Nusu 1
1
Ba tak a BeIsrayɛl e Misra
1Nèy Yakɔp, womo de be tang ɛ, à Israyɛl arɔng, na kyè vɔk e sevwêl Misra tanga yɛ; kahɛ mo tanga belɔ mɛ, nɛ 2À Rubɛn, na Simɛyɔn, na Levi, na Yuda, 3na Isakar, na Zɛbulun, na Bɛnyamin, 4na Dan, na Naftali, na Gat tanga Ashɛr. 5Nepyak yerê Yakɔp mwa na sè kuru bataama. Hwey mɛ Yɔsɛf há kana sè e Misra.
6E bamâ jeng, Yɔsɛf na begwa mɛ tanga bwang zamang hane ba kushu. 7Ko yere mɛn, yɛ à BeIsrayɛl, ya tɔs nèy, ya karak hɛ, ya gwɛsɛ hɛ ding-ding, sɛ̌ ya vɛ̌ ye ship a vwel mwa.
8Gbɔng gwɔ̀m hwak a hwo re negwɔm Misra; yɛ a kana tɔk pyɛ cak e ra Yɔsɛf wɛt. 9A hwo yâng bemat mɛ, “Di in, BeIsrayɛl vemo ba ga gwɛ̌ hɛn ding-ding, ba ga tɛ́ ɛn pyɛ sap na wot. 10Gbing-gbing wot jāma begwong, de wot ê dul ɛn, nà to gwɛsɛ nepyak mɛn. Yaga ka ba hwo e ra wot na como, gyeng yɛn ê wuna to na bemât repugu mot, na be tó como na wot, yi ano, yɛn a rɔda vɔk negwɔm e ra sevwel o.”#1:10 vɔk negwɔm e ra sevwel o: kɛ: hywit ɛn yi e sevwel o.
11Yaga ano, BeMisra ba tɛ̀ a BeIsrayɛl bemât nuyel e ra yɛn, na be midra hɛn na fwom gbing-gbing. Ba lɔk bapomô Pitɔm na Ramɛsɛs de ba vɔk begbɔng begban Farawo e ji vɛ. 12Ko sede BeMisra ba gwɛ̌ tak a yɛn reyɔm, ko BeIsrayɛl o ba gwɛsɛ hɛn zɔng, ba gwɛ̌ shara hɛn. Yaga ano, BeMisra ba hwo sap BeIsrayɛl, 13-14ko ba gwɛ̌ tɛ̀ ɛn, be ra fwom pwep, yaga na sangal he sè a yɛn kpashak. Ba tɛ̀ ɛn, be tow sebwos, be luk sē, na be yong mɛ̀ bagat bwos. Ano arɔng yɛn a ragas kagwɛ fwôm hey. Ba wok nemwishish mɛn wɛt.
15E bamâ hane, Farawo a tomo be yila a yɛ Shifra na Puwa, behâ sɛlɛ̂ behâ tɔ̂ BeIbrani wɔgɔ, BeIsrayɛl, a ha na yɛn, a ye, 16“Jeng de yin a sé ra fwôm sɛlɛ, ko yin a di hwâ BeIbrani a sé e ra bakwot mɛ na a tɔ, ka a tɔ hwey wen, ko yin mɔrɔ hɛ; ko ka sede e hwong o, ko yin tik hɛ na neken.” 17Behâ sɛlɛ mo ba vɔk bengyip Dagwi, ko yɛn a ra fwom na redu gbɔng gwɔ̀m o wɛt, ba tik nèy bewen o na neken. 18Yaga ano, Farawo a tomo be yila a yɛ behâ sɛlɛ mo, a rangal hɛn, “Yaga sɛ́ de yin a sé ra ano arɛt? Yaga sɛ́ de yin e tikis nèy bewen na neken ɛ?”
19Behâ sɛlɛ ba toyo a yɛ, ba ye, “Behâ BeIbrani ba sé sede behâ BeMisra wɛt, be tɔ vit a yɔ́m. Gyam na hwak e ji bemât sɛlɛ a wul, ba ga kana tɔ.” 20Ko BeIsrayɛl ba karak, ba gwɛsɛ hɛn ding-ding. Dagwi kwong a nɔ̂ng behâ sɛlɛ mo nerat. 21A nɔng ɛn yére pyak, yaga yɛn a vɔk bengyip mɛ. 22E bama de Farawo a di ano, a nɔ̂ng bemat mɛ mwa nu, a ye, “Werek hin kahɛ hwey wen de ba tɔ a BeIbrani, e Gwɔrɔt Nil; ko kahɛ hwey hwong, yin tik hɛ ken.”
Currently Selected:
Nusu 1: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
