Mak 14

Oru ikpakpan̄ Jisọs

(Mat 26:1-5; Luk 22:1-2; Jọn 11:45-53)

1Usen iba osik sabum ijọk Iraraka mè ijọk Fituru Kpunu Olat. Ebi ibot ngwugwa mè ebi ìjeen̄ Ikan enenikiweek ubọk ema mêlekebe Jisọs, mè itet ikpan̄. 2Ire, ema etutumu me lek kiban̄ ibe ke ìkagbe ibe ire me mgbọ ijọk ya, inyi ebi ene ekato etim.

Mîtọkọ Jisọs aran̄ me ibot me Betani

(Mat 26:6-13; Jọn 12:1-8)

3Jisọs onenije isi Betani, mè ikup me uwu kè Saimọn, ogwu òfafiak orukan̄ inyakpa. Mgbọ ema ekirie inorie, ogwu enenwaan̄ ge osasa iko ewuuk alabasita ge aran̄ utop olu ònyenye ewe enenen ojotbe emen ikaan̄ me ubọk inin̄ uwu ya. Aran̄ ya, esan̄a me lek uti nâdì, kpewọlọ. Ogwu enenwaan̄ ya onenifan̄a ebek iko ya, mè iben aran̄ ya ikana igwook Jisọs me ibot.

4Usini ebi ene ìkup me ere ya enanaan̄ ejit, mè ikinunuun̄ me etete kiban̄ ibe, “Ìre keke orọ ogwu enenwaan̄ yi ijijit aran̄ yi ikeyi? 5Mêkọt inyam aran̄ yi iraka efit dinari ita (eyi òrere otu ifuk ikpoko mêkọtbe isa ikpe ogwu ikwaan̄ ge acha ge), mè esa ikpoko ya eche enyi ebi ugbọọn̄.” Ema ebebene ikikan̄ inu inyi ogwu enenwaan̄ ya ijo ijo.

6Jisọs otutumu inyi ema ibe, “Ìtele ogwu enenwaan̄ yi, ikayaka ìsisaak, mije, îrọ inu òjajaan̄, mè igbe inyi emi. 7Enyi mêkọt ikitap ubọk inyi ebi ugbọọn̄ mgbọ geelek, mije, ebi ugbọọn̄ melek kinyi ebekikup mgbọ geelek. Ire, emi ǹkabagọọk enyi ikup mgbọ geelek. 8Ogwu enenwaan̄ yi îrọ inu îkọtbe, mije, ìgwook emi aran̄ ya me lek isasa ibala akpalek n̄a iban mgbọ mêfuun̄be emi. 9Me atikọ, ǹkitumu inyi enyi ibe, ere geelek mêlookbe ata etip ikana ire me otutuuk linyọn̄, mêtumu inu ogwu enenwaan̄ yi orọbe igbaalek, inyi ekesa ekeek ogwu enenwaan̄ yi.”

Judas îchieek ileleke Jisọs

(Mat 26:14-16; Luk 22:3-6)

10Mgbọ ya, Judas Isikariọt, ene ge me lek ebi akọp mè ene iba ebi udun̄ kè Jisọs, onenisi lek ebi ibot ngwugwa isi igọọk inin̄ oru ubọk ọmọ obosa ileke Jisọs inyi ema. 11Inu îtumube ya obebele ife cha ejit. Ema echechieek use ibe ke ema mênyi ọmọ ikpoko. Eya orọ, Judas obebene ikiweek mgbọ irek môsibibe inyi ọmọ isa Jisọs initap ema me ubọk.

Jisọs melek ebi udun̄ kan̄ mîrie inorie ijọk Iraraka

(Mat 26:17-25; Luk 22:7-14; Jọn 13:21-30)

12Me adasi usen ijọk Fituru Kpunu Olat, òrere usen ekikpan̄ arọọn̄ ekisa irie ijọk Iraraka, ebi udun̄ kè Jisọs enenido Jisọs ibe, “Ìre ere owa ke eji ebesi irọ inorie ijọk Iraraka inyi owu?”

13Jisọs onenisan̄a ene iba me lek kiban̄ iria ibe, “Ìsi emen ama yi, ke enyi mêchichini enerieen̄ ge obenbe ugọn̄ mudim. 14Ìgọọk ene ya ìsi ìre uwu, mè ìtumu ìnyi ogwukaan̄ uwu ya ibe ke Ogwu Ijejeen̄ ibe mè ìre mọmọ agwut ere ọmọ mè ebi udun̄ kan̄ ebekup irie inorie ijọk Iraraka? 15Ene ya môjeen̄ enyi agwut ilile ge ebalabe, mè inen̄e isun̄ isan̄a me uwu inyọn̄. Ìrọ inorie ya ìsun̄ ìban emi me ere ya.”

