Markus 5

Yɛsu a tɛ̀ mwat de a vɔk cēng tyang

(Mat 8:28-34; Luk 8:26-39)

1Yɛn a wɔ̀ wul yɛnɛ̂ sevwêl BeGerasa de sa sé e gurâ Gworep Galili. 2Sede Yɛsu a sé nusu yi e dwa-nshi, ko mwat hwak a nusu yi e tara de be lɛsɛ ɛ̀ bavîn bemat, a man na yɛ. Mwat o a vɔk ceng e rato mɛ, 3ko kwɔ̂n sangal mɛ a hane de be lɛsɛ ɛ̀ bemat. Vit a mwat de a tɔk rɔgɔs hɛ na ngyang kwong wɛt. 4Ba kana rɔgɔs vɔ mɛ na bol mɛ na ngyang zang pyak, ko kayɛ jeng a tuyu ngyang o, ko a kwɔrɔs yemo de ya sé e bol mɛ. Vit a mwat de a to tɔk ra pyɛ cak na yɛ, yaga a vɔk gap sizɔng. 5Nagwi na naturuk, a kyě kyè e ji tara na beraku, a dopse dak sekun e hwomo, ko a yɛt rebek mɛ na beta.

6Sede a di Yɛsu yikyik, a yi na setele, a pom, a gaba e nuyel mɛ, 7ko a gbɔ na gbɔng fwɔ, a ye, “À Yɛsu, Hwey Dagwi De A Dal Na Reto Mwa! Hwó simo sɛ́ na me arɛt? Ma sé ra won na hwo e ji rezâ Dagwi, hwo tak a me reyɔm wɛt!” 8A ha ano, yaga Yɛsu á kana yang ɛ, “À ceng, nusu hwo yi e ji mwat womo!”

9Ko Yɛsu a rangal hɛ, a ye, “Be tang o, à wà arɛt?”

Mwat o a toyo a yɛ, a ye, “Be tang me, à Pyak — yaga wot a sé hyɔt!” 10Ko a ra won na Yɛsu ding-ding, de a pat yɛ̄ yi e yɛnɛ̂ sevwel sane wɛt.

11Kwarâ bezà rwey o gwa losho hɛ bagat e hwomo, gwa sé re sehwey e vwâ raku. 12Ko cēng o ya ra won na Yɛsu, ya ye, “Tomo hot vɔk e ji bezà, na hwo tik ot, na wot a wɔ̀ yel e ji vɛ.” 13Ko a tik yɛ̄. Cēng o ya nusu yi e ji mwat o, ko ya wɔ̀ yel e ji bezà mo. Kwara mo mwa de gwa sé sede gu baba (2,000) gwa hwo tele cidirang e vwak, gwa wɔ̀ gaba e ji gworep, ko nshi mo na vo gwɛ.

14Bemât gyeng bezà mo ba jut setele, ba wɔ̀ shara há mo e ji repomo tanga nebapomo arɔng. Bemat ba nusu, na be wɔ̀ di pyɛ de ya ga té. 15Jeng de yɛn a vey na Yɛsu, yɛn a di mwat de á kana vɔk cēng pyak e sangal. A ga bang ɛ na berugu, ko nehywɛ mɛ na ga to ɛn. Ko yɛn mwa ba wok bengyip. 16Vemo de bá kana di yɛn a ha a bemat o pyɛ de yá kana té na mwat o, na e ra bezà arɔng.

17Ko yɛn a wɔ̀ ra won na Yɛsu, na a hàla yɛnɛ̂ sevwel mɛn o.

18Jeng de Yɛsu a sé yel e ji dwa-nshi, mwat de á kana vɔk cēng a ra won na yɛ, a yang ɛ, “Mê tɔk kyè tanga hwo arɛt?”

19Ko Yɛsu a simo a yɛ wɛt, a yang ɛ, “Ci vɔk e lɔ na bemât lɔ mō, na hwo wɔ̀ ha a yɛn gbɔng pyɛ de Darwey a ga ra a hwo, na yerê toshô reyɔm de a ga dura a hwo arɔng.”

20Mwat o a kyè, ko a yel e ji bapomo kuru de ba tâng vɛ, à Dekapolis, a hwo shara rehâ gbɔng pyɛ de Yɛsu a ga ra a yɛ. Ko mwa bemat de ba wok ba langat hɛn.

