Nusu 2

Tɔ̂ Mose

1Mwat hwak e yerê Levi a vo hwā e yere mɛ mo. 2Hwā mo a sey jim, ko a tɔ hwey wen. Jeng de a di, hwey o ha sé rat e bɛrɛng, ko a nusu na hɛ wɛshɛrɛk wɛt pɛl tat. 3Ko jeng de a di, a rɔda tɔk to lɛrɛ hwey o wɛt, a hwo jut shap, a lolom yɛ na kwolta, yaga na a dul nshi nà yel ɛ. A gyira hwey o e ji yɛ, a bang nu mo, ko a wɔ̀ tik yɛ e ji sere e rekwogom Gwɔrɔt Nil. 4Gwa mɛ hwong o a sè e bak hwak bagat e hwomo, na a bin tɔk pyɛ de yê té na yɛ.

5Hwông Farawo a wɔ́, na a bin wɔ̀ kus ɛ́ e gwɔrɔt o, ko behwong behak de ba sé na yɛ ba sè kyě raa rekwogom. A pere kun shap o e ji sere, ko a tomo sam mɛ hwong o, na a wɔ̀ jut a yɛ yɛ. 6Jeng de hwông Farawo a wunta yɛ, a di, a sé e hwey wen e ji mo, ha sé tosho. A wok nemwishish hɛ, a ye, “Hemo ha sé hwey e ji nèy BeIbrani.”

7Gwa hwey o a hwo yi vey, ko a yâng hwông gbɔng gwɔ̀m o, “Hwô simo, na me wɔ̀ yila a hwo hwâ BeIbrani hwak, na a bin pege a hwo hwey o arɛt?”

8Hwông Farawo a yang ɛ, “Ey, ci.” Ano de hwong o a kyè wɔ̀ yila neng-gwɔ̂ hwey o. 9Hwông Farawo a yang ɛ, “Jut hwey hemo, na hwo pege a me hɛ. Ma rɔda tala hwo sehwoyo mō.” Ko hwā mo a jut hwey o, a pege hɛ. 10Jeng de hwey o ha ga yɛnɛ ngas, a jut hɛ, a wɔ̀ nɔ̂ng hwông Farawo, ko ha tɛ́ ɛ hwey mɛ. Hwong o a vo a hɛ rezâ Mose, yaga a ga jut ɛ yi e nshi.

Mose a tele wɔ e Midyan

11E bama de Mose a ga kana vey mwat, a kyè vɔk na bemât yere mɛ, ko a di fwôm retek de be tɛ̀sɛ hɛn be ra. A di WoMisra hwak de a sé dak WoIbrani, gwining e ji yere mɛ. 12Mose a ye byak a ngat, a doyo ngat, vit a di mwat wɛt, ko a vɛ̌ mɔrɔ WoMisra mo, a lɛrɛ revin o e ji bazɛk. 13Tuk de ha raa, Mose a to wɔ́, a pom, a sɛ̀ BeIbrani beba ba sé ra yol na bemɛn. A yâng womo de a buru, “E sɛ́ de ya tɛ̀, hwó dak gwa mō ɛ?”

14Mwat o a toyo a yɛ, a ye, “Wa a tɛ̀ o gwɔ̀m na mwât shɔt e ra wot ɛ? Hwó simo, hwo mɔrɔ me, sede remo de hwà ga mɔrɔ WoMisra wane a?” Sede Mose a wok ano, a tɛ̀ bengyip, a ye e yey mɛ, “Háa wàwá! Ba ga tɔk pyɛ yemo mo.” 15Jeng de Farawo a wok pyɛ́ de ya té, a simo, na a mɔrɔ Mose. Ko Mose a tele yi na yɛ, a kyè vɔk e sevwêl Midyan. Jeng de a wul hwomo, a sangal e rwa hwes. 16E Midyan, mwat hwak a sè de ba tang ɛ, à Rɛyuwɛl, a sè piris, a vɔk behwóng mɛ betaama. Yɛn a wɔ́, ba vos nshi e hwes o, ba sila mɛ bavu de ba yong, na be nɔngɔs mɛ vyêl da mɛn nshi. 17Belek vyēl behak ba vey ro ɛn, ko sede Mose a di ano, a yang ɛ fuutut, a sogo, a hwo sɛlɛ hɛn, ko a nɔng vyēl mɛn nshi. 18Jeng de behwong o ba toyo vɔk na da mɛn, ko da mɛn a rangal hɛn, a ye, “Ala de yin a tānga toyo ziri ano yunung ɛ?” 19Ko yɛn a ye, “WoMisra hwak a sey a wot vwɔ yi na belêk vyēl, a to vo a wot nshi, ko a nɔ̂ng vyēl mot ye sɔ.”

20Rɛyuwɛl a yâng behwóng mɛ, “Mwat wane mo a sé e gwa ɛ? Yaga sɛ́ de yin a vɔk ɛ vey wɛt ɛ? Ci wɔ̀ yila hin hɛ, na a vey re pyɛ́!”

21Rɛyuwɛl a yâng Mose, a sangal na yɛ, ko Mose a simo. Ano kwong a nɔ̂ng Mose hwóng mɛ Zipora e weneng. 22Zipora a sey jim, a tɔ hwey wen, ko Mose a vo a hɛ rezâ Gɛrshɔm, a ye, “Ma kana sē kwɛnɛt e sevwel duk.”

23Ba ros e bamâ jeng yane, ko gbɔng gwɔ̀m Misra a ku. BeIsrayɛl ba sè rus e ji sesam mɛn, yɛn a tosho e de jamâ sɛlɛ yi na Dagwi. 24Dagwi kwong a wok sesin mɛn, ko a bare na sira de a kana wuna na Abraham, na Yishak tanga Yakɔp. 25A di BeIsrayɛl de ba sé e ji sesam, ko a bare na yɛn.

Currently Selected:

Nusu 2: bomBI

Highlight

Copy