Luk 10

Jisọs îria akọp ene jaaba mè iba isibi

1Mgbọ eya orakabe, Okaan̄-ene onenigobo ofifi akọp ene jaaba mè iba me etete ebi ìkigọọk ọmọ me udun̄, mè iria ema isibi ene iba iba, ibe edasi eje esi ama geelek, mè ere geelek ọmọ obosi. 2Sabum ema enije, îtumu inyi ema ibe, “Mfut eberọkọ me uko îwa enenen. Ire, ebi ìberọkọ mfut cha ìre ene inen mè inen gaalek. Eya orọ, ìbeek Okumugwem, ogwukaan̄ ikwaan̄ uko, ibe iria ebi ikwaan̄ itap me uko, inyi enerọkọ mfut me uko kan̄. 3Mgbọ yi, ìje. Ǹkiria enyi kubọk arọọn̄ isi itap me etete ibo oron. 4Ikamọnọ akpa ikpoko. Ikamọnọ akpa ubọk. Ikamọnọ si ikpukot. Ikatọp ene geege amọn me oniin̄.

5“Enyi isibenin̄ uwu geelek, ìdasi ìtọp ebi ìkup me uwu ya amọn ibe, ‘Esuuk ikup inyi enyi!’ 6Ire ogwu esuuk ikup me uwu ya, esuuk kinyi môbia me lek ene ya. Ire kpunu ogwu esuuk me uwu ya, esuuk kinyi môyaka ika igọọk enyi. 7Enyi isinin̄ uwu ya, ìbia me ere keya, mè ìkirie mè ìkinwọ inu geelek ebi uwu ya mêkinyi enyi. Mije, îgbe ibe ogwu òsi ikwaan̄ ibọkọ mkpukpe ubọk ikwaan̄ kan̄. Ikakiluk ìkana ere, mè ìkinan̄a me uwu ge ìsi ofifi uwu. Ìluk me uwu yaage gaalek.

8“Ama geelek enyi enin̄be, ire ebi ama ya ibọkọ enyi itap, ìrie inu geelek ema esan̄abe isibi isa itet enyi ichen. 9Ìgwa ebi orukan̄ ìkup me ama ya, mè ìtumu ìnyi ebi ama ya ibe ke mkpulu eyi Awaji îkup mgbet me lek kiban̄. 10Ire, ama geelek enyi enin̄be, mè ire ebi ama ya kpebọkọ enyi itap, ìje ìkana otutuuk lek oniin̄ ama ya, mè ìkitumu ìnyi ema ibe 11ke enyi mîgen̄ achiaan̄ ijọn̄ ama kiban̄ eyi òkup enyi me akajit ukot igwook inyi ema, isasa irọ inyi ema eriọọn̄ ibe ke unaan̄-ejit Awaji môkeme ema. Ìtumu si ìnyi ema ibe ke mkpulu eyi Awaji îkup mgbet. 12Me atikọ, ǹkitumu inyi enyi ibe, me Usen Oyerebet, môfieek enenen inyi ebi ama ya igak ebi ama Sodọm.”

Jisọs îfieek otu inyi ebi ama ekachieekge me lek kan̄

(Mat 11:20-24)

13Jisọs onenitumu ibe, “Môfieek inyi enyi ebi ama Korajin, môfieek si inyi enyi ebi ama Betisaida. Mije, mebe ke îre me Taya mè Sidọn ke merọ otutuuk inu ukechieen̄ echi erọbe me emen ama kinyi, kè ebi ama iba chi etap ofọnti ufieejit, mè efufuku lek me ntọn̄ mije ubọnọlek, mè ègwu ekom me ijo kiban̄ karake ukot ukot. 14Eya orọ, me Usen Oyerebet, môfieek enenen inyi enyi igak ebi ama Taya mè Sidọn. 15Enyi ebi ama Kapanọm, ìre enyi ekikeek ibe ke mêbene enyi ifo inyọn̄, inyi enyi ekana ebi ama òmimin ichit? In̄-in̄, ebesisiki enyi itap me ama ekwukwu.”

16Jisọs onenitumu inyi ebi udun̄ kan̄ cha ibe, “Ene geelek ògbagban̄ utọn̄ inyi enyi, ìgban̄ utọn̄ inyi emi. Ene geelek òjijit enyi, ìjit emi. Ikeya si, ene geelek òjijit emi, ìjit Nte n̄a ogwu òraria emi inu.”

