Markus 2

Yɛsu a tɛ̀ mwât gbɛrɛ̂k nedem tyang

(Mat 9:1-8; Luk 5:17-26)

1E bamâ nepɔlɔ tyɔng, Yɛsu a to ɛ vɔk e Kafarnahum, ko há ha shara hɛ wɔgɔ, á wane e lɔ. 2Bemat pyak ba wɔ̀ tula hɛn e hwomo sɛ̌ vit a kwɔ̂n tumal, ko vit a kwɔn e majêy lɔ mo arɔng. Yɛsu a shara a yɛn rehâ Dagwi. 3Ko bemat behak ba vey a yɛ na mwat hwak de a vɔk serɔ̂ gbɛrɛ̂k nedem; bemat benaas ba jut ɛ dararing. 4Yaga nepyak bemat o yɛn a tɔk wɔ̀ wul na Yɛsu wɛt. Ano, yɛn a raa gwong vɔk e rak o, ko yɛn a kulu raduk tyɛng na kwɔn de Yɛsu a sé ɛ̀. Jeng de yɛn a tɛ̀ repɔk, yɛn a nára mwat o wɔ̀ gyirik na rik, mwa na gwocàre de yɛ a dyɛng ɛ̀. 5Yi ano, Yɛsu a di, yɛn a tɛ̀ gap mɛn e ra yɛ, ko a yâng mwât gbɛrɛ̂k nedem o, “À hwey hom, ba ga hàla a hwo banɛn mō.”

6Jeng de bemât basâ Badu behak de ba sé e sangal e hwomo ba wok há mo, ba hwo bare e neyey mɛn, 7“E rɛ̌ de mwat womo e ha ano arɛt? A jut tó mɛ tyɛng na Dagwi. Vit a mwat de e tɔk hàla banɛn sɛ̌ Dagwi nju mɛ zɔng!”

8Yɛsu a vɛ̌ tɔk pyɛ́ de yɛn a sé bare e neyey mɛn, ko a yang ɛn, “Yaga sɛ́ de yin a sé bare yerê pyɛ́ yane e ji neyey min arɛt? 9E hɛ̌ mo ha dal na be yâng mwât gbɛrɛ̂k nedem womo, ‘Ba ga hàla a hwo banɛn mō’, kɛ be yang ɛ, ‘Sogo, jut gwocàre mō, na hwo kyè!’ arɛt? 10Ko ma rɔda dura a yin, na yin a tɔk, Me de ma tɛ́ me mwat ma vɔk reto e ngamo e jey na me hàla banɛn.” Ko a yâng mwât gbɛrɛ̂k nedem o, 11“Ma yang o, sogo, jut gwocàre mō, na hwo kyè vɔk e lɔ!”

12E hwomo e bayis mɛn mwa, mwat o a sogo, a jut gwocàre mɛ, ko a nára hɛ. Mwa hɛn, a yang ɛn yɔɔt, ko ba nɔ̂ng Dagwi nerey, ba tē, “Kée! Wot a ga sang di pyɛ cak yerê yemo wɛt!”

Yɛsu a yila Levi

(Mat 9:9-13; Luk 5:27-32)

13Yɛsu a to ɛ vɔk e vwarâ Gworep Galili. Regyɛng bemat ra wɔ́ na yɛ, ko a hwo basa a yɛn. 14Jeng de a sé kwey, a di mwât seres dyâm yeles na pyɛ́, de ba tang ɛ, à Levi Alfayus e sangal e duk fwom mɛ. A yang ɛ, “Raa me.” Ko Levi a sogo, a raa hɛ.

15Jeng de Yɛsu a sé e sangal e kwɔ̂n rê pyɛ́ e lɔ Levi mo, pyak e ji bemât seres dyâm yeles na pyɛ́ na bemât negwɔn neves ba wɔ̀ sɛ̀ Yɛsu, ko yɛn a re pyɛ́ na yɛ tanga bemât masâ fwom mɛ. Bemat pyak sede vane bá sè raa hɛ. 16Bemât basâ Badu behak de ba sé BeFarisi ba di ɛ, a sé re pyɛ́ na bemât seres dyâm yeles na pyɛ́ tanga bemât negwɔn neves behak, ko yɛn a rangâl bemat mɛ, ba ye, “Yaga sɛ́ de yɛ e re pyɛ́ na yerê bemat vane arɛt?”

