Luk 11

Jisọs îjeen̄ ebi udun̄ kan̄ ubọk ekiriaak uriaak

(Mat 6:9-13; 7:7-11)

1Usen ge Jisọs onenije isi ere ge isi iriaak uriaak. Mgbọ îriaakbe uriaak ya isan̄a, ene ge me lek ebi udun̄ kan̄ obebe ọmọ, “Okaan̄-ene jeen̄ eji ubọk ekiriaak uriaak, ike Jọn ojeen̄be ebi udun̄ kan̄.”

2Jisọs onenitumu inyi ema ibe, “Enyi isiberiaak uriaak, ikeyi ke enyi mêkiriaak:

“Nte kiji, erieen̄ kwun̄ ikup mbuban.

Mkpulu kwun̄ inu.

3Nyi eji inorie usen geelek,

kubọk okinyi eji me usen me usen.

4Tele ijo kiji nyi eji,

kubọk eji ekitele inyi ebi ìrọrọ eji ilọ.

Kachieek ibe eji enin̄ me ntọ-mkpọ.”

5Jisọs onenito urọk ge inyi ema ibe, “Ire ene ge me etete kinyi isi uwu ogwu unene me ejit eririeen̄, mè isi itimi ogwu une kan̄ me ilaak, mè ibeek ibe, ‘Une kwun̄, nye lek fọọk emi owut fituru ita, mè ǹsa ǹsi ǹtet ichen, 6ke ogwu unene n̄a ge òkup me oniin̄ ije înigba uwu n̄a. Ǹkakaan̄ inu geege mbasa itet ichen ya.’

7“Ire, ogwu une kan̄ ya ofọfọọk ọmọ ibe, ‘Kayaka ìsisaak emi ke nra iwuuk lek igọbọ afọn̄, mè inin̄ uwu ilaak, emi melek nsabọn n̄a. M̀kpayaka ikọt inan̄a ikeke ininyi owu inu geege.’ 8Me atikọ, ǹkitumu inyi enyi ibe, ire ogwu unene ya ìkanan̄a ìkeke ìninyi ene ya inu geege mije îrebe unene kan̄, ìkpolọlọ inanan̄a ikeke ininyi ene ya otutuuk inu geelek îweekbe, mije îkpọkpọ itet lek inye ikibeek, ìkalibi esip.

9“Ikeya si, ǹkibe enyi: Ìbeek, ke mênyi enyi. Ìweek, ke enyi mêweek imun̄. Ìtọbọ ubọk me isotu, ke mêgwuku inyi enyi. 10Mije, ogwu ibeek, môbọkọ inu îbeekbe. Ogwu iweek, môweek imun̄. Ogwu itọbọ ubọk me isotu, mêgwuku inyi.

11“Enyi ebi ìrere ute, ìre ekene me lek kinyi ke ogwu gwun̄ môdo irin̄, mè ene ya isi imọnọ ijijinu isa inyi? 12Sà ìre ekene ke ogwu gwun̄ môdo nkwa unọn, mè ene ya isi itet eferen̄ inyi ogwu gwun̄? 13Ire enyi ebi ijo irọrọ iriọọn̄ ubọk ekinyi bọn kinyi ata inu, ìre enyi kpefat ikeek ibe ke Nte kinyi ogwu òkup me emen inyọn̄ môria Ekwukwu Mbuban inyi ene geelek òbebeek ọmọ?”

Ebi ene ebe ke Jisọs ìkisa unye kè Bejibun isi ikwaan̄

(Mat 12:22-30; Mak 3:20-27)

14Îkaan̄ mgbọ ge Jisọs orieen̄be ijo erumun̄ mbuuk isibi me emen gwun̄ enerieen̄ ge. Mgbọ ijo erumun̄ ya onan̄abe isibi, ogwu mbuuk ya obebene ikitumu ikọ. Inu ya okeke otutuuk ebi ìkup me ere ya chieen̄ enenen. 15Ire, usini ebi ìkup me ere ya, mè imun̄ inu ya òrọrọ ekekitumu ibe ke Jisọs ìkisa unye kè Bejibun, ogwu ibot ijo erumun̄, irieen̄ ijo erumun̄ isibi me emen ene. 16Ire, usini ene eweweek itọtọ Jisọs ikpọ, mè ibe irọ-nu inu ijejeen̄ ge, inyi ema esa eriọọn̄ ibe ke unye ke ogwugwu ìnan̄a me ubọk Awaji.

