Markus 1

Basâ Yohana wo batisma

(Mat 3:1-12; Luk 3:1-18; Yoh 1:19-28)

1Mɛsɛ̂ng Yɛgɛt Yât Yɛsu Kristi, Hwey Dagwi, à yemo. 2Ya sé sede remo de Yɛshaya, zarap Dagwi, à kana jɛk e bwok-basa mɛ pyɛ de Dagwi à ha wɔgɔ,

“Di, tom hom à womo; ma sé tomo hɛ e nuyel mō,

na a yong gwong yaga hwo.”

3“Be wok fwɔ̂ mwat hwak gwo mok e hey, gwo tē,

‘Yóng in a Darwey gwong;

tɛ̀ in gwɛ tas, na a bin kwey ɛ̀!’ ”

4Há hemo ha sila jeng de Yohana á sè e hey, ko a tɛ̀sɛ a bemat batisma. A shara a yɛn reha wɔgɔ, “Doyo hin yi e banɛn min, na be tɛ̀ a yin batisma, yaga na Dagwi a hàla a yin banɛn min.” 5Bemât mwa yi e sevwêl Yudiya na bemât mwa yi e gbɔng repomô Yɛrusalɛm ba kyese na yɛ. Yɛn a kulsa banɛn mɛn, ko a tɛ̀sɛ a yɛn batisma e ji Rɔt Yɔrdan.

6Yohana á tɛ̀sɛ gworugu de bá yong na setôt maryat, á rɔgɔs gyindî rehwo e rawit mɛ, ko a re yɔ́rɔ na shok. 7A ha a bemat, a yang ɛn, “Mwat de e kyè vey e bama hom a dal me na reto. Ma ka vey na me ye kwot, na me viri batsɛ̂p bekpatak mɛ wɛt. 8Me tɛ̀sɛ a yin batisma na nshi, ko yɛ de e kyè vey a rɔda tɛ̀sɛ a yin batisma na Gabik Jɛrɛ.”

Batisma Yɛsu na setɔgɔs mɛ

(Mat 3:13—4:11; Luk 3:21-22; 4:1-13)

9E ji nepɔlɔ nane, Yɛsu a vey yi e Nazarɛt wo Galili, ko Yohana a tɛ̀ a yɛ batisma e ji Rɔt Yɔrdan. 10Jeng de Yɛsu a nusu yi e nshi, a di lagwi wa wunta hɛ, ko Gabik Jɛrɛ ha sé gyirik sede gwobɔp, ha hwo e ra yɛ. 11Ko fwɔ gwa yi e lagwi, gwa ye, “Hwà sé Hwêy yey hom, yey hom ya pɛngɛ na hwo sizɔng.”

12Ko remo-remo, Gabik Jɛrɛ ha gang ɛ vɔk e hey. 13A sangal e hwomo nepɔlɔ kuru banaas (40), ko Shetan a tɔgɔs hɛ na a ra banɛn. Ngyāma ya sé e hwomo arɔng, ko betom-lagwi ba nɔng ɛ pyɛ de e simo.

Yɛsu a yila bemât vôs betɔk benaas

(Mat 4:12-22; Luk 4:14-15; 5:1-11)

14Bama de ba ga tɛ̀ Yohana e ngyang, Yɛsu a wɔ́ e sevwêl Galili, a shara a bemat Yɛgɛt Yat yi na Dagwi. 15A yang ɛn, “Jeng ya ga vey de Dagwi ê kwɔk jut segwɔm e ra jey. Doyo hin yi e banɛn min, na yin a sey tsak o na Yɛgɛt Yat!”

16Jeng de Yɛsu a sé kwey e vwarâ Gworep Galili, a di bemât vôs betɔk beba, yɛ Simɔn na gwa mɛ Andarawus; ba sé vos betɔk e ji gworep na segun. 17Yɛsu a yang ɛn, “Raa me hin, ko ma rɔda masa a yin gwong de yin ê vɛ̀sɛ a me na bemat, tyɛng sede yin a sé vos betɔk a remo.” 18E ji jeng o, yɛn a pe hàla bagun mɛn, ko ba raa hɛ.

19Sede a gwɛ̌ kyè tyɔng vɔk e nuyel, a to di bemat beba, yɛ Yakɔp na gwa mɛ Yohana, nèy Zɛbɛdayus. Yɛn a sé e ji dwa-nshi, ba sé yong bagun mɛn. 20Remo-remo, Yɛsu a yishi hɛn; ko yɛn a tik da mɛn Zɛbɛdayus na bemât fwom mɛ e ji dwa-nshi mo, ko yɛn a raa hɛ.

Mwat de a vɔk ceng

(Luk 4:31-37)

21Yɛn a yel e ji repomo de be tâng rɛ, à Kafarnahum. Tuk Shábat, Yɛsu a yel e duk re fongol mɛn, ko a hwo basa a bemat rehâ Dagwi. 22Bemat o ba langat hɛn e ra gwong de a basa, yaga gwa sé detu na gwomo de bemât basâ Badu ba ra. Yɛsu a basa a yɛn na reto.

