Matayus 27
27
Ba wɔ́ na Yɛsu e nuyêl Pilatus
(Mar 15:1; Luk 23:1-2; Yoh 18:28-32)
1Bop nagasi, mwa begbɔng bepiris tanga bemakuk yɛn a wuna nu mɛn na be wey na Yɛsu. 2Yɛn a rɔgɔs hɛ, ko yɛn a kyè na yɛ, ba wɔ̀ nára hɛ e vɔ Pilatus, de a sé gwɔmna de BeRoma ba tɛ̀ e hwomo.
Rekû Yuda
(T.B.Yɛsu 1:18-19)
3Sede Yuda, de a row Yɛsu, a di, ba ga yɛrɛ a Yɛsu shɔt reku, a tosho gabɔk, ko a wɔ̀ nɔ̂ng begbɔng bepiris tanga bemakuk dyām pyɛng kuru batat (30) de bá kana nɔng ɛ. 4A ye, “Ma ga ra renɛn, yaga ma ga nára mwat de a ra renɛn rehak wɛt, na be wey na yɛ.”
Yɛn a yang ɛ, “Sɛ́ mot ya sɛ́ ɛ? Pyɛ mō a yane.”
5Yuda a bomo a yɛn dyām o e hane e Gbɔng Duk Re Fongol, ko a kyè. E bama mo, a kyè wɔ̀ ta ngyɔt.
6Ko begbɔng bepiris yɛn a tɔng dyām pyɛng yane mo, ba ye, “Badu mot ba ro mɛ̀ na wot a tik dyām yemo e gban tikîs dyâm Gbɔng Duk Re Fongol, yaga ya sé dyām de ba row mɛ̀ mwat.” 7Yaga ano, yɛn a wuna nu mɛn, ko yɛn a yong ɛ̀ na be jut dyām o, be sey mɛ̀ cap mwât lɔk nerwèy, na ye tɛ́ ɛ kwɔ̂n lɛsɛ̂ bemat beduk de ba sé e ji repomo mɛn o. 8Yaga ano, vey e yunung, be tâng kwɔn o, à Cap Nemi.
9Hemo ha sila pyɛ de Yirmiya, zarap Dagwi, à kana ha wɔgɔ, “Yɛn a jut dyām pyɛng kuru batat, yɛ̄ à dyām de BeIsrayɛl ba simo na be tala e ra yɛ̀, 10ko yɛn a jut dyām o, na be sey mɛ̀ cap mwât lɔk nerwèy, sede remo de Dagwi á kana nɔng me nu.”
Pilatus a ra a Yɛsu nerangsal
(Mar 15:2-5; Luk 23:3-5; Yoh 18:33-38)
11Sede Yɛsu á sè tumal e nuyêl gwɔmna, ko gwɔmna mo a hwo rangal hɛ, a ye, “Hwo wɛ hwà sé Gbɔng Gwɔ̀m BeYuda arɛt?”
Yɛsu a toyo a yɛ, a yang ɛ, “Ey, hwà ha yɛt.” 12Ko jeng de begbɔng bepiris tanga bemakuk ba tɛ̀sɛ sekun mɛ, a hanat pyɛ cak wɛt.
13Ko Pilatus a yang ɛ, “Hwó wok neha nemo pyak de ba sé vɛ̀sɛ mɛ̀ e ra hwo wɛt arɛt?” 14E remo, Yɛsu a kyɛ́ ɛ nà to ha pyɛ cak, kɛ retîn há rining wɛt. Yaga ano, gwɔmna mo a langat hɛ sizɔng.
