Susumo 49

Neha Yakɔp ne yɛnɛ mo vɔk na kahɛ hwey wen mɛ

1A vane ano, Yakɔp a yila nèy mɛ bewen o, a ye, “Tula hin, na me bin ha a yin pyɛ́ de yê sɛ̀ in e jeng de ye kyè vey.#49:1 E ji neha de Yakɔp a ha a nèy mɛ (Susu 49:3-27), batîn ha ba sé pyak e ji jɛ̂k BeIbrani de ba tɔk cap-hâ vɛ yɛ́t wɛt.

2“Tula hin, na yin wok, a nèy hom,

wet in betong na ha hom.

3À Rubɛn, hwêy negel hom,

negak hom, tɔ̂ mɛsɛng e ji newen hom,

hwà dal na nerey,

hwà to dal na gap arɔng.

4Ko hwà rɔda to sè wo nuyel wɛt,

hwo de hwó ra dedɛngɛ sede nshi,

yaga hwà dyɛng e ra gwat hom,

ko hwà tɛ̀ gwɛ ligis.

5À Simɛyɔn na Levi, yin a sé pyɛ jining,

bewâl como min ba sé pyɛ̂ sogô nehywɛ.

6Ma rɔda wuna badu tanga yin wɛt,

be kwon bara me e ji tula min wɛt,

yaga yin a mɔbɔs bemat e ji shom,

na garen yin a tow berinîs behywarak.

7Gawey e ra yin, yaga shôm lolong min,

shom de vit à toshô reyɔm.

Ma rɔda gas in yi na bemin,

ko mê shara hin e ji sevwêl Israyɛl.

8À Yuda, hwo wɛ de begwa mō bê somo,

bê tē guduruk e nuyel mō.

Hwô kaba bemât repugu mō e ra fwɔ,

hwo ngyɔklɔ hɛn e vwel.

9Hwà sé sede hwêy gukum,

de ha to hɛ́ na ngyama vɔk e fwara.

Hwó dyɛng wulum e vwel sede gukum, gwɔ̀m ngyāma,

wà de e kyɛm, a ra ɛ arɛt?

10Kpin tanga gwelê negwɔm bê nàra na hwo,

yi e yere mō de bê kasa ɛ̀ begwɔ̀m.

Yére bemât jey yê dyɛng to mɛn na hwo,

yê tala a hwo pyɛ́ de ba tɛ̀ a yɛn.#49:10 yê tala a hwo pyɛ́ de ba tɛ̀ a yɛn: Sede be doyo batîn ha vemo cik yi e lêm BeIbrani, ba sé ngan: “sɛ̌ Shilo a vey”, ko ba tɔk cap-ha mo yɛ́t wɛt.

11E jeng negwɔm mō pyɛ́ yê sè shɛrɛk:

e ka sè a hwo pyɛ cak wɛt,

na hwo rɔgɔs hwêy madung mō e tîn anap,

kɛ ha ka sé rat o, ow.

Ka hwà simo, hwô tɔk kus rugu mō e nshî anap,

yaga nà sé a hwo bɛs.

12Yéneng bayis mō ya sé wɛng-wɛng na nshî anap,

yìn mō be pɛngɛ pes yi na sɔ̂ nevasâl rɔndɔng.

13À Zɛbulun, hwô sangal e kwogôm gbɔng rep;

e hwomo bedwa-nshi ba rɔda sɛ̀ kwɔ̂n pɔngɔ rat,

ko sevwel mō sê yɛnɛ hɛ e Sidɔn.

14À Isakar, hwo à madung de wó kyè kwɛngɛl rekyɛn,

hwó sangsal e hêy-bedwa.

15Sede hwà di, hwà ga sɛ̀ kwɔ̂n sangal tyang,

vwel o arɔng ha jam a hwo sizɔng,

hwà ye kwot,

ko hwà simo râ fwôm retek.

