Makekeng 3

Icbarang borang tiec

1Mose ye yofea Yitro, midyanngic yeneac sesememe, yeac ramanoningfora garengyunuma kefec. Anu kecma naso monnu bangec kisi edibigeng wangecyunu kemma Anutuac tiki Horew, ihai kensikeec. 2#Aps 7:30-34Anu imohai gerec icbarang monnu borang tima nanu henu Kebuac angerongo gerecborannu fingecmiec. Fingecmiu fima henu icbarang imoc borang tima feec amma sifu mi dzetackeec. 3Ifi hemma Mosengo yofi deec, “Imoc wiac bibiagoc yombong. Gerec imoc icbarama mi dzetackede, imocac hania negembadeac ni meremma wegenac kemma hemba.”

4Ifi dema wiac imoc hentegerudeac kenu Kebu Anutungo hemma icbarama manaunac yofi kpacma deec, “Mose, Mose!” Ifi deu deec, “Ni yomoc.”

5Deu yeng yofi deec, “Ge ihaisac nanna, yei mi hana! Bangec nannec imoc kpetiac, imocac hanitabega hanigaunac hesina!” 6Ifi dema yofi edeec, “Ni kisicfocga Awraham, Itsak nga Yacakow yeneac Anutu.” Ifi deu Mose ye Anutu henudeac kengectoa kpeu kicmesuya mesufuec.

7Ifi anu Kebungo yofi edeec, “Ngicngacfocna Aigitabangecfu dzoicuau faiyunuma kenghedzic hahedzic ayemmekecdae imoc bic hendua nga uaac keracnatang mangana yeneng kpendzennu faiyunukecdae, imocac kiac arongina bic negendua. Yeni kpendzeng witiau kecdae imoc negenduaengoc. 8Imocac ni aigitangicngac yeneac mariunac yungecyunuma onggongyunuba komoc kpegecdeac negemma madua. Amma bangec imohacnac wangecyunuma kemma bangec gombunga nga kunengtoa ihai faiyunubade. Bangec imohai namu nga hanifosoc#3:8 hanifosoc Bide yeneng wiac songeagoc dzaring nga ic dzuria imohacnac kpedzucneandae, imocac kpara hani. doku isoc hakecde.#3:8 namu nga hanifosoc doku isoc hakecde Imoc bangec mong gombunga dokuyagoc nga kerehagoc. Imoc kenacanngic, hittingic, Amoringic peridzingic nga hiwingic amma yebusingic yeneac bangecfu faiyunubade.

Aigitabangecfunac wangecyununa

9Negennec, Isracelac ngicngacareng yeneac kiacsambic bic meficnuec nga aigitangicngac yeneng kenghedzic hahedzic ayemmekecdae imoc ifingoc hendua. 10Imocac yacma kenna, ni Parecoaru sueguduae. Ge neac ngicngacareng, imoc Isracelac bangecfora, yeni Aigitabangecfunac hesicyununadeac kembesena.”

11Ifi deu Mosengo ine Anutu yofi edeec, “Ni ifiango dafi Parecoaru kemma Isracelngicngac Aigitabangecfunac hesicyunu kembade?”

12Ifi deu Kebungo yofi edeec, “Ni gegoc kecbade. Nga neng sueguduae, imocac kpete yofi fingeru hennade, Ge ngicngac Aigitabangecfunac hesicyununa hama tiki yomohai neac enactofoc tofoho ua mema ni eweheihei anemma numunembisia.”

Ni Kecduaengoc

13 # Mke 6:2-3 Ifi deu Mosengo Anutu yofi edeec, “Negennec, ni Isracelngicngac yenearu kensikema yofi edeyunubade, ‘Kisicfocngina yeneac Anutungo ngenearu suenude.’ Ifi deba yeni ‘Anutu kpara merac?’ Ifi dema kpesinenggec dafi edeyunubade?”

14 # Yhkp 1:4, 8 Ifi deu Anutungo Mose yofi edeec, “Ni Kecduaengoc, ni imocnoc.” Dema yofi deec, “Ge Isracelngicngac yoac yofi edeyunubesena, ‘Ni Kecduaengoc yeng ngenearu suenude.’ ”

15Ifi dema torokpema edeec, “Ge Isracelngicngac yofi edeyunubesena, ‘Kebu kisicfocnginaac Anutu, imoc Awraham, Itsak nga Yacakow yeneac Anutu, yeng ngenearu suenudac. Kpacna imoc feengkecbesande, imoc fingecsahengina fingecenggecdesoc yeneng kpacna ifinoc kpacma kecbisia.’

Kemma Isracelac enarafocngina kpedzucyununa

16Anu ge kemma Isracel enarafocngina kpedzucyunuma yofi edeyunubesena, ‘Kebu kisicfocnginaac yeneac Anutu, imoc Awraham, Itsak nga Yacakow yeneac Anutu, yeng fingecnemma yofi edenuec, “Ni ngeneac kekecngina hennegeng angkecduae nga Aigitabangecfu faka hania hania angemmema kecdae, imoc momoc hemma negendacduae.” ’ 17Ifi anu deserima yofi deduae, ni Aigitabangecac sisic kpendzennunac wangecngunu kengkecma kenacanngic, hittingic, Amoringic, peridzingic nga hiwingic amma yebusingic, yeneac bangecfu faingunubade. Bangec imohai namu nga hanifosoc doku isoc hakecde. 18Ge ifi dena Isracelac enarafocngina yeni yoacga negenggec fora anu ge enara yenigoc Aigita ngictau yearu kemma yofi edebisia, ‘Kebu, hebiraio neneac Anutungo fingecnemmedac, imocac negennemmena neni uameme harebec bangeckisiu kengkecma Kebu Anutuninaac sesegerec ohominide.’ 19Anu ni ine yofi negenduae, Aigita ngictau ye uaac ebicfunac yungecngunuu kenggecdeac mi negenude. Mari mong seria yombongngo ngombonggeudeusac yungecngunuu kenggecde. 20Imocac ni marina sinema aigitangicngac yeneac botucfu ebicfaka hania hania mi hehena Aigita meficgeyemmema yunubade. Imoc amba wisickeu ine yungecngunuu kenggecde.

21 # Mke 12:35-36 Anu ni aigitangic ayemmeba ngeneac negenggec ngereeu ngeni wayunuma kenggecde, imoc eng yombong mi kenggecde, kpac. 22Ngac sasawa yeni ine Aigitangac yenigoc wegenac kecdae nga ngac amanginau momoc kecandae wiac yemmegecdeac kpesiyemmegec, yeni wiac silwa nga golngo memea amma wamba momoc yemmegec wiac imoc naroangmedacfocngina heiyemmegec kemeude. Ngeni ifi amma aigitangicngac finacngina wangecyunugec ngeneac anude.”

Currently Selected:

Makekeng 3: Ded

Highlight

Copy