Matayus 3

Basâ Yohana wo batisma

(Mar 1:1-8; Luk 3:1-18; Yoh 1:19-28)

1E jeng yane, Yohana wo batisma a pom e hêy Yudiya, ko a hwo shara a bemat rehâ Dagwi, 2a tē, “Doyo hin yi e banɛn min, yaga jeng de Dagwi e lagwi a rɔda hwo re negwɔm e ra jey ya ga vey bagat.” 3À sè e ra Yohana mo de Yɛshaya, zarap Dagwi, à kana ha e jeng de à ye,

“Be wok fwɔ̂ mwat hwak gwo mok e hey, gwo tē,

‘Yóng in a Darwey gwong;

tɛ̀ in gwɛ tas, na a bin kwey ɛ̀!’ ”

4Yohana a tɛ̀sɛ gworugu de bá yong na setôt maryat, a rɔgɔs gyindî rehwo e rawit mɛ, ko pyɛ̂ re mɛ ya sé yɔ́rɔ na shok. 5Bemat ba kyese na yɛ yi e Yɛrusalɛm, na yi e mwa sevwêl Yudiya, na yi e yɛnɛ̂ sevwêl mwa de sa gwɔrɔ Rɔt Yɔrdan. 6Yɛn a kulsa banɛn mɛn, ko a tɛ̀sɛ a yɛn batisma e ji Rɔt Yɔrdan.

7Jeng de Yohana a di BeFarisi na BeSaduki pyak ba sé kyè vey na yɛ, na a tɛ̀ a yɛn batisma, a yang ɛn, “À yin bègàbak! E wǎ de a ha a yin na yin a tele yi e shom de Dagwi a rɔda ra arɛt? 8Rá in yerê tomong de be dura, yin a ga doyo yi e banɛn min. 9Yin kwon bare, yin ê hywit in yi e shom o, yaga yin e tē, Abraham a sé da min. Ma sé ha a yin, Dagwi a vɔk reto na a tɛ̀ beta vemo be tɛ́ ɛn nèy Abraham. 10Ba ga kana tɛ̀ nû tyem e batîn cɔ́gɔt. Ko kayɛ cɔgɔt de ya tɔs nèy wɛt, ba rɔda tow yɛ, na be bomo yɛ e ji kya.

11“Me, me tɛ̀sɛ a yin batisma na nshi, yaga na wo dura, yin a ga doyo yi e banɛn min. Ko yɛ de e kyè vey e bama hom a dal me na reto. Ma ka vey na me vɔk a yɛ bekpatak mɛ wɛt. Yɛ a rɔda tɛ̀sɛ a yin batisma na Gabik Jɛrɛ tanga kya. 12A vɔk bworô bɛ̂m pyɛ́ e vwɔ mɛ na a bɛm mɛ̀ pyɛ́ mo mwa. A rɔda hashe yéneng o vɔk e gban mɛ, ko a rɔda tɛ̀ kya e byɛmɛ mo, yerê kya de he rimi hɛ ko tyɔng wɛt.”

Batisma Yɛsu

(Mar 1:9-11; Luk 3:21-22; Yoh 1:32-34)

13E jeng yane, Yɛsu a sogo yi e sevwêl Galili vɔk e Rɔt Yɔrdan, yaga na Yohana a tɛ̀ a yɛ batisma. 14Ko Yohana mo a jāma na a dul ɛ, a ye, “E me de me simo na hwo tɛ̀ a me batisma, ko hwo hwà vey na me arɛt?”

15Ko Yɛsu a yang ɛ, “Wot tik ɛ̀ ano a remo. A jam na wot a ra ano, yaga na pyɛ̂ mwa de Dagwi e simo ye té.” Ano kwong, Yohana a simo a yɛ.

16E bama de ba tɛ̀ a Yɛsu batisma mo, remo-remo a nusu yi e ji nshi mo. Ko lagwi wa wunta hɛ, ko a di Gabik Dagwi ha sé gyirik sede gwobɔp, ha hwo e ra yɛ. 17Ko fwɔ gwa yi e lagwi, gwa ye, “Hwêy yey hom a hemo, yey hom ya pɛngɛ na hɛ sizɔng.”

Currently Selected:

Matayus 3: bomBI

Highlight

Copy