Mak 15

Mîsa Jisọs inu me isi kè Pailet

(Mat 27:1-2,11-14; Luk 23:1-5; Jọn 18:28-38)

1Me ewelegwe ewelegwe, ebi ibot ngwugwa, mè ebi ugane ama, mè ebi ìjeen̄ Ikan melek otutuuk Oru ebi Ju etutumu ifieek inu ema eberọ, mè initap Jisọs mkpọn me ubọk, mè isa ọmọ isi ikana itap me ubọk kè Pailet (ogwu ibot mkpulu ebi Rom etobe me agan̄ Judia me mgbọ ya).

2Pailet onenido Jisọs ibe, “Ìre owu ore ogwu ubọọn̄ ebi Ju ya?”

Jisọs ofọfọọk ọmọ ibe, “Owu otumu ma!”

3Ebi ibot ngwugwa ekekitumu owuwa ikọ itoon̄ Jisọs. 4Eya orọ Pailet okpọkpọk ido ọmọ ibe, “Ìre owu òkakaan̄ inu geege òbofọọk? Ìre òkanọ otutuuk inu chi ekitumu itoon̄ owu?”

5Ire, Jisọs ìkasan̄a amọn geege. Inu ya okeke Pailet chieen̄.

Mîfieek oyerebet mkpa inyi Jisọs

(Mat 27:15-26; Luk 23:13-25; Jọn 18:39–19:16)

6Mgbọ geelek ijọk Iraraka okire, Pailet îkisan̄a ogwu mkpọn ge me uwu mkpọn isibi ibe ifo. Ene ya ìkire ogwu ebi Ju edobe. 7Ike mgbọ ya, îkaan̄ ogwu mkpọn ge ekigwen Barabas. Barabas yi me lek ebi etapbe me mkpọn mije uyọrọlek ema etapbe, mè ikpan̄ ene. 8Urum ebi ene ìtititiin̄ me ere uwu kè Pailet enenikibe Pailet irọ inu îkirọ acha geelek, me ibot mgbọ ya, inyi ema.

9Pailet onenido ema ibe, “Ìre enyi mîweek ibe emi ǹsan̄a ogwu ubọọn̄ ebi Ju ǹsibi ǹnyi enyi?” 10Pailet îriọọn̄ ibe ke îre sa me ejit mba ke ebi ibot ngwugwa esa Jisọs ijet ọmọ. 11Ire, ebi ibot ngwugwa ekekitumu inyi ebi ene cha ibe ekachieek, kpan̄asi ebedo Jisọs, edo ibe isan̄a Barabas isibi inyi ema.

12Pailet okpọkpọk ido ema ibe, “Ìre keke ke enyi eweek ibe emi ǹrọ ogwu enyi ekigwen ogwu ubọọn̄ ebi Ju?”

13Ema ekekitaan̄ ukpo ibe, “Gon ọmọ kpan̄ me uti nkwurieen̄!”

14Pailet ododo ema ibe, “Mije keke? Ìre kpasi ijo inu ke îrọ?”

Ire, ema erọriọọn̄ ikitaan̄ ukpo unye unye ikibe, “Gon ọmọ kpan̄ me uti nkwurieen̄!”

15Mije Pailet okiweek irọrọ inyi ejit ibele ebi ife cha, inenisan̄a Barabas isibi me mkpọn inyi ema, mè isa Jisọs inyi ebi akọn̄ ibe esulu me njijan̄, mè esa esi egon ekpan̄ me inyọn̄ uti nkwurieen̄.

Ebi akọn̄ mîsa Jisọs irọ inu ochak

(Mat 27:27-31; Jọn 19:2-3)

