Matayus 5
5
Yɛsu a basa a bemat e raku (Batin o vê 5 — 7)
1Sede Yɛsu a di bagyɛng bemat o, a tút vɔk e raku, ko a sangal e hwomo. Bemât masâ fwom mɛ ba vey na yɛ, 2ko a hwo basa a yɛn, a ye:
Tsak yey pyɛng
(Luk 6:20-26)
3“Vê yey pyɛng a vemo de ba tɔk, yɛn a sé bepɛng e ra pyɛ́ de ya sé yê Dagwi,
yaga yɛn a sé nèy vwel ne Segwɔm Lagwi!
4Vê yey pyɛng a vemo de neyey mɛn ne lashe hɛn,
yaga Dagwi a rɔda wɔrɔk hɛn!
5Vê yey pyɛng a vemo de be dyɛngɛs bato mɛn,
yaga Dagwi a rɔda nɔng ɛn jey na ye sè myɛn!
6Vê yey pyɛng a vemo de be simo tyɔng wɛt pyɛ́ de Dagwi e simo,
yaga a rɔda nɔng ɛn pyɛ́ mo shɛrɛk!
7Vê yey pyɛng a vemo de be wok nemwishish bemat,
yaga Dagwi a rɔda wok nemwishish mɛn arɔng!
8Vê yey pyɛng a vemo de neyey mɛn na sé haalal,
yaga yɛn a rɔda di Dagwi!
9Vê yey pyɛng a vemo de be tɛ̀ bemat be sangal tyang na bemɛn,
yaga Dagwi a rɔda tang ɛn, à nèy mɛ!
10Vê yey pyɛng a vemo de be tak a yɛn reyɔm, yaga yɛn e ra pyɛ́ de ya sé ryat e nuyêl Dagwi;
yɛn a sé nèy vwel ne Segwɔm Lagwi!
11“Yin a sé vê yey pyɛng jeng de bemat be dùsa hin, ko be tak a yin reyɔm, ko yɛn e ha neha neves detidetu ne bɔs e ra yin arɔng, yaga yin e raa me. 12Vɔk in yey pyɛng sedesi, yaga pyɔlɔ min ya rɔda ba sè pyak e lagwi. A sé e gwong gwining o de bà kana tak a bezarap Dagwi reyɔm, yɛn vemo de bà tānga vey e ra yin.”
Neha e ra nevwashe tanga negbey
(Mar 9:50; Luk 14:34-35; 11:33)
13“Yin a sé sede nevwashe yaga bemât jey. Ko ka sede nevwashe na tik tâ nɛ, e rɛ̌ de bê to tɔk tɛ̀ nɛ ne ta arɛt? E ngamo nuyel na to vɔk nerat yaga pyɛ cak wɛt. Yaga ano, be losho nɛ zɔng, na bemat be bɔrɔs nɛ.
14“Yin a sé sede negbey yaga bemât jey. Repomo de ba lɔk rɛ e ra tɛ̂t rahwol re tɔk sè e lɛrɛ wɛt. 15Ko vit a mwat de ê tɛ̀ kya e kywa-kya na a ye gup a wɛ na kwɛt. Ko ê tik wɛ e ra kwɔn de ha sé garang, ko wô nɔ̂ng kawɛ mwat de a sé e ji lɔ negbey. 16Ano arɔng, tik na negbey min ne lolo e nuyêl bemat, yaga na yɛn a bin di tomong min rat o, na yɛn a somo Da min de a sé e lagwi.”
