pyɛ de hwó simo.” 23Ko a sira a ye, “Ma rɔda nɔng o kayɛ pyɛ de hwô yang me, me nɔng o, mwa vɔk e rebit sevwel de me re ɛ̀ negwɔm!”

24Ko hwong o a nusu, a wɔ̀ rangâl neng mɛ, a ye, “E sɛ́ de mê ye, be nɔng me arɛt?”

Neng mɛ a ye, “Yē, be nɔng o ratô Yohana wo batisma.”

25Hwong o a to ɛ ziri vɔk na gbɔng gwɔ̀m o, ko a yang ɛ, “Me simo hwo nɔng me a remo ngan ratô Yohana wo batisma e ji bworo!”

26Yêy gbɔng gwɔ̀m o ya lashe hɛ ding-ding. Ko yaga sira de a ga kana ra e nuyêl bekɛnɛt mɛ, a tɔk ro na hɛ e yɛ wɛt. 27A pat gwining e ji bemât gyeng mɛ, a ha a yɛ a kyè ziri, na a wɔ̀ tùt ratô Yohana, na a vey mɛ̀. Mwat o a kyè, a wɔ́ e ji duk ngyang, ko a tùt rɛ. 28A vey na rɛ e ji bworo, a nɔ̂ng hwong o, ko hwong o kwong a wɔ̀ nɔ̂ng neng mɛ.

29Sede bemât masâ fwôm Yohana ba wok ano, ba wɔ́, ba jut rebek mɛ, ko yɛn a lɛrɛ rɛ e sak.

Yɛsu a nɔ̂ng beras gu batungun pyɛ̂ re

(Mat 14:13-21; Luk 9:10-17; Yoh 6:1-14)

30Betom Yɛsu ba vɛ̄ hɛn, ko yɛn a tula hɛn na yɛ. Yɛn a ha a yɛ yɛnɛ̂ pyɛ̂ mwa de yɛn a ga ra, na yɛnɛ̂ pyɛ̂ mwa de yɛn a ga basa. 31Bemat pyak ba sé vɛ̀sɛ, ko ba sé kyesem, ko Yɛsu na bemât masâ fwom mɛ ba tɔk sɛ̀ jeng rê pyɛ́ wɛt. Yaga ano, a yang ɛn, “Tik na wot a sogo vɔk e dem hak de wot ê sè nju mot, na yin a pɔnglɔ tyɔng.” 32Yɛn a yel e ji dwa-nshi zɔgɔ̂ hɛn, ko ba kyè vɔk e dem de vit a mwat.

33Mwa ano, bemat pyak ba di ɛn jeng de yɛn a sé kyè, ko yɛn a tɔk ɛn. Yɛn a nusu yi e bapomô mwa, ba tele e bol, ba raa rekwogom, ko ba tānga wɔ̀ ta e kwɔn o e ra BeYɛsu mo. 34Jeng de Yɛsu a nusu yi e dwa-nshi mo, a di gbɔng regyɛng bemat, ko a wok nemwishish mɛn, yaga yɛn a sé sede vyēl de ya vɔk lwek wɛt. Ko a hwo basa a yɛn pyɛ́ pyak. 35Sede gwi gwa ga vey bagât gaba, ko bemât masâ fwom mɛ ba vey na yɛ, ba yang ɛ, “Di, gwi gwa ga kyè, ko kwɔn hemo ha sé vit a mwat. 36Tɛ̀ bemat o e gwong, yaga na yɛn a kyè vɔk e bemajey na nebapomo de na sé bagat, na yɛn a wɔ̀ sey a bato mɛn pyɛ́ na be re.”

37Ko Yɛsu a toyo a yɛn, a ye, “Yin pyɛ min, nɔng in hɛn pyɛ cak na be re.”

Yɛn a ye, “Kée kàa! Dyām de wot e simo yê sè sede dyâm fwôm mwat yê pɛl rwit. Hwó simo na wot a wɔ̀ sey kpam-tuk na kǔs dyām yane, na wot a nɔng ɛn na be re arɛt?”

38Ko Yɛsu a rangal hɛn, a ye, “Yin a vɔk bāgat kpam-tuk ala e ngamo arɛt? Ci wɔ̀ di in.”

Jeng de yɛn a yi wɔ̀ di, yɛn a yang ɛ, “Batungun na betɔk beba.”

