Matayus 28

Sene Yɛsu yi e reku

(Mar 16:1-10; Luk 24:1-12; Yoh 20:1-10)

1Sede Tuk Shábat ha kwey, ko tûk mɛsɛng e ji sati mo ha sé kyè wɔ̀ ye gbey, Marya wo Magdala na Marya hwak yɛn a kyè na be wɔ̀ di sak o. 2Remo-remo, vwel ha digis na gap ding-ding, yaga tom-lagwi hwak wo Darwey a gyirik yi e lagwi, a wɔ̀ biring gwofwa sak o vɔk e vwara, ko a sangal e ra tɛ̂t gwɛ. 3Tom o a sé sede gbara de wa ye dɛbɛt, ko berugu mɛ ba pɛngɛ pes sede toro pwɛng. 4Bemât gyêng sak o ba wok bengyip sizɔng, babek mɛn ba vow, ko ba pe gabsa e vwel sede bavin o.

5Ko tom-lagwi o a yâng beha mo, “Yin wok bengyip wɛt! Ma tɔk, yin a sé jāma Yɛsu de bá kak ɛ e ra cɔ́gɔt. 6A sé e ngamo wɛt, ba ga sene hɛ yi e reku, sede remo de á kana ha. Vey di in kwɔn de á dyɛng ɛ̀. 7Ko a remo, toyo hin ziri, na yin a wɔ̀ ha a bemât masâ fwom mɛ, ‘Ba ga sene hɛ yi e reku, ko a remo, a sé tānga kyè vɔk e sevwêl Galili na a wɔ̀ gyeng in. Yin a rɔda di ɛ e hwomo.’ Bàre hin na pyɛ de ma ga ha a yin.”

8Ano kwong, beha mo yɛn a hàla sak o dey-dey. Neyey mɛn na sila hɛn na bengyip, ko mwa ano, yɛn a vɔk yey pyɛng ding-ding. Yɛn a tele, ko ba wɔ̀ ha a bemât masâ fwom mɛ neha mo. 9Remo-remo, Yɛsu a man na yɛn, a yang ɛn, “Show in!” Yɛn a vey bagat na yɛ, yɛn a kaba bol mɛ, ko yɛn a re a yɛ fongol. 10Ko Yɛsu a yang ɛn, “Yin wok bengyip wɛt! Ko kyè in, na yin a wɔ̀ ha a begwa hom, be wɔ́ e sevwêl Galili. Yɛn a rɔda di me e hwomo.”

Hâ bemât gyêng sak Yɛsu

11Jeng de beha mo bá sè kyè kwɛngɛl mɛn, behak e ji bemât como de bá sè gyeng sak o ba to ɛn vɔk e ji repomo mo, ko yɛn a wɔ̀ ha a begbɔng bepiris kayɛ pyɛ de ya ga té. 12Yɛn kwong, yɛn a man na bemakuk, na yɛn a yong pyɛ de yɛn ê ra. Yɛn a nɔ̂ng bemât como mo dyām pyak, 13ko yɛn a yang ɛn, “Yē in ngan: ‘Bemât masâ fwom mɛ ba vey nabwalak, ba shigi revin o e jeng de wot á sè e de nevwa.’ 14Ka sede há mo ha wul fwông gwɔmna, ko wot ê ha a yɛ pyɛ de yê dyɛng nehywɛ mɛ, ko reyɔm rehak ra rɔda sɛ̀ in wɛt.”

15Ano kwong, bemât como mo ba sey dyām o, ko yɛn a ra pyɛ de ba misang a yɛn. Há hemo ha shara hɛ e ji BeYuda pere vey e yunung.

Rehâ Yɛsu vɔk na bemât masâ fwom mɛ

(Mar 16:14-18; Luk 24:36-49; Yoh 20:19-23; T.B.Yɛsu 1:6-8)

16Bemât masâ fwôm Yɛsu kuru na wɛ gwining (11) yɛn a kyè wɔ e raku e sevwêl Galili, e kwɔn de Yɛsu á kana ha a yɛn. 17Jeng de yɛn a di ɛ, yɛn a re a yɛ fongol, mwa ano de behak e ji mɛn ba tó yey na yɛ. 18Yɛsu a wɔ́ bagat na yɛn, ko a yang ɛn, “Ba ga nɔng me retô mwa e ji lagwi tanga e ji jey. 19Yaga ano, kyè in wɔ na yére bemat jey mwa, na yin a tɛ̀ ɛn be tɛ́ ɛn bemât raa hom. Tɛ̀ in a yɛn batisma e ji rezâ Da, na Hwey, na Gabik Jɛrɛ, 20ko basa hin a yɛn na be gyenges kayɛ pyɛ de ma ga nɔng in nu e ra yɛ. Mwin, ma rɔda sè tanga yin jojot vɔk e yɛnɛ̂ jey.”

Currently Selected:

Matayus 28: bomBI

Highlight

Copy