Makekeng 4

Mose ye mi efaiec

1Ifi deu Mose ye yoac yofi meremmiec, “Negennec, yeni ine yoacna mi negensinggegecde nga kedzac mi kpema yofisac degecde, ‘Kebu ye ge mi fingecgendac, i.’ Ifi degec dafi ambade?”

2Ifi deu Kebungo deec, “Marigau noc wiac menannec?” Deu yeng deec, “Yasu.”

3Ifi deu deec, “Bangecfu ukuna.” Deu bangecfu ukuu yasungo meremma boidzoc anu Mose ye kpidohoma kengec amma worabeso anec. 4Worabeso anu Kebungo yofi edeec, “Mariga sinema dziau mena.” Deu maria sinema dziau meu monggoc meremma yasu anec. 5Ifi anu edeec, “Ifi anna yeni yofi negensinggegecde, ‘Fora, Kebu kisicfocninaac Anutungo fingecmiec, imoc Awraham, Itsak nga Yacakow yeneac Anutu.’ ”

6Anu torokpema yofi edeec, “Ge mariga ngakpi manau sinena kemeu.” Ifi deu ye maria ngakpi manau sinema monggoc kpedzima henu leprakubecngo maria wakeu ais isoc kongac kongac anec.

7Ifi anu deec, “Mariga monggoc ngakpi manau monggoc sinena kemeu.” Ifi deu maria ngakpi manau monggoc sinema taiu lepra imoc kpac anu maria sebia tosea isoc monggoc anec.

8Anu Kebungo deec, “Yeni yoacga mi negensinggegecde nga faka warac fingecdac, imoc negenggec fora mi anudeu ine faka ngade fingecdac imocac negenggec fora anude. 9Me kucfaka yohockang imoc ifingoc negenggec fora mi anudeu ge Nilidokuunac doku efeanec fima bangec gbangge gbanggeau kpakebesena. Kpakena Nilidokuunac doku fidang imocngo bangec gbangge gbanggeau heiu sac anude.”

10Deu Mosengo yofi deec, “O Kebu, yoacga merenduaeac kopocsicna wana. Ni ngic enacefac kpac. Ni waracngoc ngic enacefac mi kefai amma yaguc yomoc enactofoc tofohongicga ni yoac edenudang imoc ngic enacefac sifu mi anduae, kpac. Ni yoac dedena kpac nga nedzaranna imoc ebira.”

Ni ngic enacefac kpac

11Ifi deu Kebungo yofi edeec, “Kebu nennoc ngic enacngina meficgeanduae nga ngic ammiba yoara kpac me kedzacfong me kicfifi me kicpisic angande! 12Imocac ge kenna. Ni neannaoc enacga meefaima yoac kpougemba ge imoc debesena.”

13Ifi deu Mosengo deec, “O Kebu, yoac deduaeac kopocsicna wana, ge sifu ngic mong me mong suena kenu.”

14Mosengo ifi deu Kebu ye herebuya gerec isoc yaru deec, “Dacga Aharon Lewingic, ye kecde! Ye yoac enacefac deande, imoc ni negenduae. Nga negennec, ye meficguudeac negemma yeibigeng hama kecde. Amma ye hama gemma ubangerec negenude. 15Geng yoac edema yeac enacfu faina neng ine geac nga yeac enacgoc kecma yoac deecde nga noc faka anecde, imoc kpoungecmebade. 16Kpoungecmeba yeng geac enac mema ngicngac yoac edeyunuude nga yeng geac enac anu geng yeac Anutu isoc annade. 17Nga ge yasu yomoc marigau mema kemma imocngo kucfaka mekecbesena.”

Mose ye Aigitabangecfu dzigeneec

18Anu Mose ye yofea Yitro yearu dzigene kemma yofi edeec, “Ge negenna naric anu ni dzigenema Aigitabangecfu kemma sacarengfocna yeni kecdaengoc me siriha dafi imoc yenembadeac negenduae.” Ifi deu Yitrongo edeec, “Ge ruaegoc kenna!”

19Anu Mose ye Midyanbangecfu kecmanungoc Kebungo yofi edeec, “Ngic gubeso degec, yeni bic homedacgec. Imocac ge naric Aigitabangecfu monggoc dzigenema kenna.” 20Ifi deu Mose ye enemmedacfora meyunuma donggi witiau faiyunuma Anutuac yasu mariau merickema Aigitabangecfu dzigenema kenggec.

21Anu Kebungo Mose yofi edeec, “Ge Aigitabangecfu dzigene kennade, naso imohai faka sasawa mi hehena, imoc menadeac kuc genai, imoc negensima Parecoac kicfu medacbesena. Nga neng ine ubaseri meficgemiba ngicngacareng uaac ebicfunac naric mi yungecyunuude. 22Ge Pareco yofi edebesena, ‘Kebungo yofi dede, “Isracel ye neac morocmedacna. 23#Mke 12:29Nga ni yoac bic yofi edeguai, ge medacna uaac ebicfunac yungecna ye kemma enacna tofohoma eweheihei anembeso. Nga ge imocac negenna naric mi anu segereyunukecnecac ni geac morocmedacga homecfu faibade.” ’ ”

24Anu sing kengkecma tacnegeng bangec monnu tacmagec Kebungo hama Mose homecfu faibesonga anec. 25Ifi anu Tsiporango flinthoc#4:25 flinthoc Hoc mong kongac kongac seria enaragoc. mong enaragoc mema medahaac sebi tosea herecgema imocngo Moseac haniau ukuma deec, “Ge sacac ewebingecna yombong annec.” 26Ifi anu Kebungo Mose wama kenec. Naso imohai sebi herec herecgeac negemma yofi deec, “Sacac ewebingecna annec.”

Aharon nga Isracel enarafocngina

27Anu Kebungo Aharon yoac yofi edeec, “Ge Mose meficgenadeac bangeckisiu kenna!” Ifi deu ye kengkecma Anutuac tiki haniau meficgema titikokoc ammiec. 28Anu Mose ye Kebungo sueu haec, imocac edeec. Edema Kebungo yoac sasawa ededarec nga kucfaka sasawa meudeac dederecge ammidarec, imocac siduc Aharon ammidarec.

29Anu Mose nga Aharon yeri kemma Isracelngicngac yeneac enarafocngina sasawa hagecdeac yoac faima kpedzucyunuoc. 30Kpedzucyunuma Kebungo Mose yoac warac ededarec, imoc Aharongngo edeyunudacma faka kuhagoc imoc ngicngacyeneac kicfu meec. 31Meu yeni negensinggegec amma “Kebu ye Isracelngicngac nenanggac dzoickpendzeng hennegeng anec,” yeniifi negemma fafoc heimima kicmesungina bangecfu hetutuckemanumumigec.

Currently Selected:

Makekeng 4: Ded

Highlight

Copy