17Ire, Jisọs orọriọọn̄ ekiket kiban̄, mè itumu inyi ema ibe, “Ido geelek ebi ìkup me emen ekitim akọn̄ ikeme lek kiban̄, ido ya ìbochechep. Ikeya si, uwu geelek ebi ìkup me emen echebe lek, mè ikirọ ikeme lek kiban̄, uwu ya ìkpokeke. 18Enyi ekibe ke emi ǹkisa unye kè Bejibun irieen̄ ijo erumun̄ isibi me emen ene. Ǹdo-nu enyi, ire ebi ìkigọọk Setan ikitim akọn̄ ikeme lek kiban̄, ìre mkpulu kè Setan ìbojeje ikeke? 19Ire emi nkisa unye kè Bejibun ilap ijo erumun̄ isibi me emen ene, ìre kpasi unye ke ebi kinyi ekisa ilap ijo erumun̄ isibi? Eya orọ, îre ebi udun̄ kinyi cha gaalek ebesibi oyerebet me ibot kinyi. 20Ire, ire emi ǹkisa unye Awaji irieen̄ ijo erumun̄ isibi me emen ene, eya ìsibi ibe ke mkpulu eyi Awaji îra ire etete kinyi.

21“Ire ene ogwu ònyenye lek ikpulu nroon̄ akọn̄ kan̄ itap me lek, mè ikeke ikibem uwu kan̄, kpunu ogwu òbokọt ichak ubọk me lek inu geelek ene ya okaan̄be. 22Ire, ire ogwu ònyenye lek igak ene ya initim akọn̄ me lek ene ya, mè itim ikpan̄ ene ya, môkpulu otutuuk nroon̄ akọn̄ cha ene ya osabe itoon̄ ejit, mè ikpulu otutuuk inu geelek ene ya okaan̄be iche inyi lek kan̄ mè ebi melek kan̄.

23“Ogwu ikakekege ìnyi emi ìkijeje ikeme emi. Ikeya si, ogwu ikagọọkge emi ìkititiin̄, ene ya ìkiyiyiyala.

24“Ijo erumun̄ isinan̄a me emen ene isibi, ìkijijen̄e ikana inyọn̄ ijọn̄ òchachat ikiweek ere ìboluk. Ire ìkakọt ìweek ìmun̄, îra itumu me lek kan̄ ibe ke ọmọ môgwu ikom iyaka ifo uwu kan̄ ya ere ọmọ onan̄abe isibi. 25Isinire uwu kan̄ ya, mè imun̄ ibe ke mîchan uwu ya itana, mè inen̄e inu geelek isun̄ me irek, 26îra igwu ikom, mè isi isa ofifi ijo erumun̄ jaaba ìkirọ inu afa afa igak ọmọ igbaalek inu. Ema mîra ininin̄ emen uwu ya iluk. Sa me ikeyi, irek ene ya îra ifieek me mgburudun̄ mgbọ ya igak ubọk îkupbe me adasi.”

27Jisọs òkitumu ikọ ya me otu, enenwaan̄ ge me etete ife cha otataan̄ ukpo itumu inyi ọmọ ibe, “Ugbana ikup inyi ogwu enenwaan̄ òmaman owu, mè inyi owu ebe, mè ikpukpo owu isibi.” 28Jisọs ofọfọọk ogwu enenwaan̄ ya ibe, “Iin̄, ire, ugbana òmimin igak eya môkup inyi ebi geelek ìnọnọ ikọ Awaji, mè ikirọ.”