23E ji jeng o, mwat hwak de a vɔk ceng a yel e duk re fongol o, ko a hwo gbɔ, a ye, 24“À Yɛsu wo Nazarɛt, e sɛ́ de hwó simo hwo ra na wot arɛt? Hwà vey na hwo ba wey na wot a? Ma tɔk yerê mwat de hwà sé: Hwà sé mwât Dagwi de yɛ a tomo hɛ!”

25Ko Yɛsu a pat bayis e ra ceng o, a yâng yɛ, “Sǎ yuu! Nusu yi e ji mwat womo!”

26Ceng o ya digta mwat o na gap, ya dak sekun, ko ya nusu. 27A vɛ̌ yâng bemat o mwa kpɔrɔk, ko ba hwo tâng bemɛn, “Hàa! E sɛ́ a yemo ɛ? E yerê basa mo pas o hak a hemo a? Mwat womo e nɔngɔ̂s cēng nu yi na reto, ko ye wokos hɛ!”

28Ko há de ba ha e ra Yɛsu ha shara hɛ ziri e kahɛ kwɔn e ji sevwêl Galili.

Yɛsu a tɛ̀ gùna Bitrus na bemat behak tyang

(Mat 8:14-17; Luk 4:38-41)

29E bama mo, yɛn a nusu yi e duk re fongol, ko yɛn a bérem vɔk e lɔ Simɔn na Andarawus; Yakɔp na Yohana ba kyè tanga yɛn. 30Gùna Simɔn o á sè e dyɛngɛ pep-pep na bêk fes. Ko jeng de Yɛsu a yel e hwomo, bemat ba ha a yɛ, e ro ɛ. 31A wɔ́ na yɛ, a kaba vwɔ mɛ, ko a sogo hɛ. Bêk fes ha hàla hɛ, ko a yong a yɛn pyɛ́.

32Nawiri jeng de gwi gwa gaba, bemat ba vɛ̀sɛ na mwa bemât serɔ na yɛ tanga vemo de ba vɔk cēng arɔng. 33Mwa bemât repomo mo ba tula hɛn e nuyêl lɔ mo. 34Ko Yɛsu a tɛ̀sɛ bemât serɔ pyak tyang, vemo de ba vɔk nezap nerɔ detidetu, ko a paa cēng pyak. A tik yɛ̄, na ye ha wɛt, yaga ya tɔk mwat de yɛ a sé.

Yɛsu a basa e sevwêl Galili

(Luk 4:42-44)

35E rwa hwol rey, Yɛsu a sogo, ko a tik lɔ mo. A vɔk e dem de vit a mwat, ko e hwomo a ra won. 36Ko Simɔn na vemo de ba sé tanga yɛ ba nusu, ba wɔ̀ jāma hɛ. 37Jeng de yɛn a sɛ̀ ɛ, yɛn a yang ɛ, “Bemât mwa ba sé jāma hwo!”

38Ko Yɛsu a yang ɛn, “Tik na wot a vɔk e bapomo de ba sé bagat e ngamo, na me kyě basa e ji vɛ arɔng, yaga pyɛ ma yane de ya tɛ̀, ma vey.”

39A kyě kyè mwa e ji sevwêl Galili, a shara rehâ Dagwi e beduk re fongol, ko a paa cēng arɔng.

Yɛsu a tɛ̀ kparong tyang

(Mat 8:1-4; Luk 5:12-16)

40Kparong hwak a vey na Yɛsu, a ye guduruk, ko a ra won na yɛ, a ye, “Ka sede hwà simo, ko hwà vɔk reto na hwo tɛ̀ me tyang.”

41Yɛsu a wok nemwishish mɛ, a hanat, a yang ɛ, “Ey, me simo.” A nára vwɔ mɛ, ko a ra mɛ̀ mwat o, a ye, “Tɛ̀ tyang!” 42Remo-remo, sekwa mo sa hàla hɛ, ko a sɛ̀ netyang. 43-44E bama mo, Yɛsu a hwo pat bayis e ra yɛ, a yang ɛ, “Wok, hwo ha a mwat hwak pyɛ de ma ga ra a hwo wɛt! Ko nára hwo vɔk na piris, na a bɛrɛng rebek mō. E bama mo, nára nɔrɔ de Mose à kana nɔng nu e ra hɛ, na he dura a kawɛ mwat, hwà ga tɛ̀ tyang.” E yɛnɛ mo, Yɛsu a tɛ̀ ɛ e gwong, a yang ɛ, “Nára hwo.”

45Ko mwat o a nára hɛ, a vɛ̌ hwo bere reha mo ding-ding e kahɛ kwɔn. Ko há mo ha tɛ̀ Yɛsu a tɔk yel e repomo rehak gbey wɛt. A wusal e nedem de na sé vit a mwat. Ko bemat ba yís yi e nedem detidetu, ba kyè wɔ̀ sɛsɛm hɛ.

Currently Selected:

Markus 1: bomBI

Highlight

Copy