Hwông Yairus na hwā de a ra gworugû Yɛsu

(Mat 9:18-26; Luk 8:40-56)

21Sede Yɛsu a wɔ̀ ye dɔ e gurâ gworep, gbɔng regyɛng bemat ra tula hɛ e hwomo e rekwogom na yɛ. 22Mwat hwak e ji bemât nuyêl duk re fongol mɛn de ba tang ɛ, à Yairus a hwo yi. Jeng de a di Yɛsu, a gaba e nuyel mɛ, 23a ra won na yɛ ding-ding, a ye, “Hwóng hom ê dal wɛt. Gabɔk wɛt, vey na hwo wɔ̀ tɛ̀ vɔ mō e ra yɛ, na a bin tɛ̀ tyang, na a dal kwong!”

24Yɛsu a kyè tanga yɛ, ko regyɛng bemat pyak arɔng ra raa hɛ, yɛn a ngyɔ hɛ.

25Ko hwā hwak a sé e hwomo de a sé tak reyɔm na serɔ̂ telê nemi neshey kuru na nɛ neba. 26Mwa ano de a kana kyě kyè mɛ̀ e nelɔ bevwoshon, a lashe dyām mɛ, a tɔk sɛ̀ netyang wɛt, ko serɔ mo sa gwɛsɛ hɛ zɔng. 27-28A kana wok rehâ Yɛsu, ko a hwo bare e yey mɛ, a ye, “Ka sede ma ra rugu mɛ zɔng, ko ma rɔda tɛ̀ tyang.” Yaga ano, a yel e ji bemat e bamâ Yɛsu. 29A niri, a ra gworugu mɛ, ko remo-remo, telê nemi mɛ mo ha tumal. A wok e ji rebek mɛ, a ga tɛ̀ tyang yi e serɔ mɛ mo.

30E ji jeng o, Yɛsu a vɛ̌ tɔk, ba ga ra fwom na reto mɛ remo de e ra mɛ̀ pyɛ̂ bes. Ko a doyo vɔk na bemat, a rangal hɛn, a ye, “E wà de a ra rugu hom arɛt?”

31Bemât masâ fwom mɛ ba ye, “Hm, yē wey ow! E ji nepyak bemat sede nemo ngan, ko hwó rangal, ‘E wà de a ra me arɛt’ a?”

32Ko Yɛsu a bɛrɛng, na a di mwat de a ga ra ano. 33Hwā mo a tɔk pyɛ de ya ga té na yɛ. A wok bengyip, ko a wɔ́ na yɛ na vôw rebek, a gaba e nuyel mɛ, ko a ha a yɛ tsak o mwa. 34Yɛsu a yang ɛ, “À hwóng hom, ba ga tɛ̀ o tyang, yaga hwà tɛ̀ gap mō e ra me wɔgɔ, mê tɔk tɛ̀ o tyang. Serɔ mō sê to toyo e ra hwo wɛt. Kyè tyang kala!”

35Jeng de Yɛsu a sé ha ano, bemat behak ba vey yi e lɔ Yairus, ko ba yang ɛ, “Hwóng mo a ga tala hɛ. Yaga sɛ́ de hwó nɔ̂ng Mwat Basa yɔ́m ano arɛt?”

36Yɛsu a tɛ̀ tong na pyɛ́ de yɛn a ha wɛt, ko a yâng Yairus, “Nemi ne gaba a hwo e yey wɛt! Tɛ̀ gap mō e ra Dagwi zɔng!” 37Ko a kyè; a tik na mwat hwak a raa hɛ wɛt sɛ̌ Bitrus, na Yakɔp, tanga gwa mɛ Yohana. 38Jeng de yɛn a pom e lɔ Yairus, Yɛsu a di bemat ba sê sesin, yɛn a sé dak sekun, ba sé gabsa. 39A yel e ji mo, a yang ɛn, “Yaga sɛ́ de yin e tosho, ko yin e gabsa arɛt? Hwōng o a ga ku wɛt, ko a sê nevwa zɔng!”

40Yɛn mwa ba hwo shɛgɛsh hɛ, ko Yɛsu a paa ɛn mwa e majey. A jut bemât masâ fwom mɛ vane betat tanga da na nêng hwong o, ko a yel na yɛn e duk de ba lasha ɛ̀ hwong o. 41A kaba hɛ na vwɔ, a yang ɛ, “Talita kumi”, wɔgɔ, “À hwong, ma yang o, sogo!”

42Remo-remo, hwong o a sogo, a hwo kyě kyè. A vɔk neshey kuru na nɛ neba. Jeng de pyɛ́ yemo ya té, yɛn a langat hɛn sizɔng. 43Ko Yɛsu a nɔng ɛn nu na gap, a yang ɛn, “Yin ha a mwat hwak pyɛ mo wɛt.” Ko a to yang ɛn, “Nɔng in hɛ pyɛ́ na a re.”

Currently Selected:

Markus 5: bomBI

Highlight

Copy