Markus 4

Gwɔrɔ-hâ mwât berê yére

(Mat 13:1-9; Luk 8:4-8)

1Yɛsu a to hwo basa a bemat e vwâ Gworep Galili. Regyɛng bemat pyak ra tula hɛ na yɛ, yaga ano, a yel e ji dwa-nshi, a sangal. Dwa mo wa sé e ji nshi, ko regyɛng bemat o ra sé e vwâ gworep e rekwogom. 2Yɛsu a misang a yɛn pyɛ́ pyak na gwɔrɔ-há detidetu, ko e ji basa mɛ a yang ɛn:

3“Wet in betong! Mwat hwak a nusu na a wɔ̀ bere yére. 4Jeng de a sé bere yére mo, cak ya gaba e tê gwong, ko benon ba vey, ba tɔng yɛ̄. 5Cak ya gaba e kwɔ̂n kusha, kwɔn de ha vɔk nefongol pyak wɛt. Yére mo ya tānga vungu, yaga kwɔn o ha vɔk nefongol yɛt wɛt. 6Ko jeng de gwi gwa vey e tē, gwa ta yɛ̄, ko ya hworok, yaga berinîs yɛ̄ bá kana yel yikyik e ji vwel wɛt. 7Cak ya gaba e kwɔ̂n serɔgɔ. Rɔgɔ mo ha ras, ko ha vo yɛ̄; yaga ano ya mara wɛt. 8Ko cak arɔng ya gaba e ji nefongol nerat. Ya vungu, ya ras, ya tɛ̀ yéneng, ko ba sɛ̀ pyɛ́ de ba bere zang kuru batat (30), cak kuru batyiimin (60), na cak naga (100) kwong.”

9E yɛnɛ mo, Yɛsu a yang ɛn, “Mwat de a vɔk betong, tik na yɛ a wok!”

Retîn gwɔrɔ-há mo

(Mat 13:10-17; Luk 8:9-10)

10Jeng de Yɛsu, na bemât masâ fwom mɛ kuru na vɛ beba, tanga bemat de ba raa hɛ bá sè nju mɛn, yɛn a hwo rangal hɛ, ba ye, “Misang a wot cap gwɔrɔ-há mo.”

11Yɛsu a hanat, a yang ɛn, “A sé e yin vɛ de ba nɔng in tɔ̂k pyɛ̂ neyaàng Segwɔm Dagwi. Ko vemo de be raa me wɛt bê wokos pyɛ̂ mwa yi e gwɔrɔ-há, 12yaga na,

“ ‘Yɛn a sǎ e de bɛrɛng, ko yɛn ê di pyɛ cak wɛt,

yɛn ê sǎ e de wokos, ko yɛn ê tɔk há mo wɛt.

Ka a sé ano wɛt, ka yɛn a yâng doyo vɔk na Dagwi,

na a hàla a yɛn banɛn mɛn!’ ”

Yɛsu a nɔng cap gwɔrɔ-há mo

(Mat 13:18-23; Luk 8:11-15)

13Yɛsu a rangal hɛn, a ye, “Yin a tɔk gwɔrɔ-há hemo wɛt arɛt? Ko e rɛ̌ de yin a rɔda tɔk bwang negwɔrɔ-há arɛt? 14Yére de mwât bere e bere ya sé rehâ Dagwi. 15E jeng cak, reha mo re gaba e tê gwong. A sé sede bemat de be wok rɛ, ko e ji jeng o, Shetan e vey, ko e hashe reha de ba ga bere e ji neyey mɛn. 16Bemat behak ba sé sede yére de ya gaba e ra kusha. Jeng de be wok reha mo, remo-remo, yɛn e sey rɛ na yey pyɛng. 17Ko re tɛ̀ berinis e ji mɛn wɛt, yɛn e pɔl ɛ̀ ba wɛt. Jeng de reyɔm re vey, kɛ be hwo tak a yɛn reyɔm yaga reha mo, ko remo-remo, yɛn e to ɛn na bama. 18Bemat behak arɔng ba sé sede yére de ya gaba e ji serɔgɔ. Yɛn à vemo de be wok reha mo, 19ko bɔrɔ̂k pyɛ̂ jey, na netâ yas, tanga marâ yis e ra pyɛ́ detidetu ye vo reha mo, ko re mara wɛt. 20Ko bemat behak kwong ba sé sede yére de ba bere e ji nefongol nerat. Yɛn e wok reha, yɛn e sey rɛ, be ra mɛ̀ fwom naka sede yére de ya tɛ̀ zang kuru batat, cak kuru batyiimin, ko cak naga arɔng.”

