Matayus 4

Gwɔ̀m cēng a tɔgɔs Yɛsu

(Mar 1:12-13; Luk 4:1-13)

1E bama mo, Gabik Jɛrɛ ha kyè na Yɛsu wɔ e hey, yaga na gwɔ̀m cēng a tɔgɔs hɛ na a ra banɛn. 2E bama de a sangal e hwomo nepɔlɔ kuru banaas, naturuk na nagwi, sana re pyɛ́, a wok vyong. 3Mwât setɔgɔs o a vey, ko a hwo yang ɛ, “Ka sede hwà sé Hwey Dagwi, yâng beta vemo be tɛ́ ɛn kpam-tuk.”

4Ko Yɛsu a toyo a yɛ, a yang ɛ, “Bà jɛk e Bwok-basa Dagwi wɔgɔ,

“ ‘A sé e kpam-tuk zɔng wɛt de wô tɛ̀ mwat a sè kwen,

ko mwat e simo kahɛ há de Dagwi e ha.’ ”

5Ano, gwɔ̀m cēng a jut Yɛsu wɔ e Repomô Jɛrɛ Yɛrusalɛm, a tɛ̀ ɛ a tumal e ra tɛ̂t raduk Gbɔng Duk Re Fongol, 6a yang ɛ, “Ka sede hwà sé Hwey Dagwi, ko gyili vɔk e vwel. Yaga bà jɛk e Bwok-basa Dagwi wɔgɔ,

“ ‘Dagwi a rɔda nɔ̂ng betom-lagwi mɛ nu e ra hwo;

yɛn a rɔda vɔk o e ra vɔ mɛn,

yaga na hwo kwon tiri bwol mō e ra gwofwa wɛt.’ ”

7Ko Yɛsu a toyo a yɛ, a ye, “Bà to jɛk e Bwok-basa Dagwi wɔgɔ, ‘Hwo mara Darwey Dagwi mō wɛt.’ ”

8Gwɔ̀m cēng o a to jut ɛ vɔk e ra tɛ̂t gwogbɔng gworaku gwohwak, ko a dura a yɛ mwa neyɛnɛ̂ segwɔm detidetu e jey na gbɔng nerât nɛ mwa, 9a yang ɛ, “Mê nɔng o mwa pyɛ́ yemo, ka sede hwô gaba e nuyel hom, na hwo re a me fongol.”

10Ko Yɛsu a yang ɛ, “Kyè yi e ngamo, à Shetan! Bà jɛk e ji Bwok-basa Dagwi wɔgɔ,

“ ‘Rē a Darwey Dagwi mō fongol,

ko e yɛ nju mɛ zɔng de hwô ra a yɛ fwom.’ ”

11E bama mo, gwɔ̀m céng a hàla hɛ, ko betom-lagwi ba vey nɔng ɛ pyɛ de e simo.

Yɛsu a susu fwôm basa e Galili

(Mar 1:14-15; Luk 4:14-15)

12Jeng de Yɛsu a wok, ba ga tɛ̀ Yohana e ngyang, a kyè vɔk e sevwêl Galili. 13A hàla Nazarɛt, ko a wɔ̀ sangal e repomô Kafarnahum de ra sé bagat na Gworep Galili e yɛnɛ̂ bavwêl Zɛbulun na Naftali. 14A ra ano, yaga na a sila mɛ̀ pyɛ de Yɛshaya, zarap Dagwi, à kana ha wɔgɔ,

15“À hwo sevwêl Zɛbulun na hwo sevwêl Naftali

de yin a sé e gwong vɔk e gworep, e gurâ Rɔt Yɔrdan;

à hwo Galili de hwà sé sevwêl bemât yére dyuk!

16Bemat de ba sé sangal e ji lwīl

ba ga di gbɔng negbey,

ko e rà vemo de ba sé sangal e sevwêl reku de sa sé mwangalang,

negbey na ga ta e ra yɛn.”

17Yi e jeng o, Yɛsu a hwo basa a bemat, a tē, “Doyo hin yi e banɛn min, yaga jeng de Dagwi e lagwi a rɔda hwo re negwɔm e ra jey ya ga vey bagat.”

Yɛsu a yila bemât vôs betɔk benaas

(Mar 1:16-20; Luk 5:1-11)

18Jeng de Yɛsu á sè kwey e vwarâ Gworep Galili, a di bemât vôs betɔk beba, yɛ Simɔn de ba to tang ɛ, à Bitrus, na gwa mɛ Andarawus, ba sé bomo segun mɛn e ji gworep o. 19Yɛsu a yang ɛn, “Raa me hin, ko ma rɔda masa a yin gwong de yin ê vɛ̀sɛ a me na bemat, tyɛng sede yin a sé vos betɔk a remo.” 20E ji jeng o, yɛn a pe hàla bagun mɛn, ko ba raa hɛ.

21Sede a gwɛ̌ kyè tyɔng yi e hwomo, a to di begwa behak beba, yɛn à Yakɔp na Yohana, nèy Zɛbɛdayus. Yɛn á sè e ji dwa-nshi tanga da mɛn Zɛbɛdayus, bá sè yông bagun mɛn. Yɛsu a yila hɛn, 22ko remo-remo, yɛn a tik dwa-nshi mo na da mɛn, ko yɛn a raa hɛ.

Yɛsu a ra pyɛ́ detidetu

(Mar 1:39; 3:7-8, 10-11; Luk 4:44; 6:17-19)

23Yɛsu a kyě kyè e sevwêl Galili, a basa a bemat pyɛ́ e beduk re fongol, ko a shara a yɛn Yɛgɛt Yat e ra Segwɔm Dagwi. A tɛ̀sɛ kasɛ̌ serɔ na kayɛ pyɛ de ya tak a bemat reyɔm tyang arɔng. 24Reha mɛ ra shara hɛ vɔk e mwa sevwêl Sirya. Yaga ano, bemat o ba vɛ̀sɛ a yɛ na mwa vemo de ba ro ɛn na nerɔ detidetu, na vemo de ba tak reyɔm pyak: Vemo de ba vɔk cēng, na vemo de ba kushu cushu, tanga bemât gbɛrɛ̂k nedem, ko a tɛ̀sɛ hɛn tyang. 25Bagbɔng bagyɛng bemat ba raa hɛ: Behak ba yi e sevwêl Galili, behak yi e yɛnɛ̂ bapomo kuru de ba tâng vɛ, à Dekapolis, behak yi e gbɔng repomô Yɛrusalɛm, behak yi e sevwêl Yudiya, ko behak kwong yi e gurâ Rɔt Yɔrdan.

Currently Selected:

Matayus 4: bomBI

Highlight

Copy