Mak 16

Jisọs îjomo me mkpa

(Mat 28:1-8; Luk 24:1-12; Jọn 20:1-10)

1Mgbọ Usen Mbuban orakabe, Meri ogwu ama Magidala, mè Meri nga kè Jemis, mè Salomi, enenisi ilep aran̄ utop olu ema mêsabe isi iken nkwukwu kè Jisọs. 2Me otu ewelegwe, me usen ògọgọọk Usen Mbuban, mgbọ ura obumbe, ebibaan̄ cha esisi udọn̄-ufuun̄ ya. 3Mgbọ ema ekije me oniin̄, ema ekekinina lek ibe, “Ìre ekene obonikpukpọt ewuuk esabe ichit otu udọn̄ ya isan̄a inyi eji mọnọ?”

4Ewuuk ya îmin enenen. Ire, mgbọ ema erebe ere ya, ema emumun̄ ibe ke mîkpukpọt ewuuk ya isan̄a me otu udọn̄ ya. 5Ema eninin̄ emen udọn̄ ya, mè imun̄ gwun̄ enerieen̄ ge osikibe ikweek me agan̄ ubọk ulom, mè ofọnti okuket me lek. Ema eririki. 6Gwun̄ enerieen̄ ya obebe ema, “Ikariki! Nriọọn̄ ibe ke enyi ekiweek Jisọs ogwu Najeret, ogwu egonbe ikpan̄ me inyọn̄ uti nkwurieen̄. Îjomo me mkpa, ìkakup me ere keyi. Ìna ìnikpọ ere emaan̄be nkwukwu kan̄. 7Ìfo, mè ìsi ìtumu ìnyi Pita, mè ebi udun̄ kan̄ kechilọ ibe ke Jisọs òkije isi Galili isisi ikup iban ebibi; ke ebibi mêchichini ọmọ me ere ya, ike îtumube inyi ebibi.”

8Mbiribọ ogwogwook ebibaan̄ cha me lek, ema esasa me uran-lek inan̄a me udọn̄ ya ilibi ekot ekot ifo. Kpesan̄a amọn inyi ene geege me oniin̄, mije ukpook.

Jisọs îsibi me isi kè Meri ogwu Magidala

(Mat 28:9-10; Jọn 20:11-18)

[ 9Mgbọ Jisọs ojomobe me mkpa me ewelegwe usen ògọgọọk Usen Mbuban, ìdasi isibi me isi kè Meri ogwu Magidala ogwu îrieen̄be ijo erumun̄ jaaba isibi me emen. 10Meri ogwu Magidala yi osisi ikpa inyi ebi melek Jisọs ekije. Mgbọ ya ema ekup me ufieejit, mè ikito ito. 11Mgbọ ema enọbe ibe ke Jisọs me ugwem; ke Meri ogwu Magidala îmun̄ lek kan̄, ema kpechieek.

Jisọs îsibi me isi ebi udun̄ kan̄ ene iba

(Luk 24:13-35)

12Sọntiik mgbọ iraraka, Jisọs osisibi kubọk ofifi ene me isi ebi udun̄ kan̄ ene iba, mgbọ ema ekije me oniin̄ ibesi gwun̄ ama ge. 13Ema egwugwu ikom ika inu Jeruselem, mè inikpa inu ya inyi ebi udun̄ kan̄ kechilọ. Ire, ebi udun̄ kan̄ cha kpechieek si.

Jisọs îsibi me isi akọp mè ebi udun̄ kan̄ ge

(Mat 28:16-20; Luk 24:36-49; Jọn 20:19-23; Ikwaan̄ 1:6-8)

14Me mgburudun̄, Jisọs onenisibi me isi akọp mè ebi udun̄ kan̄ ge cha mgbọ ema ekirie inorie, mè ikan̄-inu inyi ema, mije una ichechieek kiban̄, melek ike ema ekatbe ejit ijit ikọ ebi ìmumun̄ ọmọ mgbọ ọmọ ojomobe me mkpa iraka ekpabe inyi ema.

15Inenibe ema, “Ìje ìkana otutuuk linyọn̄, mè ìlook otutuuk ebilene ata etip eyi Awaji. 16Ene geelek òchechieek mè igwook mun̄, mênyan̄a ene ya. Ire, ogwu geelek ikachieekge, mêtip ogwugwa oyerebet mkpa. 17Ebi ìchechieek mêkaan̄ inu ijejeen̄ kechi: Ema mêsa erieen̄ n̄a irieen̄ ijo erumun̄ isibi me emen ene, ema mêtumu nke nke usem. 18Ire ema itet ubọk me lek ijijinu, mè ìyaka ire ibọk ke ema enwọ, unan geege ìkposak ema me lek. Ema mêtoon̄ ebi orukan̄ ubọk me ibot, mè lek ebi orukan̄ ònye.”

Jisọs îfo emen inyọn̄

(Luk 24:50-53; Ikwaan̄ 1:9-11)

19Mgbọ Okaan̄-ene Jisọs otumube ikọ isan̄a melek kiban̄, ebeben ọmọ ifo emen inyọn̄. Ọmọ okwekweek me agan̄ ubọk ulom Awaji. 20Ebi udun̄ kan̄ ekekijijen̄e ikana ikilook ata etip eyi Awaji me ere geelek. Okaan̄-ene okekigọọk ema igbaan̄ isi ikwaan̄, mè ikisa me owuwa inu ukechieen̄ ikirọ ikọ kan̄ echi ema ekitumu inye.]

Currently Selected:

Mak 16: Obolo

Highlight

Copy