Ba yɛrɛ a Yɛsu shɔt reku
(Mar 15:6-15; Luk 23:13-25; Yoh 18:39—19:16)
15E jeng Nzem Gyilsit Nelɔ BeIsrayɛl, á sè negwɔn gwɔmna na a viri mwât ngyang gwining, womo de bemat ba simo na a viri hɛ. 16E jeng o, mwat hwak á sè e lɔ̂ ngyang de ba tɔk ɛ tyɔng wɛt yaga neves mɛ; ba tang ɛ, à Barabas. 17Jeng de regyɛng bemat ra tula hɛ, Pilatus a rangâl bemat o, a ye, “E wà de yin e simo me viri a yin arɛt? Yin e simo Barabas kɛ Yɛsu de be tang ɛ, à Kristi arɛt?” 18A rangal ano, yaga yɛ a tɔk, bemât nuyêl BeYuda bá kana nára Yɛsu e vɔ mɛ, yaga yɛn a wok repugu mɛ.
19E jeng de Pilatus á sè sangal e ra gwofwa mwât shɔt, hwā mɛ a tomo a yɛ na há hemo ngan: “Hwo kwon tɛ̀ vɔ mō e ra mwat wane de a ra renɛn rehak wɛt, yaga yunung ma ranas negwi neves e ra yɛ.”
20Begbɔng bepiris tanga bemakuk yɛn a tɛ̀ bemat be ye, yɛn e simo be viri Barabas, ko be wey na Yɛsu. 21Pilatus a to ha na bemat, a yang ɛn, “E wà de yin e simo me viri a yin e ji bemat beba vemo mo arɛt?”
Ko yɛn a ye, “Barabas!”
22A to rangal hɛn, a ye, “E sɛ́ kwong de yin e simo na me ra na Yɛsu de be tang ɛ, à Kristi arɛt?”
Yɛn mwa ba toyo a yɛ, ba ye, “Bē kak ɛ e ra cɔ́gɔt!”
23Pilatus a to rangal hɛn, a ye, “Ko e yɛ̌ pyɛ vyes de a ga ra arɛt?”
Ko yɛn a gwɛ̌ shusha gwolwɛlɛ, ba tē, “Bē kak ɛ e ra cɔ́gɔt!”
24Jeng de Pilatus a di, há mɛ hê tɔk sege pyɛ cak wɛt, ko a to di, e ji kejeng tyɔng yol ya rɔda sogo e hwomo, a ye, bē nɔng ɛ nshi, ko a kus vɔ mɛ e nuyêl regyɛng bemat o. A ye, “Pyɛ hom yê sè na rekû mwat womo wɛt! Pyɛ de yê té yê sè e vɔ min!”
25Ko mwa bemat o ba hwo ye, “Tik na nemi mɛ ne sè e ra bato mot, wot na nèy mot!”
26Ko Pilatus a viri a yɛn Barabas. Ano, a tɛ̀ be dak Yɛsu na zining, ko a nára hɛ e vɔ bemât como, na yɛn a wɔ̀ kak ɛ e ra cɔ́gɔt.
Bemât como ba shɛgɛsh Yɛsu
(Mar 15:16-20; Yoh 19:2-3)
27E bama mo, bemât comô gwɔmna ba wɔ́ na Yɛsu e lalâ lɔ gwɔmna, ko yɛn a yila bwang bemɛn, ba gwɔrɔ Yɛsu. 28Yɛn a paa a yɛ berugu mɛ, ko yɛn a tɛ̀ a yɛ gworugu gwoswinang. 29Ko yɛn a tsipta kpîn negwɔm na serɔgɔ, yɛn a tɛ̀ a yɛ e rato, ko ba to nɔng ɛ gwele e vwɔ yege mɛ. Yɛn a hwo tē guduruk e nuyel mɛ, ba shɛgɛsh hɛ, ba tē, “Nekên Gbɔng Gwɔ̀m BeYuda ne ros!”
30Yɛn a tulus hɛ na netey, yɛn a jut gwele mo, ko ba dak ɛ mɛ̀ e rato. 31Jeng de yɛn a tala shɛgɛsh hɛ, yɛn a pat gworugu gwane mo, ko yɛn a to tɛ̀ a yɛ berugu mɛ. Ko yɛn a nusu na yɛ, yaga na be wɔ̀ kak ɛ e ra cɔ́gɔt.