Bása e ra Badu
(Luk 16:17)
17“Yin kwon bare wɛt wɔgɔ, ma vey, yaga na me gang Badu Mose tanga pyɛ́ de bezarap Dagwi bà kana basa a bemat. Ma ga vey, yaga na me gang vɛ wɛt, ko yaga na me sila vɛ. 18Mwin me ha a yin: Gyam na lagwi tanga jey be tala hɛn, vit a keretîn jɛk kɛ keyis kesɛl o ko kining de kê vuru hɛ yi e Badu mo, sɛ̌ ba sila kayɛ pyɛ e ngyen. 19Ano kwong, kawɛ mwat de e gyili redu de ra dal mwa na nesɛl, na a to basa a bemat be ra ano arɔng, a rɔda sè wo bamâ mwa e ji Segwɔm Lagwi. Ko kawɛ mwat de e raa mwa Badu mo, na a to basa a bemat be raa vɛ arɔng, a rɔda sè wo yel e ji Segwɔm Lagwi. 20Yaga ano, ma sé ha a yin, sɛ̌ gwong de yin e ragas pyɛ́ de Dagwi e simo gwa dal gwô bemât basâ Badu tanga BeFarisi, ko yin a rɔda yel e ji Segwɔm Lagwi ko tyɔng wɛt.”
Bása e ra mɔrɔ̂ mwat na wôk shom
21“Yin a ga wok pyɛ de bà ha a bemât raane wɔgɔ, ‘Hwo mɔrɔ mwat wɛt! Kawɛ mwat de a mɔrɔ mumwɛ, a jam na be ra a yɛ shɔt.’ 22Ko me ma sé ha a yin, kawɛ mwat de a wok shom na mumwɛ, ba rɔda ra a yɛ shɔt. Kawɛ mwat de a yâng mumwɛ, à tɔn, a jam na bemakûk badu be ra a yɛ shɔt. Ko kawɛ mwat de a yâng mumwɛ, ‘Hwà sé pyɛ cak wɛt!’ a jam na pyɔlɔ mɛ ye sè e kwɔ̂n kya. 23Yaga ano, ka sede hwà sé nára nɔrɔ mō e gàgbang rangâs yas vɔk na Dagwi, ko e hwomo hwà bare, gwà mō hwak a vɔk há hak na hwo, 24hàla nɔrɔ mō e hwomo e nuyêl gàgbang rangas o, ko tānga kyè na hwo wɔ̀ gang-nshi na gwa mō e ngyen. E bama mo, toyo, na hwo wɔ̀ nára nɔrɔ mō mo.
25“Ka sede mwat hwak a vey na há hak na hwo, na a wɔ̀ tɛ̀ kun mō e duk shɔt, ko yóng in há mo dey-dey jeng de yin a sé rɔngɔl tanga yɛ e gwong. Ka ano wɛt, ko a rɔda nára hwo e vɔ mwât shɔt; mwât shɔt o a rɔda to nára hwo e vɔ mwât fwôm gwɔ̀m, ko yɛ mo a rɔda tɛ̀ o e ngyang. 26Mwin me ha a hwo: Hwô nusu yi e hwomo wɛt, sɛ̌ hwà tala kakɛ kedyam de e rangal hwo.”
Bása e ra nejwang
27“Yin a ga wok pyɛ de bà ha wɔgɔ, ‘Hwo kwon ra nejwang wɛt!’ 28Ko me ma sé ha a yin, kawɛ mwat de a bɛrɛng hwā na a wok cwey mɛ a ga ra renɛ̂n râ nejwang na yɛ e yey mɛ. 29Ka sede reyis mō rê vwɔ yege re tɛ̀sɛ hwo na hwo ra banɛn, ko pat rɛ, na hwo bomo rɛ. A dal naka na hwo bidɛ dem hining hê rebek mō, de bê bomo rebek mō burang e kwɔ̂n kya. 30Ko ka sede vwɔ yege mō gwo tɛ̀sɛ hwo na hwo ra banɛn, kpɔktɔ gwɛ, na hwo bomo gwɛ. A dal naka na hwo bidɛ dem hining hê rebek mō, de hwô yel e kwɔ̂n kya na rebek mō burang.”
Bása e ra gâs weneng
(Mat 19:9; Mar 10:11-12; Luk 16:18)
31“Bà kana to ha wɔgɔ, ‘Kawɛ mwat de a ro hwā mɛ, a sé gbing-gbing na a nɔng ɛ bwok gâs weneng.’ 32Ko me ma sé ha a yin, kawɛ mwat de a ro hwā mɛ, sɛ̌ yaga á kana ra nejwang, a sé tɛ̀ hwā mo a ra nejwang, ka sede yɛ hwā mo a to ra weneng. Ko kawɛ mwat de a vo hwā de ba ga kana ro ɛ a sé ra nejwang arɔng.”