Jisọs îjit irọrọ inu ijejeen̄

(Mat 12:38-42)

29Mgbọ ogbogbo ene egbukube inu inisọkọ me lek ife cha, Jisọs otutumu inyi ife cha ibe, “Enyi ijo ebi mgbọ kechi ekiweek inu ijejeen̄. Ire, kpebejeen̄ enyi inu ijejeen̄ geege ilọ me lek ikween̄ inu ònan̄a me lek kè Jona. 30Ike Jona ogwu nriran orebe inu ijejeen̄ inyi ebi ama Ninife, ikeya si ke Gwun̄ Ebilene obore inu ijejeen̄ inyi enyi ebi mgbọ kechi. 31Me Usen Oyerebet Awaji, ogwu Ubọọn̄ Enenwaan̄ ònan̄a me Agan̄ Osiki#11:31 I Ubọọn̄ 10:1-10; II Mfuf 9:1-12 mônan̄a ikeke isibi ata-ikọ ikeme enyi ebi mgbọ kechi, mè itumu itip enyi. Mije, ogwu ubọọn̄ enenwaan̄ yi ìnan̄a me ama kan̄ me ujọn̄ọ ere ije inigwook me ere keyi inenigban̄ ikọ iriọọn̄-inu eyi ogwu ubọọn̄ Solomọn okitumu. Mgbọ yi, ogwu òmimin igak Solomọn òwa me ere keyi. 32Me Usen Oyerebet Awaji si, ebi Ninife mênan̄a ikeke isibi ata-ikọ ikeme enyi ebi mgbọ kechi, mè itumu itip enyi. Mije, ema mîgwu ikom mgbọ Jona otumube ikọ Awaji inyi ema.#11:32 Jona 3:5 Mgbọ yi, ogwu òmimin igak Jona òwa me ere keyi.

Chieen̄ ene okinyi akpalek ene utoon̄

(Mat 5:15; 6:22-23)

33“Kpunu ogwu òkimin mkpukan̄, mè iben isi iyik me ere òlelet, mè ìre isa okwa ikana ichit. Kpan̄asi ikeya, ìboben itoon̄ me otu ngugọọn̄, inyi ebi geelek ìninin̄ uwu ya ekesa utoon̄ kan̄ emọọn̄ inu. 34Chieen̄ kwun̄, ọmọ ore mkpukan̄ inyi akpalek kwun̄. Ire kpunu inu geege òkwekwek owu chieen̄, otutuuk lek kwun̄ ìbokup me utoon̄, kpunu inu geege owu òkpokọt imọọn̄. Ire, ire ikaan̄ inu òkwekwek owu chieen̄, otutuuk lek kwun̄ ìbokup me emen ikpele udun. 35Eya orọ, kachieek ibe utoon̄ eyi òkup me emen kwun̄ ikana ire udun. 36Ire otutuuk lek kwun̄ ikup me utoon̄, kpunu agan̄ geege òkukup me udun, otutuuk lek kwun̄ ìbore utoon̄ utoon̄, kubọk utoon̄ mkpukan̄ okitoon̄ ikana owu me lek.”

Jisọs îgana ere inyi ebi Farisi mè ebi ìjeen̄ Ikan

(Mat 23:1-36; Mak 12:38-40)

37Mgbọ Jisọs otumube ikọ cha isan̄a, ogwu Farisi ge onenigwen ọmọ ibe inu ichen me uwu kan̄. Jisọs ogọgọọk ije isi uwu ya, mè igọọk isiki ikweek me lek ikasi ikirie inorie. 38Mgbọ ogwu Farisi ya omun̄be ibe ke Jisọs ìkadasi ìgwọk ubọk sabum înirie inorie, kubọk orọmijọn̄ kiban̄ okupbe, ikeke ọmọ chieen̄. 39Jisọs orọriọọn̄ ejit kan̄, mè itumu inyi ọmọ ibe, “Enyi ebi Farisi ekigwọk udun̄ ekpen̄ mè udun̄ alala itana, ire, me emen ejit kinyi, chieen̄ ile mè inu ikpak ojot. 40Enyi ebi burubut kechi! Ìre ìkare Awaji ogwu òrorom udun̄ orom si agan̄ emen? 41Ìsa inu òkup me emen ekpen̄ mè alala kinyi cha ìche ìnyi ebi ugbọọn̄, ke inu geelek enyi ekaan̄be môtana me isi Awaji.