Ba kak Yɛsu e ra cɔ́gɔt
(Mar 15:21-32; Luk 23:26-43; Yoh 19:17-27)
32Sede bá sè nusu yi e ji repomo mo, yɛn a man na mwat hwak de á sè yi e Kirene, reza mɛ, à Simɔn. Ko bemât como yɛn a tɛ̀ ɛ gbing-gbing a wut cɔ́gɔt-kâk Yɛsu. 33Yɛn a wɔ̀ ta e kwɔn de be tâng hɛ, à Gɔlgɔta wɔgɔ, kwɔ̂n gwokup ratô mwat. 34E hwomo, yɛn a simo be nɔ̂ng Yɛsu nshî anap de ba wuna na hwal hwak de gwa sé kpashak. Ko e bama de a lɛlɛ nɛ tyɔng, a kyɛ́ ɛ nà sɔ nɛ.
35Ano, yɛn a kak ɛ e ra cɔ́gɔt, ko yɛn a ra cáca na be gas mɛ̀ berugu mɛ e bato mɛn. 36E bamâ hane, yɛn a sangal e hwomo na be gyeng ɛ. 37Ba jɛk pyɛ de ya tɛ̀ ba kak ɛ, ko ba tɛ̀ e ra rak rato mɛ wɔgɔ, YƐSU, GBƆNG GWƆM BEYUDA À WOMO. 38Yɛn a kak begbik beba arɔng tanga Yɛsu, gwining e vwɔ yege mɛ ko hwak e vwɔ mwɛlɛng mɛ.
39Bemat de ba kweres e gwong ba digis bato mɛn, ko ba tabas a Yɛsu nengyas, 40yɛn a tē, “E hwo wɛ, à mwat de hwá ye, hwô gangas Gbɔng Duk Re Fongol, na hwo to lɔk wɛ e ji nepɔlɔ netat, sey tó mo! Ka sede hwà sé Hwey Dagwi, gyirik yi e ra cɔ́gɔt o!”
41Ano arɔng, begbɔng bepiris, tanga bemât basâ Badu, na bemakuk ba shɛgɛsh Yɛsu, yɛn a tē, 42“Á seres bemat behak, ko e tɔk sey tó mɛ wɛt! Yɛ a sé Gbɔng Gwɔ̀m BeYuda wɛt arɛt? Ka sede yɛ a gyirik yi e ra cɔ́gɔt-kak a remo, ko wot a rɔda sey tsak o na há mɛ! 43Yɛ a tɛ̀ gap mɛ e ra Dagwi, ko a ye, yɛ a sé Hwey Dagwi. Yàa! Tik na Dagwi o a sey ɛ, sede e simo hɛ!”
44Ano arɔng, begbik beba vemo de ba kak ɛn tanga Yɛsu ba tabas a yɛ nengyas.
Rekû Yɛsu
(Mar 15:33-41; Luk 23:44-49; Yoh 19:28-30)
45Yi e jeng de gwi gwa vey e tē vɔk e dyām tyat nahywegelek, sevwel o mwa sa ye mwangalang. 46Sede e dyām tyat, Yɛsu a gbɔ na gbɔng fwɔ, a ye, “Eli, Eli, lama sabaktani?” Wɔgɔ, “À Dagwi hom, à Dagwi hom, yaga sɛ́ de hwà kyini me arɛt?”
47Bemat behak de ba sé e hwomo ba wok ɛ, ko ba ye, “A sé yishi Eliya!” 48Remo-remo, gwining e ji mɛn a tele, a jut sòso, ko a sing wɛ e ji nshî jwaatat. A tɛ̀ wɛ e ra gwocwang, ko a nára a Yɛsu wɛ e nu, yaga na a suyu.
49Ko bwang bemɛn ba ye, “Tik yaang, na wot a di kɛ Eliya mo ê vey, na a ba sey ɛ!”
