Markus 3

Mwat de vwɔ mɛ gwa gyɔt

(Mat 12:9-14; Luk 6:6-11)

1Yɛsu a to wɔ̀ yel e duk re fongol, ko mwat hwak á sè e hwomo de vwɔ mɛ gwa gyɔt. 2Bemat behak ba simo na be sɛ̀ pyɛ cak e ra Yɛsu, na be wɔ̂ sekun mɛ. Yaga ano, yɛn a bɛrɛng hɛ naka, na be di, kɛ gyeng ê tɛ̀ ɛ tyang e Tuk Shábat. 3Yɛsu a yâng mwat de vwɔ mɛ gwa gyɔt, “Sogo, na hwo vey e tē.” 4Ko a rangâl bemat o, a ye, “Badu mot ba simo a wot na wot a ra sɛ́ Tuk Shábat arɛt? Wot a ra pyɛ ryat kɛ pyɛ vyes arɛt? Wot a sey nekên mwat, kɛ wot a wey na nɛ arɛt?”

Ko yɛn a sǎ yuu. 5Jeng de Yɛsu a gwɔrɔ na bayis, na a bɛrɛng hɛn, a wok shom, ko a lashe yey mɛ, yaga neyey mɛn na sé kashalang. A yâng mwat o, “Nára vwɔ mō!” A nára gwɛ, ko gwa to tɛ́ ɛ gyat. 6BeFarisi ba nusu, ko ba pere wɔ̀ wuna nu na bemât raà Herodes, na be jāma begwong de bê wey na Yɛsu.

Regyɛng bemat e vwarâ gworep

(Mat 4:23-25; Luk 6:17-19)

7Yɛsu tanga bemât masâ fwom mɛ ba kyè vɔk e Gworep Galili; ko regyɛng bemat pyak ra raa hɛ. Behak ba yi e bavwêl Galili na Yudiya, 8behak yi e gbɔng repomô Yɛrusalɛm, behak yi e sevwêl Idumiya, behak kwong yi e gurâ Rɔt Yɔrdan, na yi e nebapomô vara de na sé bagat na bapomô Tur tanga Sidɔn. Bemat o ba vey na Yɛsu, yaga yɛn á kana wok pyɛ̂ mwa de á ra. 9Yɛn a wɔ́ vɛt, ko Yɛsu a ha a bemât masâ fwom mɛ, be tik a yɛ kedwa-nshi bagat, yaga na bemat be kwon ngyɔ hɛ wɛt. 10A ga kana tɛ̀sɛ bemat pyak tyang, ko vemo de ba vɔk nezap nerɔ detidetu ba bang ɛn e ra yɛ, na be bin ra ɛ. 11Ko jeng de bemat de ba vɔk cēng ba di ɛ, yɛn a gaba e nuyel mɛ, ba gbɔ, ba tē, “Hwo wɛ hwà sé Hwey Dagwi!”

12Ko Yɛsu a nɔ̂ng cēng o nu na gap, a ye, “Yin ha a bemat mwat de me ma sé wɛt.”

Yɛsu a kasa betom kuru na vɛ beba

(Mat 10:1-4; Luk 6:12-16)

13E bama mo, Yɛsu a tút vɔk e raku, a yishi bemat de e simo, ko yɛn a vey na yɛ. 14A kasa kuru na vɛ beba, ko a vo a yɛn rezâ Betom. A yang ɛn, “Ma ga kasa hin na yin a sǎ tanga me. Ko ma rɔda tomo hin, na yin a shara Yɛgɛt Yat, 15yin a rɔda vɔk reto na yin a paa cēng.”

16Bemat kuru na vɛ beba ma vemo de a kasa: Simɔn, de Yɛsu a vo a yɛ rezâ Bitrus; 17na Yakɔp tanga gwa mɛ Yohana, nèy Zɛbɛdayus, de Yɛsu a tâng nɛ, à Bɔwanɛrgɛs wɔgɔ, “yɛn e lulum sede gbara”, 18na Andarawus, na Filip, na Bartɔlɔmayus, na Matayus, na Tomas, na Yakɔp Alfayus, na Tadayus, na Simɔn, de á sè e yong ɛ na a dul sevwel mɛ, 19tanga Yuda Iskaryot, womo de a row Yɛsu e yɛnɛ mo.

Yɛsu na Baal-Zɛbul

(Mat 12:22-32; Luk 11:14-23; 12:10)

20E bama mo, Yɛsu a yel e lɔ hak. Regyɛng bemat o ra to wɔ̀ tula hɛ e hwomo, yaga ano, Yɛsu na bemât masâ fwom mɛ ba ka tɔk sɛ̀ jeng rê pyɛ́ wɛt. 21Jeng de bemât lɔ mɛ ba wok ano, yɛn a nusu na yɛn a wɔ̀ vo ɛ, yaga bemat ba tē, “E tē how!”

22Bemât basâ Badu behak de ba yi e Yɛrusalɛm ba tē, “A vɔk Baal-Zɛbul e rato mɛ! A sé e gwɔ̀m cēng de e nɔngɔs hɛ reto na a paa mɛ̀ cēng!”

23Ko Yɛsu a hwo yishi hɛn, a misang hɛn na gwɔrɔ-há, a ye, “Yi e rɛ̌ de Shetan ê tɔk pat tó mɛ arɛt? 24Ka sede sevwel sa gas ɛ, na se tó como na tô sɛ, ko sa rɔda lashe hɛ. 25Ka sede lɔ ha gas ɛ, na he tó como na tô hɛ, ko lɔ mo hê gaba. 26Ko ka Shetan a yâng sé tó como na tó mɛ, ka a yâng ros wɛt, ê gaba, ko yɛnɛ mɛ à hane.

27“Vit a mwat de ê tɔk yel e lɔ mwât gap na a hashe pyɛ́ mɛ, sɛ̌ a tānga rɔgɔs mwât gap o e ngyen. Ano, ê tɔk hashe pyɛ́ mɛ.

28“Tsak o mwin me ha a yin: Dagwi ê tɔk hàla a bemat yére banɛ̂n mwa de yɛn e ragas, na mwa yére há ves de be ha e ra yɛ. 29Ko a rɔda hàla a mwat de a ha há ves e ra Gabik Jɛrɛ ko tyɔng wɛt, yaga yɛ a ga ra renɛn neshey gbak-gbak.” 30Yɛsu a ha ano yaga ba ye, “A vɔk ceng.”

Nêng Yɛsu na begwa mɛ

(Mat 12:46-50; Luk 8:19-21)

31E jeng o, nêng Yɛsu na begwa mɛ ba hwo pom. Yɛn a tumal e majêy lɔ mo, ko yɛn a tomo be yila hɛ. 32Bemat pyak ba sé e sangal tanga Yɛsu, ba gwɔrɔ hɛ, ko ba yang ɛ, “Di, neng mō na begwa mō ba sé e tumal e majey, be jāma hwo.”

33Yɛsu a hanat a ye, “E beva, à neng hom na begwa hom arɛt?” 34Ko a bɛrɛng bemat mwa de ba gwɔrɔ hɛ, a ye, “Di, neng hom na begwa hom à vemo! 35Kawɛ mwat de e ra pyɛ de Dagwi e simo, e yɛ wɛ de a sé gwa hom na neng hom arɔng.”

Currently Selected:

Markus 3: bomBI

Highlight

Copy