16Ebi udun̄ kan̄ ene iba cha ejeje inin̄ emen ama ya, mè imun̄ inu geelek ike Jisọs otumube, mè irọ inorie ijọk Iraraka ya isun̄ me inyọn̄ ikasi.

17Me ikakwun̄ usen ya, Jisọs mè akọp mè ene iba ebi udun̄ kan̄ enenikweek irek me uwu ya. 18Mgbọ ema ekweekbe me lek ikasi, mè ikirie inorie, Jisọs onenitumu inyi ebi udun̄ kan̄ ibe, “Me atikọ, ene ge me lek kinyi, ogwu òkigọọk emi igbaan̄ irie inorie mgbọ yi, môleke emi inyi ekpan̄.”

19Ejit ofefieek ebi udun̄ kan̄ cha enenen, ogwu ikup odo òbe, “Ke ìkare emi wa?”

20Jisọs ofọfọọk ema ibe, “Îre ene ge me lek kinyi akọp mè ene iba, ogwu òkigọọk emi igbaan̄ ijiin̄ fituru me emen alala usun̄ ge me inyọn̄ ikasi mgbọ yi oboleke emi inyam. 21Gwun̄ Ebilene môkwu mkpa kubọk egebe ibak ọmọ me Ikpa Mbuban. Ire, môfieek inyi ene ya ogwu môlekebe emi Gwun̄ Ebilene inyi mè ekpan̄. Kè ònwọn ire kpememaman ene ya.”

Inorie mbuban

(Mat 26:26-30; Luk 22:14-20; I Kọr 11:23-25)

22Mgbọ ema ekirie inorie ya, Jisọs omọmọnọ fituru, mè inyi Awaji itọn̄, mè ikpọkọ, mè isa inyi ebi udun̄ kan̄, mè itumu inyi ema ibe, “Ìbọkọ! Eyi ìre akpalek n̄a.”

23Ikeya si ke îben ekpen̄ mè miin̄ me emen, mè inyi Awaji itọn̄, mè iyaka itap me ubọk ebi udun̄ kan̄. Ema otutuuk ene egbagbaan̄ inwọ miin̄ me emen ekpen̄ ya.

24Jisọs onenitumu inyi ema ibe, “Eyi ìre eje n̄a eyi egwookbe mije ibot owuwa ene, eje n̄a eyi esabe irọ inyan̄a-ibot eyi Awaji onyan̄abe inyi ebilene, inye. 25Me atikọ, emi m̀kpayaka inwọ miin̄ keyi ofifi, mege ire usen mâkpọkbe inwọ eyi ayaya me mkpulu eyi Awaji.”

26Mgbọ ema eriebe inorie ya isan̄a, ema enenikọt okwa itọn̄ Awaji, mè inan̄a isibi ije ifo inyọn̄ ogoon̄ Olifu.

Jisọs îtumu ibe ke Pita môjit ọmọ

(Mat 26:31-35; Luk 22:31-34; Jọn 13:36-38)

27Jisọs onenitumu inyi ebi udun̄ kan̄ ibe, “Otutuuk kinyi mêyat itele emi, kubọk egebe me Ikpa Mbuban ibe ke Awaji ìbe,

“ ‘Mâkpan̄ ogwu òkpukpo arọọn̄,

urum arọọn̄ môyiyala.’#14:27 Jek 13:7

28Ire, nsijomo me mkpa, mâsi ikup me Galili iban enyi.”

29Pita otutumu inyi Jisọs ibe, “Ikerere otutuuk ene eyayat itele owu, emi m̀kpatele owu.”

30Jisọs otutumu inyi Pita ibe, “Kpọ, me eririeen̄ cherekeyi, sabum unọn obosan̄a amọn iso mgbọ iba, owu me lek kwun̄ môjit emi mgbọ ita.”

31Ire, Pita okekitumu inye ibe, “Emi m̀kpajit owu kubọk ge, ikerere ebegbagbaan̄ emi melek kwun̄ ikpan̄ mgbọ ge.” Ikeya si ke otutuuk ebi udun̄ kan̄ kechilọ etumu.

Jisọs îriaak uriaak me Gesemeni

(Mat 26:36-46; Luk 22:39-46)

32Jisọs mè ebi udun̄ kan̄ eneninan̄a ije isi ere ekigwen Gesemeni. Inenitumu inyi ema ibe, “Ìkup ìban emi, mè ǹsi ǹriaak uriaak,” 33mè isa Pita mè Jemis mè Jọn igbaalek ije inan̄a. Ufieejit mè ufieek-owot obebene ikikeme ọmọ.

34Itutumu inyi ema ene ita cha ibe, “Ufieejit òkup emi me ejit îmin enenen ire lek môkọtbe ikpan̄ emi. Ìkup me ere keyi, mè ìkup me mbem.”