17Sede Yɛsu a wok ano, a yang ɛn, “Bemat de ba sé tyang be wɔ e lɔ vwoshon wɛt sɛ̌ bemat de be ro ɛn. Ma vey na me ba yila bemat berat wɛt ko vê banɛn.”

Rángal e ra tik rê pyɛ́

(Mat 9:14-17; Luk 5:33-39)

18E jeng cak, bemât raà Yohana wo batisma tanga BeFarisi ba tik rê pyɛ́ na be re a Dagwi fongol. Ko bemat behak ba hwo vey na Yɛsu, ba rangal hɛ, ba ye, “Yaga sɛ́ de bemât masâ fwôm Yohana tanga vê BeFarisi be tik rê pyɛ́, ko bemo be tik ano wɛt arɛt?”

19Yɛsu a toyo a yɛn, a yang ɛn, “A sé naka na besâ rwâs gwel be wusal hal arɛt? Kée wey! Sede remo de rwâs gwel a sé tanga yɛn, bê ra ano wɛt. 20Ko jeng ye kyè vey de ba rɔda ba jut rwâs gwel o yi na yɛn. E jeng o kwong, yɛn a rɔda ba tik rê pyɛ́.

21“Vit a mwat de ê ra fwom na cɛ̌k rugu pyas de ba rɔɔ nà kus, na a bang mɛ̀ revɔng rugu de gwa ga kwop. Ka sede a ra ano, ko cɛ̌k rugu pyas de a tɛ̀ yê gunung hɛ, yê gwɛ̌ hama rugu mo, yê tɛ̀ kwɔn o he tɛ́ ɛ rey o. 22Ko vit a mwat de ê tɛ̀ nshî anap de na rɔngɔl nà sogo e ji betsung de ba ga taksal. Ka sede a ra ano, jeng de nshî anap o na sogo, nê mɔrɔ betsung o, nê tele e vwel, ko betsung o arɔng bê lashe hɛn. Wey, bé shusha nshî anap de na rɔngɔl nà sogo e ji betsung de ba ga taksal wɛt.”

Rángal e ra Tuk Shábat

(Mat 12:1-8; Luk 6:1-5)

23Tuk Shábat hak, Yɛsu á sè kwey e ji hwirî alkama. Ko jeng de bemât masâ fwom mɛ ba sé e ji kwɛngɛl mɛn, ba hwo kwɔrɔs batô alkama mo. 24Ko BeFarisi ba hwo yâng Yɛsu, “Di, yaga sɛ́ de yɛn a sé ra pyɛ de Badu mot ba ro na be ra Tuk Shábat arɛt?”

25Yɛsu a toyo a yɛn, a yang ɛn, “Yin a ga ka basa pyɛ de Gbɔng Gwɔ̀m Davit à kana ra jeng de à jāma pyɛ́ na a re wɛt arɛt? Yɛ tanga bemat mɛ yɛn à wok vyong, 26ko à yel e duk Dagwi, à re kpam-tuk de bà nása e nuyêl Dagwi. E rà Badu mot, ba ro mwat hwak nà re kpam-tuk o sɛ̌ bepiris zɔng. Ko Davit à re wɛ, à to gas a bemat de bà sè tanga yɛ. Pyɛ yane yà té e jeng de Abiyatar à sè darwêy bepiris.”

27E yɛnɛ mo, Yɛsu a yang ɛn, “Bà tɛ̀ Tuk Shábat yaga mwat, ko bà yong mwat yaga Tuk Shábat wɛt. 28Ano Me de ma tɛ́ me mwat ma vɔk reto e ra Tuk Shábat.”

Currently Selected:

Markus 2: bomBI

Highlight

Copy