Akọp ene jaaba mè iba cha mîka

17Akọp ene jaaba mè iba cha, ebi Jisọs oriabe isibi, egwugwu ikom ika me unwọọn̄, mè inikpa inyi Jisọs ibe, “Okaan̄-ene, ijo erumun̄ si îsiki ibot inyi eji me erieen̄ kwun̄.”

18Jisọs otutumu inyi ema ibe, “Mmun̄ Setan okinan̄a me isinyọn̄ kubọk omumen-inyọn̄ irọn̄ me ijọn̄. 19Ìkpọ, nnyi enyi unye ibe enyi ejak ukot me inyọn̄ ijijinu mè inyọn̄ eferen̄, mè etim ekpan̄ otutuuk unye geelek ogwu ochicha okaan̄be. Kpunu inu geege òbokọt isak enyi unan me lek. 20Ire, ikanwọọn̄ unwọọn̄ mije ijo erumun̄ osikibe ibot inyi enyi. Kpan̄asi ikeya, ìnwọọn̄ unwọọn̄, mije, mîge erieen̄ kinyi me emen inyọn̄!”

Jisọs înwọọn̄ unwọọn̄

(Mat 11:25-27; 13:16-17)

21Me ike mgbọ ya, unwọọn̄ ojojot Jisọs ejit sa me unye Ekwukwu Mbuban. Itutumu ibe, “Ute, Ogwukaan̄ emen inyọn̄ mè linyọn̄, ntọn̄ owu, mije owu oletbe otutuuk inu chi me chieen̄ ebi ìriọọn̄ inu, mè ebi ìkakaan̄ ikpele ifuk-ibot, mè inichili ibook inyi ebi ìkup kubọk asa nsabọn ekariọọn̄ge inu geege. Iin̄, Ute, ntọn̄ owu, mije, îre ikeyi ke îneme owu irọrọ.

22“Nte n̄a îkana otutuuk inu itap emi me ubọk. Kpunu ogwu òrọriọọn̄ ogwu emi, Gwun̄ Awaji, nrebe ilọ me lek Nte n̄a gaalek. Kpunu si ogwu òrọriọọn̄ ogwu Nte n̄a orebe, ilọ emi ogwu Gwun̄ melek ebi geelek înemebe emi ichichili Nte n̄a ijeen̄.”

23Jisọs onenikana isi ikpọ ebi udun̄ kan̄, mè inween̄ lek itumu inyi ema ibe, “Enyi ebi ìsasa chieen̄ kinyi imun̄ inu chi enyi ekimun̄, Awaji îgbana enyi enenen. 24Mije, ǹkitumu inyi enyi ibe ke owuwa ebi nriran ukot ikaan̄ mè ebi ubọọn̄ mîweek imumun̄ inu chi enyi ekimun̄, ire, kpemun̄. Mîweek si inọnọ inu chi enyi ekinọ, ire, kpenọ.”

Urọk atata ogwu Sameria

25Usen ge, ogwu enerieen̄ ge òkijeen̄ Ikan oneniweek itọtọ Jisọs ikpọ, mè inido ọmọ ibe, “Ogwu Ijejeen̄, ìre keke ke mbarọ mè ikaan̄ ugwem ikakaan̄ge itata?”

26Jisọs ododo ọmọ ibe, “Ìre keke ke ege me Ikpa Mbuban? Ìre inu egebe me ere ya ìsibi keke?”

27Ogwu enerieen̄ ya ofọfọọk ibe ke ege me Ikpa Mbuban ibe, “Ma Okumugwem Awaji kwun̄ me otutuuk ejit kwun̄, mè otutuuk ibot ejit kwun̄, mè otutuuk unye kwun̄, mè otutuuk ekiket kwun̄,#10:27 Ikan 6:5 mè ma ogwu melek kwun̄ kubọk omabe akpalek kwun̄.#10:27 Lib 19:18”

28Jisọs onenitumu inyi ọmọ ibe, “Owu ofọọk itat. Rọ si ikeya, ke owu môkaan̄ ugwem ikakaan̄ge itata.”

29Mije ogwu enerieen̄ ya oweekbe ijejeen̄ ebi ene ibe ke inu ọmọ okirọ îtat, inenido Jisọs ibe, “Ìre ekene ore ogwu melek n̄a?”