Kywa-kya de ba ye gup na kwɛt

(Luk 8:16-18)

21Yɛsu a to yang ɛn, “Mwat de a ga tɛ̀ kya e kywa-kya mɛ, na a yel mɛ̀ e duk a rɔda ye gup a wɛ na kwɛt, kɛ ê tik wɛ e nɛ̂n gwat arɛt? Kée wey! Ê jāma kwɔn de ha sé garang, na a tik ɛ̀ wɛ. 22Mwa pyɛ́ de ba ga kana lɛrɛ yɛ̄, ba rɔda ba nusu na yɛ̄ e jey wɛshɛrɛk, ko mwa pyɛ́ de ba ga kana bang yɛ̄, ba rɔda ba wunta yɛ̄ dɛdɛrɛng. 23Mwat de a vɔk betong, tik na yɛ a wok!”

24A yang ɛn kwong, “Tē in naka na pyɛ́ de yin e wokos! Shǐ hemo de yin e masa mɛ̀, e hɛ de Dagwi a rɔda ba masa a yin mɛ̀, ko a gwɛ̌ a yin ɛ̀ kwong. 25Mwat de a vɔk pyɛ cak, ba rɔda gwɛ̌ a yɛ. Ko womo de a vɔk pyɛ wɛt, ba rɔda sey ɛ̀ yi na yɛ kepyɛ de a vɔk.”

Gwɔrɔ-há e ra yére de ye ras

26Yɛsu a to yang ɛn, “Segwɔm Dagwi sa sé sede ngan: Mwat hwak e bere yére e cap. 27Nagwi na nabwalak, e sogo, e to dyɛng, ko yére mo ye vungu, ye ras, kɛ e rɛ̌, yɛ a tɔk wɛt. 28Vwel pyɛ hɛ he tɛ̀ pyɛ́ ye ras, na ye mara: E mɛsɛng o, ye tɛ̀sɛ mapak, e bama mo, ye tɛ̀sɛ bato, ko e yɛnɛ mo, ye tɛ̀sɛ yéneng. 29Jeng de ye vel, ko e wɔ̂ yɛt o, yaga bwal gwa ga vey.”

Gwɔrɔ-há e ra keyenêng mastat

(Mat 13:31-32, 34; Luk 13:18-19)

30A to rangal hɛn, “Wot ê ye, Segwɔm Dagwi sa sé sede sɛ́ arɛt? E hɛ̌ gwɔrɔ-há de wot ê sɛ̀ na wot a misang mɛ̀ arɛt? 31Sa sé sede ngan: Mwat hwak a jut keyenêng mastat, ko jeng de a tus kɛ, ka dal bwang yére mwa e jey na nesɛl. 32Ko e bama mo, ke ras, ko ke tɛ́ ɛ kerey o, ke dal bwang batîn berang de be tus e ji bwi. Ke kak nelang nerey o nemo de benon be tɔk yís, na be lɔkɔs barɛngɛ mɛn e ji necam o.”

33Ano kwong, Yɛsu a shara a bemat reha mɛ, a ha a yɛn na gwɔrɔ-há pyak sede hemo; a ha a yɛn tyɛng na tɔ́k mɛn. 34A ha a yɛn sana gwɔrɔ-há wɛt, ko jeng de a to ɛ e bak gwining na bemât masâ fwom mɛ, a misang a yɛn pyɛ̂ mwa de gwɔrɔ-há mo ha ha.

Yɛsu a tɛ̀ gwogul gwo tumal

(Mat 8:23-27; Luk 8:22-25)

35Tuk hane mo nahywegelek, Yɛsu a yâng bemât masâ fwom mɛ, “Tik na wot ye dɔ vɔk e gurâ gworep gworo.” 36Yɛn a tik regyɛng bemat, ko bemât masâ fwom mɛ ba wɔ̀ yel e dwa-nshi de Yɛsu á kana yel ɛ̀, ko ba jut ɛ tanga yɛn. Bedwa-nshi behak ba raa hɛn arɔng. 37Ko gwogul gwa nusu, gwa hwo pɛsɛl na gap, gwa hashe nshi e ji dwa mɛn o, ko bwang o tyɔng na wo sila na nshi. 38Yɛsu a sé e dyɛngɛ e bamâ dwa-nshi, a tik rato mɛ e ra mâ tikîs rato e de nevwa. Ko bemât masâ fwom mɛ ba shina hɛ, ba yang ɛ, “À Mwat Basa, hwà di, wot a sé ye pyɔp, ko hwó ka sap wɛt a?”

39Yɛsu a sogo, a gyong gwogul o, a yâng gwɛ, “Tumal!” Ko a yâng nshi, “Sǎ yaang!” Gwogul o gwa ye tiing, ko kwɔn o ha ye yuu tyɔng wɛt. 40E bama mo, Yɛsu a rangâl bemât masâ fwom mɛ, a ye, “Yaga sɛ́ de yin a vɔk bengyip ano arɛt? Ko sɛ̌ vey e jeng yemo yin a ka tɛ̀ gap min e ra me wɛt arɛt?”

41Ko yɛn a wok bengyip sizɔng, ba hwo tâng bemɛn, “Kée! E wɛ̌ mwat a womo de gwogul na gworep be gyeng há mɛ arɛt?”

Currently Selected:

Markus 4: bomBI

Highlight

Copy