50Ko Yɛsu a to gbɔ na gbɔng fwɔ, a hàla neken mɛ.
51Ko gworugû bâng duk e ji Gbɔng Duk Re Fongol gwa vɛ̌ vugu hɛ bebak o beba yi e rak o vɔk e retin o. E jeng o, vwel ha digis, ko beta ba taksal. 52Besak ba wuma hɛn, ko bemat pyak de ba ga kushu, vemo de bá kana raa Dagwi naka, ba sensa na neken, 53ko yɛn a nunus yi e ji besak o. E bama de Yɛsu a sene yi e reku, yɛn a wɔ̀ yel e ji Repomô Jɛrɛ, ko yɛn a dura a bemat pyak bato mɛn.
54Jeng de gbɔng o wo bemât como na bemât como mɛ de ba sé gyeng Yɛsu ba di de vwel ha digis, na mwa pyɛ́ de ya ga té, yɛn a wok bengyip sizɔng, ko yɛn a ye, “Mwin, mwat womo á sè Hwey Dagwi!”
55Beha pyak arɔng ba sé e hwomo, ba sé bɛrɛng yi e jey. Yɛn á kana raa Yɛsu yi e sevwêl Galili, ko yɛn a kyě sɛlɛ hɛ. 56E ji mɛn, à Marya wo Magdala, na Marya nêng Yakɔp na Yɔsɛf, tanga nêng nèy Zɛbɛdayus.
Lɛrɛ̂ Yɛsu
(Mar 15:42-47; Luk 23:50-56; Yoh 19:38-42)
57Sede nahywegelek na pom, darwey hwak yi e Arimatiya a vey. Ba tang ɛ, à Yɔsɛf, ko á sè mwât raà Yɛsu. 58A wɔ́ na Pilatus, a rangal hɛ na be nɔng ɛ revîn Yɛsu, na a wɔ̀ lɛrɛ. Ko Pilatus a nɔng nu be nɔng ɛ rɛ. 59Yɔsɛf a jut revin o, ko a hanas rɛ na gworugu gwopwɛng gworwat de gwa sé gwopwas o, 60ko a lɛrɛ rɛ e ji sak pas de a ga ta yaga tó mɛ e ji gwofwa. Ko a biring gwogbɔng gwofwa gwohwak, a tɛ̀ gwɛ gàk e rwi sak o, ko a kyè. 61Marya wo Magdala tanga Marya hwak yɛn a sé sangal e hwomo, yɛn a sé bɛrɛng sak o.
Bemât gyêng sak Yɛsu
62Tuk het wɔgɔ, tuk de he raa tûk yông pyɛ́, begbɔng bepiris tanga BeFarisi ba wɔ̀ tula hɛn na Pilatus. 63Yɛn a yang ɛ, “À da, wot a bare, jeng de mwât kwɛlɛ̂ng bemat wane á sè rɔngɔl na neken, á ye, ‘E bamâ pɔlɔ tat, ma rɔda to sene yi e reku.’ 64Yaga ano, nɔng nu, na be gyeng sak o naka sɛ̌ nepɔlɔ netat na sila. Ka ano wɛt, gyeng rɔ̌ bemât masâ fwom mɛ ba rɔda wɔ, na be shigi revin o, ko bê ha a bemat wɔgɔ, ba ga sene hɛ yi e reku. Ko kwɛlɛng hemo ha rɔda dal hê mɛsɛng na neves.”
65Pilatus a toyo a yɛn, a yang ɛn, “Ci in, jut in bemât como, na yin a wɔ̀ gyeng sak o naka-naka.”
66Ano kwong, yɛn a kyè, yɛn a wɔ̀ man gwofwa rwi sak o naka na tô gwɔ̀m, ko yɛn a tɛ̀ bemât como be gyeng sak o arɔng.
Currently Selected:
Matayus 27: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
