Makekeng 6

Anutungo Mose monggoc meisinggeec

1Ifi deu Kebungo Mose yofi edeec, “Ni yaguc Parecoaru faka hania hania ammiba hembesena. Ni marina kuctoayagocngo ngombonggeba yeng uaac ebicfunac yungecyunuu kenggecde. O, ye Isracelac kisicfunac ngeni kucgoc yombong kporacngunuudeac ngombonggeba ngeni Aigitabangec wama kenggecde.”

2 # Fing 17:1; 28:3; 35:11; Mke 3:13-15 Ifi dema torokpema Mose yofi edeec, “Nennoc Kebu. 3Nga ni Awraham, Itsak nga Yacakow fingecyemmeba yeni Anutu kuctoa mingina,#6:3 Anutu kuctoa mingina Imoc hebiraio yoacfu El Shaddai. kpacna imoc negenggec. Kpacna Kebu#6:3 Kebu. Kebu Hebiraio mitiu YHWH nande nga kpac imoc kpetiac andeac Isracelngicngac yeneng imoc mitiu hemma Adonai ifisac kpacandae. imoc mekperagima haniana mi deficgeyemmeai. 4Nga yeni Kenacan bangecfu kuric kecgec naso imohai ni yenigoc dzadzahac mema imoc yemmebadeac deai. 5Anu aigitangic yeneng Isracelngicngac wanac meyunuma ua ebiria deyemmegec mekecgec anu ni yeneac ubaebicac kiacaro negemma dzadzahacna meai, imoc negemba fekecde.

6Imocac Isracelngicngac yofi edeyununa, ‘Nennoc Kebu, anu aigitangic yeneng mengunuma uatoa ebiria yombong ngemmema ngombongngunuma kecgec neng imohacnac onggongngunuma hesicngunuba kenggecde. Ni marina sinema yoacngina dema memetingtoa yemmema ngeni uaac ebicfunac yungecngunuba kenggecde. 7Yungecngunuba kenggec ni mengunuba neanna ngicngacareng anggecde nga ni Anutungina amma kecbade. Ngeni aigitangic yeneac bageu wanac kecma faficua ebiria mema kecmagec ni mengunuma imohacnac hesicngunuba kenggecde. Ifi fingeru ngeni yofi negentegecyombonggegecde, ni neannaoc Kebu Anutungina. 8Nga ni marina miacma Awraham, Itsak nga Yacakow bangec yemmebeso deseriyemmeai, ihainoc hesicngunuma emma ngemmeba imocac mingina anggecde. Nennoc Kebu.’ ”

Ubanginaac kuha mayombonggeec

9Mose ye yoac imoc Isracelngicngac edeyunudaru yeni ine ubangina mayombonggeu kecgec nga wanacngic kekec nga faficua kpendzengtoayagoc anecac kedzac mi kpegec.

10Anu Kebungo Mose yofi edeec, 11“Ge kemma Aigita ngictau Pareco ye Isracelngicngac bangehaunac nga uaac ebicfunac yungecyunuu kenggecdeac edena.”

12Ifi deu Mose ye Kebu yofi edeec, “Negennec, yoac deba Isracelngicngac yeni neac yoacac kedzac mi faidau nga ni yoac dedeac negen negentoa mong mi fenendeac deba Parecongo kedzac naric mi kpeude.”

13Ifi deu Kebungo ine Mose nga Aharon dederecge ayecmema yoac yofi deec, “Ngeri Isracelngicngac nga Aigita ngictau Pareco yofi edeyunubesera, ‘Isracelngicngac Aigitabangecfunac wangecyunugec kembisia.’ ”

Isracel enarafocngina

14Isracel enarafocngina yeneac kpacareng sasawa yofi, Isracel morocmedaha Recuwen yeac medacfora yeni kpacngina Hanok nga Pallu, Hetseron nga Karami. Ngic imoc yeninoc Recuwenggac medacfora. 15Nga Simeconggac medacfora yeni kpacngina Yemucel, Yamin, Ohad, Yakin, Tsohar nga Sacul. Sacul ye ine kenacangngac yeac medac. Imoc Simeconggac gboricfora.

16 # Bki 3:17-20; 26:57-58; 1Ngts 6:16-19 Nga Lewi medacfora fingecgec, yeneac kpacngina Gereson, Kehat nga Merari. Lewi ye kifaya 137 ammanu homeec.

17Nga Geresonggac medachora yohockang imoc Liwni nga Simeci nga yereac arengfocngira.

18Nga Kehat yeac medacfora Ameram, Itsahar, Heweron nga Udzicel. Kehat ye ine kifa 133 kecma homeec.

19Nga Merari yeac medachora yohockang imoc Maheli nga Musi. Ngic imoc yeni Lewiac kisicfunac nga yenearunac fingecsahe arenga arenga fingeceregec.

20Anu Ameram ye mamaac naina Yokewed meu yennoc Mose nga Aharon meyuruec amma ye kifa 137 kecma homeec.

21Yitsahar medacfora yeni yofi, Kora, Nefeg nga Dzikiri.

22Udzicel medacfora yeni yofi, Misacel, Eletsafan nga Siteri.

23Aharon ye Amminadawac naroanga, Naheson naina, kpara Elisewac meu yeng Nadaw, Awihuc, Elecadzar nga Itamar meyunuec.

24Kora medacfora yeni yofi, Assir, Elekana nga Awicasaf. Ngic imoc yeninoc Koraac gboricfora.

25Aharon medaha Elecadzar ye Puticel naroangfora yenearunac mong meu yeng Pinehas meec. Ngic imoc yeni Lewiac kisicfunac arenga arenga keceregec, yeneac enarafocngina.

Aigitabangecfunac wangecyunuec mabisia

26 Kebungo Mose nga Aharon, ngic imocnoc edeyuruma deec, “Ngeri isracelngic habusoc arengyunuma Aigitabangecfunac wangecyunuec mabisia.” 27Ifi deu Mose nga Aharon yereng Isracelac ngicngacareng Aigitabangecfunac wangecyunugecdeac Aigita ngictau Parecoaru yoac ua meoc.

28Anu Kebungo Aigitabangecfu Mose yoac edeec, 29naso imohai yofi deec, “Nennoc Kebu, imocac ni yoac sasawa edeguduae, imoc Aigita ngictau Pareco ededacbesena.”

30Ifi deu Mosengo ine yofi dema edeec, “Negennec, ni yoac dedeac kuc mong mi fenendeac anu Pareco ye neac yoacnaac kedzac naric mi kpeude.”

Currently Selected:

Makekeng 6: Ded

Highlight

Copy