Makekeng 5
5
Mose nga Aharon yeri Parecoyoac edeoc
1Ifi fingeru Mose nga Aharon yeri Parecoaru kemma yoac yofi dema edeoc, “Negennec, Kebu Isracel neneac Anutungo yofi dede, ‘Ge ngicngacfocna uaac ebicfunac yungecyununa yeni bangeckisiu kemma eweheihei anemma neac nasotoaac tacbisia.’ ”
2Ifi deec Parecongo ine yofi deec, “Kebu ye merac? Ni yoara negentofoho amma Isracel ngeni kenggecdeac naric mi faingunuba kenggecde, kpac yombong. Kebu ye merac, imoc mi negemmiduaeac amma naric mi faiyunuba kenggecde.”
3Ifi deu yereng deoc, “Hebiraiongicngac neneac Anutu, ye neni fingecnemmedac amma, hafeihomecngo me dzikacngo memanganenunubacac sifu negennemmena wenac harebec bangeckisiu kengkecma Kebu Anutuninaac sesegerec ohomibisina.”
4Ifi deec, Aigita ngictaungo edeyuruec, “Mose nga Aharon, ngeri nocac ngicngac yeneng uangina wagecdeac dedape? Ngeri monggoc dzigenema uangirau kenec!” 5Ifi dema yofi edeyuruec, “Negendape, bangecnau ngicngac yeni kpetengina engyombonggemanu ngeri ine uangina hesima eng tacgecdeac dedape.”
Kpindzingsira mi yemmegec
6Anu Pareco ye wenac imohaingoc uaac keracnatang mangana nga ngicngacareng enarafocngina uangina garenggegec imoc yeni yofi dederecge ayemmeec, 7“Ngeni ngicngac kpindzingsira yemmegec gbakingo amameme hoc meandae, imoc warac anggec, ifi isoc monggoc mi yemmebisia. Yeni yenaoc kemma kpindzingsirangina mekpedzuc ambisia. 8Amma warac warac hoc ohogecdeac deyec deyemmeaac kpete imoc mong mi memama imocngoc meficgebisia. Imocac hania yofi, yeni oyong kecma yofi dedae, ‘Ge yungecnununa kemma Anutunina sesegerec ohomibisina.’ 9Ngicngac imoc yeni uatoanginagoc kecma ikocyoacac kedzac mi faigecdeac ngeni yeneac witinginau ua torokpema ebiriangoc monggoc faibisia.” 10Ifi deu uaac keracnatang mangana meyunugec nga ngicenara ua garenggegec yeneng kemma ngicngac yofi edeyunugec, “Pareco ye yofi dede, ‘kpindzingsira monggoc mi ngemmenide. 11Ngeni ngenaoc ihai me ihai kemma meficgema mebisia. Anu uanginaac kpete ine mong mi memanide.’ ” 12Ifi degec ngicngac yeni kpindzingsira megecdeac tipactohoma kemma kpindzing mekpedzuc amma Aigitabangectoau kendacgec. 13Anu uaac keracnatang mangana yeni ine fafic monggoc ayemmema degec, “Kpindzingsira ngemmeni wenacsoc ua meandae, ifi isocngoc hoc kpetea wenacsoc medacbisia.” 14Anu Parecoac uaac keracnatang mangana, yeni Isracel yeneac uagareng bic faiyunuyunuya homac yunuma yofi kpesiyemmegec, “Ngeni nocac warac warac hoc ua dengemmeni megec kpetea siriha imocngoc worang nga yaguc mi medau?”
Isracelac uagareng Parecoaru kenggec
15Ifi anggec Isracel uagareng yeni Parecoaru kemma kpacma yofi degec, “Enactofoc tofohofocga neni nocac ifi anemmenec? 16Negennec, yeni kpindzingsira mong mi nemmema eng yofi edenunudae, ‘Hoc ohobisia!’ Ifi dema homac nunudae. Nga kopocsic imoc geac ngicngacfocga yeneac ande, imoc neneac kpac.”
17Ifi degec deec, “Ngeni oyong yeneac oyong yombong amma kecdae. Imocacnoc yofi edenudae, ‘Ge uaac ebicfunac yungecnununa neni kemma Kebunina hosuc ohominide.’ 18Imocac amma ngeni yaguc kemma uangina megec, kpindzingsira ine mi ngemmegecde nga sifu hoc kpetea dengec dengemmea, imoc mema faigec habeso.”
19Ifi edeyunuu Isracel yeneac uagareng yeni yofi negenggec homac ebiriec, “Ngeni wenaha wenaha hoc kpetea meficgegecdeac dedea, imoc mong mi wagec mabeso.”
Uagareng yeni Mose nga Aharon yerigoc yoac degec
20Anu yeni Parecoarunac mama Mose nga Aharon yeri tomai nammaec meficyuruma 21yofi degec, “Ngerennoc dzikacac beang Pareco nga enactofoc tofohongicfora yeneac maringinau faiec yeneng ngereac amma neneac modzongina homac yombong tiu kpebucnunugecdeac negendae. Imocac amma Kebungo angammemengira hemma isingnguruma turunga kpoungecmebeso.”
22Ifi degec Mose ye Kebuaru monggoc dzigenema desambicammima yofi deec, “O Kebu, ge nocac ngicngac yomoc ebickunennu yombong faiyunudang nga ni nocac suenuna yei hadua? 23Ni Parecoaru kemma geac kpacfu yoac edeai naso imohainochanahemangoc ngicngac yomoc faka mangana yombong ayemmema ebic kunennu faiyunude. Nga geng ine geangga ngicngacfocgayomoc yungecyununa kenggecdeac ua mong mi mema kecnec.”
Currently Selected:
Makekeng 5: Ded
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