16 Ebi akọn̄ cha esasa Jisọs isibi isi emen oyet egep uwu ogwu ibot mkpulu, me igwen otutuuk ebi urum akọn̄ kiban̄ ititiin̄. 17Ema enenitap Jisọs ikpele ofọnti irio irio eyi ebi ubọọn̄ ekitap, mè isa ukpak ilọk okpibot ubọọn̄ ikwuun̄ ọmọ me ibot, 18mè ikitumu inyi ọmọ ibe, “Ogwu Ubọọn̄ ebi Ju, eji mînyi owu amọn!” 19Ema esasa uti ikisulu ọmọ me ibot, mè ikigọkọ ataak itọbọ ọmọ me lek, mè ikigwook ekpe me isi kan̄, mè ikitọbọ ibot inyi ọmọ. 20Mgbọ ema erọbe ọmọ inu ochak chi isan̄a, ema eneniwọọk ọmọ ofọnti irio irio ya isan̄a me lek, mè ikpulu ofọnti kan̄ cha itap ọmọ me lek, mè isa ọmọ isibi ibesa isi igon ikpan̄ me inyọn̄ uti nkwurieen̄.

Mîgon Jisọs ikpan̄ me inyọn̄ uti nkwurieen̄

(Mat 27:32-44; Luk 23:26-43; Jọn 19:17-27)

21Mgbọ ekisa Jisọs ije me oniin̄ ibesi igon ikpan̄, ema enenichichini melek ogwu enerieen̄ ge ekigwen Saimọn, nte kè Alikisenda melek Rufọs, ònan̄a me ama ekigwen Sairini, okije inu. Ema etetet ogwu enerieen̄ yi me ubọk unye ibe iben uti nkwurieen̄ kè Jisọs. 22Ema enenisa Jisọs isi ire ere ekigwen Gọligọta, (eyi òsisibi Ere Ngigọ Ibot Ene). 23Eneninyi Jisọs miin̄ etapbe ugwun̄ ònan̄a me lek uti mâa me emen. Ugwun̄ yi ìkirọ inyi ene ikanọ unan me lek. Ire, Jisọs ojijit inwọnwọ. 24Ema enenigon Jisọs me inyọn̄ uti nkwurieen̄, mè ikpulu ofọnti kan̄. Sabum ema eniche ofọnti cha, edadasi iroon̄ nriroon̄ isasa iriọọn̄ ubọk ema ebeche ofọnti cha me lek kiban̄.

25Òfuk-mgbọ îsulu onaan̄ge eyi ewelegwe mgbọ ema egonbe Jisọs me inyọn̄ uti nkwurieen̄. 26Ulook egebe igon kubọk ikan esabe itip ọmọ oyerebet ìre: OGWU UBỌỌN̄ EBI JU. 27Mîgon si ebi inọ afa iba me uti nkwurieen̄ me agba lek kan̄ me ere ya, ene ge me agan̄ ulom kan̄, ene ge me agan̄ ujit kan̄. [ 28Sa me ikeyi ke inu egebe me Ikpa Mbuban ibak ọmọ orọ iso. Ege me Ikpa Mbuban ibe, “Mîfuk ọmọ itap me otu ifuk ebi ìkifiat ikan.”#15:28 Asaya 53:12] 29Ebi ìkije iraka me ere ya ekekitọp ibot, mè ikichak ọmọ ibe, “Ìin̄-iin̄-ìin̄! Owu ogwu òbe ke ọmọ môgbugbọ Uwu Mbuban ito, mè isa egwe ita gaalek ikpọk inama isan̄a, 30nyan̄a lek kwun̄ ma! Nan̄a me inyọn̄ uti nkwurieen̄ ya sibi ijọn̄ nu.”

31Ikeya si, ebi ibot ngwugwa, mè ebi ìjeen̄ Ikan ekekitumu me lek kiban̄ ikisa ichak Jisọs ibe, “Înyan̄a ebi ofifi ife, ire, ìkakọt ìnyan̄a lek kan̄. 32Ọmọ ogwu òrere Karais ya, ogwu ubọọn̄ ebi Ijeren, inan̄a me inyọn̄ uti nkwurieen̄ isibi ijọn̄ nu, inyi eji emun̄, mè echieek me lek kan̄.” Ubọk yaage ke ene iba cha egonbe igba ọmọ ekitumu si ijo otu ikọ isa ikinyi ọmọ unyechieen̄.