35Inenije ifo isi sọnja, mè irọn̄ inyana me ijọn̄, mè iriaak uriaak ibe, ire ikup mfufet, mè Awaji iben ufialek eyi mgbọ ya iraka ọmọ me ibot, 36mè ikitumu ibe, “Jei, Nte n̄a! Kpunu inu geege òkigak owu irọrọ. Ben ekpen̄ ufialek yi san̄a emi me lek. Ire, ikare me nkeek eyi n̄a. Nkeek eyi kwun̄ irọ!”

37Irariaak uriaak yi isan̄a, inenigwu ikom ije inu, mè inimun̄ ebi udun̄ kan̄ ene ita cha ekilaak, mè itumu inyi Pita ibe, “Saimọn, ìre òkilalaak? Ìre owu òkpokọt itop chieen̄ ukpọk ukpọk lek mbubak mgbọ ge gaalek? 38Ìkup me mbem, mè ìkiriaak uriaak, inyi enyi ekarọn̄ ìnin̄ me ntọ-mkpọ. Mmun̄ ibe ke ekwukwu kinyi îbem lek me atikọ, ire, akpalek kinyi îwọ.”

39Inenitele ema, mè ije isi iriaak uriaak yaage îriaakbe me adasi mgbọ, 40mè iyaka inu òso mgbọ iba, mè inimun̄ si ema ekilaak, mije, ilaak îtet ema enenen. Ema si kperọriọọn̄ inu ebeyaka itumu inyi ọmọ.

41Jisọs ojeje, mè ikpọk inu òso mgbọ ita, mè ibe ema, “Ìre enyi ekilalaak isiki efuuk si ire mgbọ keyi? Îkem! Ìbolo chieen̄ ke mgbọ ya îre! Ìkpọ, mêniyaka emi Gwun̄ Ebilene itap me ubọk ebi ijo. 42Ìnan̄a ìkeke ìnije ke ogwu òboleke emi ire ogwulọ òkinu.”

Mîtet Jisọs isa ije

(Mat 26:47-56; Luk 22:47-53; Jọn 18:3-12)

43Jisọs òkitutumu ikọ ya me otu, Judas, ene ge me lek akọp mè ene iba ebi udun̄ kan̄, okakana isibi, ọmọ melek urum ebi ene ebi ebi ibot ngwugwa, mè ebi ìjeen̄ Ikan, mè ebi ugane ama eriabe ibe enetet Jisọs. Ife chi eje melek oge akọn̄ mè m̀gbele me ubọk inu ere ya.

44Sabum ema enube, Judas îwuuk lek itumu inyi ebi melek kan̄ cha ibe ke ene geelek ọmọ môkanabe ikat ore ene ya, mè ebibi etet esa eje, mè egwuun̄ chieen̄ me lek. 45Mgbọ yaage Judas orebe ere ya, iraraka isi ge isi lek kè Jisọs, mè itọp ọmọ amọn ibe, “Ogwu Ijejeen̄,” mè ikana ọmọ ikat. 46Ebi ife cha eninin̄ mgbọ yaage gìrìrìm, mè itet Jisọs. 47Ene ge me lek ebi udun̄ kè Jisọs, ebi ìkekeke me ere ya, owọwọọk oge akọn̄ kan̄, mè ikep ogwu usun̄ ogwu òban Awaji, utọn̄ ofefieek inan̄a.

48Jisọs okekido ebi ife cha ibe, “Ìre emi ìre ogwu òkichiin̄ inọ me afa, eyi enyi esabe oge akọn̄, mè m̀gbele isibi inu ibenitet emi? 49Ke ǹkigọgọọk enyi ikup me Uwu Mbuban usen geelek ikijeen̄ inu, enyi kpetet emi. Inu egebe me Ikpa Mbuban ìkaan̄ irọrọ iso ike egebe.” 50Otutuuk ebi udun̄ kan̄ eyayaak itele ọmọ, mè ilibi ichieen̄ ita kpai.

51Gwun̄ enerieen̄ ge òwa me ere ya òsasa ekwut gaalek ikana ichit lek, mè ikije igọọk Jisọs me udun̄. Ebi ife cha egọgọọk gwun̄ enerieen̄ ya ibetet. 52Ifafiala me ubọk kiban̄, mè ifiin̄ ekwut kan̄ itele, mè ilibi njak njak ifo.

Mîsa Jisọs isi isi Oru ebi Ju

(Mat 26:57-68; Luk 22:54-55,63-71; Jọn 18:13-14)

53Ebi ife cha esasa Jisọs isi uwu ogwu òban Awaji. Otutuuk ebi ibot ngwugwa mè ebi ugane ama mè ebi ìjeen̄ Ikan mîtitiin̄ me uwu ya. 54Pita okekije me ujọn̄ọ ere igọọk ema me udun̄, mè igọọk iraka inin̄ emen oyet egep ogwu òban Awaji, mè isi igọọk ebi ìkibem ere ikup ikigwele ukan̄.