39Yɛsu a ha a bemât masâ fwom mɛ mo be tɛ̀ bemat be sangal bagyɛng o bagyɛng o, na be sangal e ra sɔng lwa. 40Bemat o ba tyɛngsɛ hɛn, behak ba tyɛngrɛ hɛn naga, ko behak kuru batungun. 41Ano, Yɛsu a jut bagat kpam-tuk vane batungun tanga betɔk beba, a tɛ̀ bayis mɛ vɔk e lagwi, ko a feng a Dagwi yaga pyɛ́ mo. A hwo kwɔrɔs bagat o, ko a nɔ̂ng bemât masâ fwom mɛ, na be gas a bemat. A to nɔng ɛn betɔk beba na yɛn a gas a yɛn arɔng. 42Yɛn mwa ba re, ba siris. 43Bwang o gwa pɔl, ko bemât masâ fwom mɛ ba sila sháp kuru na yɛ bya na cɛ̂k kpam-tuk tanga cɛ̂k betɔk. 44E ji bemat de ba re pyɛ́ mo, beras ba sé gu batungun (5,000).

Yɛsu a kyè e ra tɛ̂t nshi

(Mat 14:22-33; Yoh 6:15-21)

45E jeng o, Yɛsu a tɛ̀ bemât masâ fwom mɛ gbing-gbing be yel e ji dwa-nshi, na be ka kyè e nuyel mɛ vɔk e Bet-Saida de wa sé e gura gworo. Ko yɛ a ka tɛ̀ bemat e gwong. 46E bama de a ga yâng bemat kala, a tút vɔk e raku, na a wɔ̀ ra won. 47Jeng de nawiri na vey, dwa-nshi mo wa sé e tê gworep, ko Yɛsu a rɔngɔl e raku nju mɛ. 48A di bemât masâ fwom mɛ ba sé di reyɔm e ra gangâs dwa-nshi mo, yaga gul gwa gangas hɛn na bama. E rwa hwol gasi, a sé kyè wɔ na yɛn, a kyè e ra tɛ̂t nshi. A yě ye rɛng a hɛn, 49ko jeng de yɛn a di ɛ, a sé kyè e ra tɛ̂t nshi, yɛn a tē kɛ gyeng a sé e wovuvwel. Yɛn a dak sekun, 50yaga yɛn mwa ba di ɛ, ko ba wok bengyip sizɔng.

Yɛsu a vɛ̌ hanat na yɛn, a yang ɛn, “Vɔk in yey tiing! A sé me. Yin wok bengyip wɛt!” 51A yel e ji dwa-nshi mo na yɛn, ko gul o gwa ye ting. Bemat mɛ mo ba langat hɛn sizɔng, 52yaga yɛn a tɔk cap-hâ pyɛ bes wɛt, yemo de Yɛsu a kana ra e jeng de a tɛ̀ kpam-tuk wo gwɛ̌ hɛ, ko neyey mɛn na tɔk bare wɛt.

Yɛsu a tɛ̀sɛ bemât serɔ e Gɛnɛsarɛt tyang

(Mat 14:34-36)

53Sede yɛn a ye dɔ, yɛn a gyirik e yɛnɛ̂ sevwêl Gɛnɛsarɛt; e hwomo yɛn a rɔgɔs dwa-nshi mo na rekwogom. 54Jeng de yɛn a sé nunus yi e dwa mo, ko bemat pyak ba pere tɔk Yɛsu. 55Yɛn a yeles e ji yɛnɛ̂ sevwel o mwa na setele, ko ba vɛ̀sɛ na bemât serɔ e dyɛngɛ e ra becāre mɛn e kahɛ kwɔn de yɛn a wok a sé ɛ̀. 56Ko kahɛ kwɔn de Yɛsu a yel ɛ̀, kɛ e ji bapomo, kɛ nebapomo, kɛ bemajey, bemat ba lasha bemât serɔ e nekwɔn de bemat be tulsa hɛn ɛ̀. Ko yɛn a ra won na yɛ, ka a tik vê serɔ mo be ra nû gworugu mɛ zɔng. Ko mwa vemo de ba ra gwɛ, ba tɛ̀ tyang.

Currently Selected:

Markus 6: bomBI

Highlight

Copy