Susumo 50

1Ko Yɔsɛf a gaba e ra da mɛ, a sè tosho, a sè suyu a yɛ nu. 2E bama mo, a nɔ̂ng bevwoshon de be ragas a yɛ fwom nu, na yɛn a tɛ̀ á revîn da mɛ hwâl dûl bɔsɔ, ko ba ra ano. 3Ba sila nepɔlɔ kuru banaas e de ra mo, sede remo de be ragas. BeMisra ba tosho hɛ nepɔlɔ kuru bataama (70).

4Jeng de nepɔlɔ mo na ga kwey, ko Yɔsɛf a ha na bemât badu Farawo, a ye, “Ka sede yin a simo, yin wɔ̀ ha a Farawo. Yang in hɛ, 5gyam na da hom a ku, á kana tɛ̀, me sira a yɛ, ma rɔda lɛrɛ hɛ e ji sak de a kana yong yaga tó mɛ e sevwêl Kanaan. A remo, sede a simo a me, ko a tik, na me kyè wɔ̀ lɛrɛ da hom, na me to toyo.” 6Jeng de Farawo a wok, a tomo be ha a yɛ, a kyè, na a wɔ̀ lɛrɛ da mɛ, sede remo de a ga kana sira.

7Ano, Yɔsɛf a kyè wɔ̀ lɛrɛ da mɛ, ko bemât badu Farawo na bemakuk mɛ, tanga bwâng bemakuk mwa vê sevwêl Misra, ba kyè tanga yɛ. 8Mwa belɔ mɛ, na begwa mɛ tanga belɔ mɛn ba kyè arɔng, sɛ̌ nèy na yas de ba tik ɛn e bak vwêl Gɔshɛn. 9Bemât bekyɛkyɛ̂ bedwa na bemât bedwa ba raa hɛn arɔng, gwaku mɛn.

10Jeng de yɛn a wul gazû Atat de wa sé e rwa rak na Yɔrdan, ko yɛn a tosho ding-ding e hwomo, ba ra lwɛlɛ̂ sesin yaga da mɛn, ko Yɔsɛf a gyeng nepɔlɔ netaama ne sesîn da mɛ e hwomo. 11Sede BeKanaan de ba sé sangal e sevwel o ba di sesin de ba tosho e kwɔ̂n gazû Atat, ko ba ye, “Mwin, reku remo rà rá a BeMisra yey ding-ding!” Yaga ano, ba yâng rezâ kwɔn o à Sesîn BeMisra. Kwɔn o ha sé e rwa rak na Yɔrdan.

12Ano de nèy Yakɔp na ra a yɛ tyɛng na pyɛ de a kana nɔng ɛn nu. 13Nà kyè na yɛ vɔk e sevwêl Kanaan, ko ba lɛrɛ hɛ e hwomo e fwara, e cwɛ̂l Makpɛla de gwa sé e rwa rak na Mamrɛ, gwomo de Abraham à kana sey yaga kwɔ̂n besak yi na Ɛfrɔn, WoHiti. 14E bama de Yɔsɛf a lɛrɛ da mɛ, a toyo vɔk e Misra, yɛ na begwa mɛ, na vemo mwa de ba kana kyè tanga yɛ wɔ e de lɛrɛ̂ da mɛ.

Yɔsɛf a ha na begwa mɛ

15A remo de da mɛn a ga ku, begwa Yɔsɛf ba tɛ̀ bengyip, ba ye, “Gyeng Yɔsɛf e rɔ̌ ra repugu na wot, ko e tala hot pyɛ́ vyes de wot a kana ra a yɛ!” 16Yaga ano, yɛn a tomo vɔk na Yɔsɛf, ba ye, “Gyam na mwakuk mō a ku, a nɔng ot nu, a ye, 17wot ra won na hwo, na hwo hàla a begwa mō renɛn de ba ra a hwo, ves o. Yaga ano, wot a sé dak gabɔk na hwo e ji rezâ Dagwi wo da mō, de wot arɔng wot e re a yɛ fongol, hàla a wot renɛn mot!” Ko Yɔsɛf a hwo tosho, jeng de a sey ha mɛn o.

18Begwa mɛ kwong ba vey, ba gaba gup e vwel e nuyel mɛ, ba ye, “Di, wot a sé besam mō.”

19Ko Yɔsɛf a yang ɛn, “Yin wok bengyip wɛt, me ma sé e tô Dagwi wɛt. 20Ko di, yin a yong gwong nengyas yaga me, ko Dagwi a tɛ̀, gwa tɛ́ ɛ nerat, na a bin sey nekên bemat pyak, sede remo de wot a ga di. 21Yaga ano, yin wok bengyip wɛt. Ma rɔda nɔng in tanga nèy min pyɛ́.” Ano de a wɔrɔk hɛn na neha dyɛ̂ng yey.

Rekû Yɔsɛf

22Yɔsɛf a sangal e Misra tanga belɔ da mɛ, a wul neshey naga na nɛ kuru (110) e jey. 23A di nèy nèy nèy hwey mɛ Ɛfrayim; a vɔk nèy Makir, hwêy Manase, e vwɔ mɛ arɔng, ko lɔ ha gwɛ̌ hɛ.

24E bamâ jeng, Yɔsɛf a hwo yâng begwa mɛ, “Ma sé e nû reku. Ko ma tɔk mwin, Dagwi a rɔda vey sɛlɛ hin. Ê toyo na yin vɔk e sevwel de á kana sira a Abraham, Yishak tanga Yakɔp. 25Jeng de Dagwi a rɔda ba ra ano, tik na yin ba hashe bekup hom yi e ngamo.” Ko a tɛ̀ ɛn, be sira ano mwin.

26Yɔsɛf a ku, a vɔk neshey naga na nɛ kuru (110). Ba tɛ̀ a revin mɛ hwâl dûl bɔsɔ, ko ba lasha hɛ e kundung bavin e Misra.

Currently Selected:

Susumo 50: bomBI

Highlight

Copy