42“Môfieek inyi enyi ebi Farisi! Enyi ekichieek mkpa ikinyi Awaji irek ge me etete akọp irek me ibot asabọn inwan̄ uti ekisa irọ inorie itop, kubọk mînt, mè rû, mè ofifi esese asabọn inwan̄ òkup me uko, ire, mè ikikpọ chieen̄ ilọ me lek isisibi unen oyerebet, mè imumun̄ Awaji me chieen̄. Kpan̄asi ikeya, isisibi unen oyerebet, mè imumun̄ Awaji me chieen̄ ke enyi mekikpọ chieen̄ me lek, mè ikikeek si inyinyi Awaji irek ge me akọp irek.

43“Môfieek inyi enyi ebi Farisi! Enyi ebi ìkima ikwekweek me inyọn̄ ikasi esun̄be inyi ebi ibot me uwu ntitiin̄, mè ikima si ibe ebi ene eketọp enyi ata amọn eyi umin me emen ewe ere ene ewabe.

44“Môfieek inyi enyi ebi Farisi, mije enyi ekup kubọk udọn̄-ufuun̄ òlelet. Ogwu ikariọọn̄ge, mè isi ije isaba me inyọn̄, îra ikana ogwu ikatanage me isi Awaji.”

45Ene ge me lek ebi ìjeen̄ Ikan cha otutumu inyi Jisọs ibe, “Ogwu Ijejeen̄, me emen ikọ chi okitumu, riọọn̄ si ibe ke owu gwa òkitumu ikọ inaan̄ eji me lek.”

46Jisọs ofọfọọk ibe, “Môfieek inyi enyi ebi ìjeen̄ Ikan, mije, uyọt uyọt ikan enyi ekigo inyi ene ìkup kubọk enyi ekiben ulobo akpan ikeme ene. Ire, enyi me lek kinyi kpechieek ichachak ubọk me lek akpan ya igọọk ibeme. Ìrere otubọk kinyi, enyi kpechieek ibe ichak me lek.

47“Môfieek inyi enyi, mije, enyi ekiwat ujuja ewuuk me inyọn̄ udọn̄-ufuun̄ ebi nriran ebi nte nte kinyi ekpan̄be. 48Ike ebi nte nte kinyi ekpan̄be ebi nriran cha isan̄a, enyi enenikibala udọn̄ kiban̄, eya ìkijeen̄ ibe ke inu ebi nte nte kinyi cha erọbe îtop enyi me lek. 49Îre mije inu yi ke Awaji osa me emen iriọọn̄-inu kan̄ itumu ibe ke ọmọ môria ebi nriran mè ebi otuchieen̄ kan̄ ijet enyi; ke enyi mêkpan̄ usini kiban̄, mè itutuku usini. 50Eya orọ, eje otutuuk ebi nriran ekpan̄be, bene me karake linyọn̄ obenebe na re cherekeyi, ìtoon̄ enyi ebi ukot keyi me ibot. 51Me atikọ, ǹkitumu inyi enyi ibe ke Awaji ìkpolọlọ isusulu enyi ebi ukot keyi osusut, mije eje otutuuk ife cha, bene me lek eje kè Eben#11:51 Ibeb 4:8 na re lek eje kè Jekaraya#11:51 II Mfuf 24:20-22 ogwu ekpan̄be me emen Uwu Mbuban, me agbagba ntook ngwugwa melek Ere Mbuban.

52“Môfieek inyi enyi ebi ìjeen̄ Ikan, mije, enyi mîchit isotu eyi ifuk-ibot mkpulu eyi Awaji, mè imọnọ atafi isan̄a, inyi ebi ene ekakọt ìgobo Ikọ Awaji ìtet. Enyi me lek kinyi, ninin̄ mkpulu ya, enyi kpenin̄, ire, enyi enenikana ukput inyi ebi geelek ìweweek iraraka inin̄.”

53Mgbọ Jisọs otumube ikọ chi isan̄a, mè inan̄a me ere ya, ebi Farisi mè ebi ìjeen̄ Ikan ebebene me mgbọ ya ikitumu ikọ ikeme ọmọ ijo ijo, mè ikido ọmọ owuwa idodo, 54isasa ileke ọmọ ikọ me otu, inyi esa me ikeya etet ọmọ.

Currently Selected:

Luk 11: Obolo

Highlight

Copy