30Jisọs onenito urọk ge ibe, “Ogwu enerieen̄ ge oninan̄a me Jeruselem ikije isi Jeriko, mè inije inin̄ emen ubọk ebi inọ afa. Ebi inọ cha etetet ene ya, mè isut ọmọ igbet mkpa, mè ibọkọ otutuuk inu îkaan̄be, mè ijuuk ọmọ itele ikeya me ijọn̄, mè ilibi inan̄a. 31Ogwu ngwugwa ge onenikije me oniin̄ yaage iboniraka. Mgbọ îmun̄be ogwu enerieen̄ ya olaakbe me agba oniin̄ ya, isasaba ifo agba oniin̄ agan̄ keyilọ isi ije iraka isi uyọrọlek kan̄. 32Ikeya si, ogwu otoko kè Libai ge, òkigọọk itap ubọk isi ikwaan̄ me Uwu Mbuban, onunu ibonije iraka. Mgbọ îbenebe chieen̄ imun̄ ene ya olaakbe me agba oniin̄, isasaba si ifo agba oniin̄ agan̄ keyilọ isi ije iraka isi uyọrọlek kan̄. 33Ire, ogwu Sameria ge onenije si iboniraka me oniin̄ ya, mè inire ere inu ya orọbe. Mgbọ îmun̄be ene ya olaakbe me agba oniin̄, ikakaan̄ njijin me lek ene ya, 34mè ije inin̄ lek, mè isa aran̄ mè miin̄ itoon̄ me chieen̄ unan cha, mè isa ekwut ibọp ichit chieen̄ unan cha, mè ibene ene ya itoon̄ me inyọn̄ inyinya akpan kan̄, mè isa ije isi uwu isiki-efuuk ge me oniin̄ ya, mè ikpọ chieen̄ me lek iwele egwe. 35Mgbọ egwe owelebe, inenikana ene ya itap me ubọk ogwu ibot uwu isiki-efuuk ya, mè itap ubọk me akpa imọnọ dinari iba inyi, mè ibe ikpọ chieen̄ me lek ogwu enerieen̄ ya inyi ọmọ. Ire ikaan̄ ofifi ikpoko geelek îfiatbe me lek ogwu enerieen̄ ya, ọmọ isiboraka ika, ke ọmọ môyaka ikpe ogwugwu.”

36Mgbọ Jisọs otobe urọk ya isan̄a, inenido ogwu òjeen̄ Ikan ya ibe, “Me nkeek kwun̄, ìre ekene me etete ene ita cha, ore ogwu melek ogwu enerieen̄ ya ogwu ebi inọ afa cha esulube?”

37Ogwu òjeen̄ Ikan ya ofọfọọk ibe ke îre ogwu òkakaan̄ njijin me lek ene ya.

Jisọs obebe ọmọ, “Fo, mè si rọ si ikeya.”

Jisọs îsi uwu ebi Meri mè Mata

38Mgbọ Jisọs mè ebi udun̄ kan̄ eyakabe ibene ije kiban̄ ikije ibesi Jeruselem, ema enenire gwun̄ ama ge. Me ere ya, ogwu enenwaan̄ ge ekigwen Mata onenibọkọ ema itap. 39Mata îkaan̄ ngwan̄ enenwaan̄ ge ekigwen Meri. Meri osisiki ikweek irek me agba ukot Okaan̄-ene ikigban̄ inu îkijeen̄. 40Ire, Mata okekikwukwulu me lek inorie ebesa itet Jisọs mè ebi udun̄ kan̄ ichen. Mgbọ Mata omun̄be ibe ke Meri ìkanu ìnitap ubọk ìnyi ọmọ me lek ikwaan̄, ijeje isi lek kè Jisọs, mè ibe ọmọ, “Okaan̄-ene, ìre înwọn ike ngwan̄ n̄a ojuukbe emi gaalek itele me lek ikwaan̄? Tumu nyi ibe inu initap ubọk inyi emi ma!”

41Jisọs obebe ọmọ, “Mata! Mata! Owu òkisisaak lek kwun̄, mè ikifieek owot me lek owuwa inu. 42Ire, inu ge gaalek okup me uyọt ichit. Inu ya ke Meri ogobo inyi lek kan̄. Me atikọ, kpunu ogwu òbobọkọ inu ya isan̄a me ubọk kan̄.”

Currently Selected:

Luk 10: Obolo

Highlight

Copy