Mkpa kè Jisọs

(Mat 27:45-56; Luk 23:44-49; Jọn 19:28-30)

33Me mgbọ òfuk-mgbọ osulube akọp mè iba eyi ejit ikarek, ere ogwugwu ikom idun kubọk eririeen̄, mè ikup ikeya mege ire mgbọ òfuk-mgbọ osulube ita eyi ikarek. 34Mgbọ òfuk-mgbọ osulube ita ya, Jisọs otataan̄ ukpo ibe, “Elọi Elọi, lama sabatani?” eyi osisibi, “Awaji n̄a, Awaji n̄a, ìre keke orọ ojitbe emi itele?”#15:34 Itọn̄ 22:1

35Mgbọ usini ebi ìkup me ere ya enọbe ikọ îtumube, ema ekekitumu ibe, “Ìgban̄, òkibọn̄ọ Ilaija.” 36Ene ge me lek kiban̄ olilibi isi imọnọ ise ijiin̄ me emen miin̄ agburu, mè isa inwaan̄ me otu uti, mè ibene ifo otu kè Jisọs ibe inwọ, mè ikitumu ibe, “Ìjuuk ọmọ ìtele, mè ekpọ-nu mè ìre Ilaija mônu iniwaka ọmọ isan̄a me inyọn̄ uti nkwurieen̄ isibi ijọn̄.”

37Jisọs otataan̄ ukpo, mè ikwu.

38Ekwut esabe igbaka ikwek Ere Òkup Mbuban Ichit me Uwu Mbuban otọtọbọ ibum okpọkọ iba ibene me inyọn̄ ire ijọn̄. 39Ogwu ibot akọn̄ ge òkekeke me ere ya mè imun̄ ubọk Jisọs osabe ikwu, otutumu ibe, “Me atikọ, ene yi ìre Gwun̄ Awaji!”

40Îkaan̄ usini ebibaan̄ ìkukup me ujọn̄ọ ere ikikpọ inu ya òkirọ. Ebibaan̄ cha ìre Meri ogwu ama Magidala, mè Salomi, mè Meri nga kè Jemis ogwu ijija melek Josefu.#15:40 Josefu ìre si Joses. Kpọ si me 15:47. 41Mgbọ Jisọs okupbe me Galili, îre ebibaan̄ chi ekigọọk ọmọ me udun̄, mè ikikpọ ọmọ chieen̄ me lek. Owuwa ebibaan̄ ebi ìgọgọọk Jisọs me udun̄ inu Jeruselem me ere ya si ekupbe.

Ifufuun̄ kè Jisọs

(Mat 27:57-61; Luk 23:50-56; Jọn 19:38-42)

42Usen ya ìre usen ebi Ju ekinen̄e lek kiban̄ isun̄ (mije ofit iwele kan̄ obore Usen Mbuban kiban̄). Eya orọ, me agan̄ ikakwun̄ usen ya, 43Josefu ogwu ama Arimatia, ene ge eriọọn̄be erieen̄ me emen Oru ebi Ju, ogwu òkikpọ chieen̄ me inunu mkpulu eyi Awaji, osasa me unye-ejit ije isi ido Pailet ibe inyi ọmọ unye, mè ọmọ isi iben nkwukwu kè Jisọs. 44Îke Pailet chieen̄ inọnọ ibe ke Jisọs îgwat lek ikwu ikeya. Ineniria etip igwen ogwu ibot akọn̄ ya ibe inu, mè ido ọmọ ibe mè ìre Jisọs îkwu ifiin̄ mgbọ ye? 45Mgbọ Pailet onọbe me otu ogwu ibot akọn̄ ya ibe ke Jisọs îkwu, ineninyi Josefu unye ibe isi iben nkwukwu kè Jisọs. 46Josefu onenisi ilep ekwut ekisa ikat nkwukwu ene isi ifuun̄, mè isi isan̄a nkwukwu kè Jisọs, mè isa ekwut ya ikat, mè iben isi itap me emen udọn̄-ufuun̄ erọkọbe me lek ewuuk, mè ikpukpọt ikpele ewuuk ge ichit otu udọn̄ ya. 47Meri ogwu ama Magidala, mè Meri nga kè Josefu mîgọọk si inu ere ya, mè imun̄ ere efuun̄be nkwukwu kè Jisọs.

Currently Selected:

Mak 15: Obolo

Highlight

Copy