Bása e ra sira
33“Yin a ga to wok pyɛ de bà ha a bemât raane wɔgɔ, ‘Hwo kwon kwɔrɔ sira de hwà ga ra wɛt, ko gyenges pyɛ́ de hwà ga sira a Darwey, hwô ra.’ 34Ko me ma sé ha a yin, yin ka sira ko tyɔng wɛt. Yin kwon sira na lagwi wɛt, yaga wa sé gwofwa negwɔm Dagwi, 35kɛ na jey, yaga ya sé kwɔ̂n tikîs bol mɛ, kɛ na Yɛrusalɛm, yaga ra sé repomô Gbɔng Gwɔ̀m de a vɔk nerey sizɔng. 36Hwo kwon sira na rato mō arɔng wɛt, yaga hwô tɔk tɛ̀ setôt rato mō ko sining se pɛngɛ kɛ se siri wɛt. 37Tik na pyɛ de yin a ha ye sè ‘ey’ kɛ ‘wey’ zɔng. Ka sede yin e to ha pyɛ cak detu, ko ya yi na Shetan, wo neves.”
Bása e ra toyo a bemat na neves
(Luk 6:29-30)
38“Yin a ga wok pyɛ de bà ha wɔgɔ, ‘Mwat de a pat a mumwɛ yis, be pat a yɛ mɛ arɔng, kɛ a sé hwin ayi, be pat a yɛ mwɛ arɔng.’ 39Ko me ma sé ha a yin, ka sede mwat hwak a ra a hwo pyɛ vyes cak, hwo kwon toyo a yɛ mɛ̀ ano wɛt. Ka sede mwat hwak a fala hwo e rwanâng vwɔ yege, ko doyo a yɛ gwot na a to fala arɔng. 40Ko ka sede mwat hwak a wɔ̀ tɛ̀ kun mō e duk shɔt, na a bin sey ɛ̀ rugu mō, hàla a yɛ pyɛ banga mō mwa arɔng. 41Ka sede mwat hwak a tɛ̀ o gbing-gbing na hwo kyè na yɛ lyosho jining, ko kyè na yɛ lyōsho bya. 42Nɔ̂ng kawɛ mwat pyɛ de a vey won na hwo, ko ka sede mwat e simo na a hwɔp pyɛ cak arɔng, hwo kwon ro mɛ̀ wɛt.”
Bása e ra tɛ̂ yey na vê repugu
(Luk 6:27-28, 32-36)
43“Yin a ga to wok pyɛ de bà ha wɔgɔ, ‘Tɛ̀ yey na mwât vwara mō, ko kyɛ́ o mwât repugu mō.’ 44Ko me ma sé ha a yin, tɛ̀ in yey na bemât repugu min, ko rá in won yaga vemo de ba sé tak a yin reyɔm. 45Yi ano, yin a rɔda sè nèy Da min de a sé e ji lagwi. Yɛ e tɛ̀ gwi mɛ gwo ta e ra bemat beves na bemat berat, ko e to tɛ̀ rwak wo rop e ra bemat de ba sé cik e nuyel mɛ, mwa na vemo de ba sé cik wɛt. 46Ka sede yin e tɛ̀ yey na bemat de be tɛ̀ yey na yin zɔng, ko e pyɔlɔ̂ sɛ́ de yin ê sɛ̀ arɛt? Bemât seres dyâm yeles na pyɛ́ be ragas ano wɛt arɛt? 47Ko ka sede yin e tâng bemin zɔng show, e yɛ̌ pyɛ de ya dal ye bwang bemat de yin a ga ra arɛt? Bemat de ba tɔk Dagwi wɛt be ragas ano wɛt arɛt? 48Yaga ano, tik na yin a sila gyat, tyɛng sede Da min de a sé e ji lagwi a sila gyat arɔng.”
Currently Selected:
Matayus 5: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
