Makekeng 2

Mose sabac

1Anu Lewiac fingecsaheunac ngic mong Lewiac kisicfunac ye Lewiac kisicfunacngoc ngac mong meu 2#Aps 7:20; Heb 11:23ngac ye kecma medac kpenanggema meec. Mema medaha henu siriha gombunga anu afo harebec sufuma mekefec. 3Mekecma torokpema amau sufuudeac negenu osiu sakac#2:3 sakac Hebiraio yoacfu yoac imoc naso yohockangsac fede, yomoc nga Noango kekecngina onggonggeudeac wage mong mema dokuu faiec imoc yerisac yoacngira yomocgoc socfungoc andape. Yeri siricngira yofi socfungoc, ngicngac onggongyunuecdeac memea nga dahai kenecde imoc Anutuac kucfusac feec. mong papyrusngo#2:3 papyrus imoc dzamac dzamac monggac sira. Yeni imoc faigec kerengau sakac imocngo meandae. memea mema titinga bangecac sopea#2:3 bangecac sopea Bangecac sopea mong kpara bitumengngo ua ifia meandae. nga kpadongngo medzickedacma medac ihai faiu kemeu doku tegiau dzamac dzamac manau fau tarec. 4Taru nainango ine noc wiac imohac me imohac mong fingecmiu hembesare dema kemma hereau nanec.

Parecoac naroanga

5Nammanu Parecoac naroanga ye doku nadzirudeac kensikeu enactofoc tofoho naroangfora yeneng doku tegiau kengha amma kecmagec naroang ye dzamac dzamac manau sakac tarec, imoc hemma wanacngaha mong sueu kemma mehaec. 6Mehau tapea mesima henu sabac mong kiacma feu ifi hemma yeac ubia manganeu yofi deec, “Yomoc Hebiraio yeneac sabac mong.”

7Ifi deu nainango hama Pareco naroanga kpesimiec, “Ni naric kemma hebiraiongac mong namuyagoc edeba hama sabac yomoc namu gumegembac me?”

8Ifi deu meremmiec, “O, kenna!” Deu naroang ye kemma sabacac nonggea yombong kparu haec. 9Hau Pareco naroangango edeec, “Ge sabac yomoc mekemma namu gumenengkecna neng imocac bung gembade.” Ifi deu ngac ye sabac mekemma namu gumema kefec. 10#Aps 7:21Kecma medac ye yadiu mema kemma Pareco naroanga miu yeac medaha yombong amma kefec. Anu ye yofi deec, “Ni dokuunac taiba ereec,” Ifi dema kpara Mose#2:10 Mose imocac titiha “Taiba ereec.” kparec.

Mose ye Midyan bangecfu kenec

11 # Heb 11:24 #Aps 7:23-28Anu Mose ye kecma yaditegecma naso monnu Isracelngicngac tosofora yenearu kemma henu wanacngicua ebiria yombong megecdeac ngombongyunugec yenenec. Yenemmanu aigitangic mongngo hebiraiongic tosofora yenearunac mong kpeu henec. 12Ifi hemma noboc nga noboc ngic yeneac kic fiu kpac anu aigitangic kpebucgema sangi usuma semeec. 13Nga ye wereckengau monggoc kemma henu hebiraiongic yohockang yeraocngoc ewema nanec yeremma ngic ogea kopocsic meficgeecmoc ye yofi edeec, “Ge tosoga kpenec imoc mi ngereede.”

14Ifi deu yeng yoac yofi meremmiec, “Mongngo ge neneac desidesingic me ngickuneng mi faiguec, kpac. Ge aigitangic kpehomedang, ifi isoc mi kpebucnuna.” Ifi deu Mosengo kengectoa kpeu yofi negenec, “Fora, faka andua imoc bic negendacdau.”

15 # Aps 7:29; Heb 11:27 Anu Parecongo siduc imoc ifingoc negemma Mose kpehomeudeac negenec. Ifi anu ye ine Parecoarunac worama Midyanbangecfu kemma ihai kefec.

Regucel naroanga Tsipora

Anu kecma uameme monnu dokuteng monggac tegiau hama matarec. 16Anu Midyan yeneac sesememengic mong yeac naroangfora sewen kecgec. Imoc yeni naso imohai hama mangnginaac rama nga noning doku gumecyunugecdeac doku fima otou kpakegec 17kememanu ramagareng goa yeni hama kporacyunubeso anggec. Ifi anggec Mosengo yacma serima namma naroang meficyunuma rama nga noningfocngina doku gumecyunuec.

18Anu yeni mangngina Regucel#2:18 Regucel Regucelac kpara mong Yitro, imoc kibi toseau nanude. yearu dzigenegec yeng yenemma yofi kpesiyemmeec, “Ngeni yaguc dafi amma bic hadae?”

19Ifi deu degec, “Ramagareng yeneng kporacnunubeso anggec aigitangic mongngo meficnunudac. Amma yeng doku fima rama nga noningfocnina gumecyunudac.”

20Ifi degec naroangfora kpesiyemmema deec, “Ngic ye dahai? Ngeni nocac wagec tacdac? Heitaigec hama nenanggoc yaka nebaacsoc.”

21Anu Mose ye Regucelgoc kefudeac negenu naric anu kefec. Anu ngic ye naroanga Tsipora Moseac enema anudeac miec. 22Miu ye medac kpenanggema meu Mosengo yofi deec, “Ni bangec furiau kuric kecduae.” Ifi dema kpara Geresom#2:22 Geresom imocac titiha “Ngic kuriha kecde.” kparec.

23Anu ye kifa homac ihai kecmanu Aigita ngictau homeec. Anu Isracelngicngac yeni ine wanacngic kecma uangina kpendzenggoc mema kecma kiacubamangang amma Anutungo meficyunuma kpendzengnginaunac yungecyunuudeac kpacsambic ammima kecmagec kpakpacnginango yearu enec. 24#Fing 15:13-14Enu Anutungo kiacubamangangina negemma Awraham, nga Itsak amma Yacakow yenigoc dzadzahac meec, imoc negensima 25Isracelngicngac yenenggareng ayemmeu yengena areng anggecde, ifi negenec.

Currently Selected:

Makekeng 2: Ded

Highlight

Copy