16À Dan, hwà rɔda re negwɔm e ra bemat mō,

sede hwak e ji yerê Israyɛl.

17Hwà rɔda sè gwɔ̄m e vwâ gwong,

gàbak e gwông bol,

wo roros batô bol dwa,

yaga na wo werek mwât laga wɛ na bama.

18À Dagwi Darwey, ma sé gyeng, na hwo sey me!

19À Gat, bemât jugu bê hwo e ra hwo,

ko hwà rɔda hywit o, hwô ro ɛn.

20Hirî Ashɛr bê nɔngɔs pyɛ́ shɛrɛk,

e ji mo bê sɛ̀ pyɛ̂ re ryat yerê ye lɔ gwɔ̀m.

21À Naftali, hwà sé vow de ba hàla wɛ,

womo de wo tɔs nèy nerat.

22À Yɔsɛf, hwà sé madûng hey,

madûng hey e lwel nshi, e hagât rahwol.

23Bemât gbang ba sogo e ra hwo na shom,

ba tabas hwo, ba shɔk a hwo jim vɛt.

24Ko Mwât gap a kwɔrɔs begbang mɛn o;

berinîs vɔ mɛn ba tuyu hɛn,

yi na Dagwi wo Yakɔp de a Vɔk Reto,

yɛ Mwât gyeng na gyêp Israyɛl.

25A sé e Dagwi wo da mō de e sɛlsɛ hwo,

Dagwi Wo Retô Mwa de e tɛ̀sɛ a hwo nerat.

E nɔngɔs hwo rwak yi e larwak,

nshî lel yi e vwel ciwil,

hiri mō bê sɛ̀ pyɛ́ pyak,

e tɛ̀sɛ beha min na yas min, be sɛ̀ nèy pyak arɔng.

26Nerat de me, da mō, ma sé tɛ̀ e ra hwo

na dal nerat ne bedabeda hom:

yɛn a sé a me sede beraku

de ba sé e tɛt o, be nàra gbak-gbak,

nerat mō na dal vɛ mwa.

Tik na nerat nemo ne raa hwo,

tik na ne sǎ e ra hwo,

hwo de ba tik detu yi na begwa mō.

27À Bɛnyamin, hwà sé bwá de vit à jɔgɔ:

bop nagasi hwó re bemât repugu mō e como,

nawiri hwó gas pyɛ́ de hwà hashe.”

28Mwa vemo ba sé yére kuru na yɛ bya yê BeIsrayɛl, ko pyɛ́ ma yane de da mɛn a ha a yɛn, jeng de a sé tɛ̀ a kawɛ nerat, a nɔ̂ng kawɛ mo nerat de na jam yaga yɛ.

Rekû Yakɔp

29-30E bama mo, Yakɔp a nɔ̂ng nèy mɛ nu, a yang ɛn, “Di in, ma sé kyè wɔ̀ sɛ̀ beda hom. Lɛrɛ me hin tanga beda hom e fwara gwomo de gwa sé e cwɛ̂l Makpɛla, e rwa rak na Mamrɛ e sevwêl Kanaan, gwomo de Abraham á kana sey yi na Ɛfrɔn, WoHiti, yaga kwɔ̂n besak. 31A sé e hwomo de ba lɛrɛ ɛ̀ Abraham na hwā mɛ Sara; e kwɔn a hane de ba to lɛrɛ ɛ̀ Yishak na hwā mɛ Rɛbɛka; ko e hwomo de ma lɛrɛ ɛ̀ Leya arɔng. 32Cwɛl o na fwara mo de gwa sé e ji gwɛ, ba sey yi na BeHiti.” 33Jeng de a yɛnɛ ha a nèy mɛ, ko a dyɛng e ra gwat, a vo nesong yɛnɛ mo, ko a wɔ̀ sɛ̀ beda mɛ.

Currently Selected:

Susumo 49: bomBI

Highlight

Copy