55Ebi ibot ngwugwa mè otutuuk ebi Oru ebi Ju ekekiweek inu ata-ikọ ebesa itoon̄ Jisọs uraamọn, inyi ekọt ekpan̄ ọmọ. Ire, ema kpekọt ikaan̄. 56Owuwa ebi ata-ikọ mînu inikeke ataak ataak ata-ikọ ikeme Jisọs, ire, ikọ kiban̄ ìkaje ìkike.

57Usini ebi ìkup me ere ya enanan̄a ikeke, mè ikan̄ ataak ikeme Jisọs ibe, 58“Eji mînọ ene yi okitumu ibe ke ọmọ môgbugbọ Uwu Mbuban yi eyi ebilene enamabe, mè isa egwe ita inama ofifi eyi ikarege eyi ubọk ebilene onamabe.” 59Ikọ ebi ata-ikọ kechi si ìkaje lek ge.

60Ogwu òban Awaji oneninan̄a ikeke me isi otutuuk ene, mè ido Jisọs ibe, “Ìre òkakaan̄ inu geege obofọọk? Ìre keke ke ife chi ekitumu ikeme owu ikeyi?” 61Ire, Jisọs okpọkpọ iriaan̄ otu, ìkasan̄a amọn.

Ogwu òban Awaji okpọkpọk ido ọmọ ibe, “Ìre owu ore Karais ya, òrere Gwun̄ Awaji ogwu ògbe itọn̄?”

62Jisọs ofọfọọk ibe, “Emi nre ene ya! Enyi mêmun̄ Gwun̄ Ebilene okweekbe irek me agan̄ ubọk ulom Awaji Ogwu Òkaan̄ Unye Geelek, mè inan̄a ikinu me emen oduku inyọn̄.”#14:62 Dan 7:13

63Ogwu òban Awaji osasa me unaan̄-ejit itaba ofọnti îtapbe me lek igwak, mè itumu ibe, “Ìre kpasi ata-ikọ ke eji eyaka ikiweek? 64Enyi otutuuk ene mîsa utọn̄ kinyi inọ mbuban ikọ eyi ene yi otumube ikeme Awaji. Nkeek kinyi ye?”

Otutuuk kiban̄ etitip Jisọs oyerebet, mè ichieek igwook ibe ke îgbe mkpa. 65Usini kiban̄ ebebene ikigọkọ ataak itọbọ ọmọ me lek, mè isa ekwut ibọp ọmọ chieen̄ ichit, mè ikigoon̄ ọmọ akpọ, mè ikibe ọmọ, “Bak-nu, ìre ekene osulu owu?” Ebi akọn̄ ìkibem ere enenitaba ọmọ ije, mè ikisut ọmọ.

Pita îjit Jisọs

(Mat 26:69-75; Luk 22:56-62; Jọn 18:15-18,25-27)

66Mgbọ Pita okupbe me oyet egep ya, gwun̄ enenwaan̄ ge me lek ebi usun̄ ogwu òban Awaji osisibi inu. 67Mgbọ îmun̄be Pita okigwele ukan̄, igwugwuun̄ chieen̄ ikpọ Pita, mè itumu inyi ibe, “Ke owu si me lek ebi ìkigọọk Jisọs ogwu Najeret ya ije.”

68Pita okakan̄, mè itumu inyi ogwu enenwaan̄ ya ibe, “Ǹkariọọn̄ inu okitumu, ǹkagobo ìtet,” mè inan̄a ije ifo otunchit isi igọọk ikeke. [Mgbọ yaage unọn osasan̄a amọn.]

69Mgbọ gwun̄ enenwaan̄ ya omun̄be Pita me ere ya, isasa ebi ìkekeke me ere ya ikijeen̄ ibe, “Ìkpọ, ene yi ìre ene ge me lek ebi ife cha.” 70Pita okpọkpọk ikan̄.

Sọnja mgbọ iraraka, ebi ìkeke me ere ya etutumu inyi Pita ibe, “Owu òkpokọt ikan̄ ibe ke owu òkare ene ge me lek ife chi, mije, owu ìre ogwu Galili.”

71Pita otatap awọ ikeme lek kan̄, mè ikinyan̄a ibot ibe, “Ǹkitumu atikọ. Ǹkariọọn̄ ene yi enyi ekitumu ikọ ibak.”

72Mgbọ yaage, unọn osasan̄a amọn òso mgbọ iba. Pita onenisi ikeek ikọ ya Jisọs otumube inyi ọmọ ibe, “Sabum unọn obosan̄a amọn iso mgbọ iba, owu môjit emi mgbọ ita.” Mgbọ yaage Pita obebene ito ikito.

Currently Selected:

Mak 14: Obolo

Highlight

Copy