Makekeng 7

Anutungo Mose monggoc Parecoaru sueec

1Anu Kebungo Mose yofi edeec, “Negennec, ni Parecoac kicfu ge anutu isoc faigudua nga Aharon ye geac profete kefude. 2Kecma yoac sasawa dederecge anggemba ge imoc dacga Aharon edebesena. Edena yeng Pareco edeu yeng Isracelac ngicngacareng uaac ebicfunac yungecyunuma bangehaunac meickema kenggecdeac debeso. 3#Aps 7:36Nga ni ine Pareco ubaseri meficgemima Aigitabangecfu ebicfaka kuhagoc nga faka mi hehena hania hania monggoc nga monggoc mebade. 4Meba Pareco ye sifu ngereac yoacac kedzac mi kpeude. Anu ni marinango Aigita merandziyunuma yoacngina dema turunga ebiriangoc yemmema habufocna, neac ngicngacareng, imoc Isracelac bangecfora yeni Aigitabangecfunac wangecyunu kembade. 5Anu ni marina sinema Aigitangic ebic meficgeyemmema Isracelac ngicngacareng yeneac botucnginaunac wangecyunubade, naso imohai, nennoc Kebu, imocac hania kekecnginau negentegecyombonggegecde.”

6Ifi deu Mose nga Aharon yeri Kebungo yoac dederecge ayecmeec, imocac sirihau meoc. 7Yeri Parecoaru kemma yoac ua meoc naso imohai Mose ye kifaya 80 nga Aharonggac 83.

Aharonggac yasu boidzoc anec

8Anu Kebungo Mose nga Aharon yofi edeyuruec, 9“Pareco ye yoacngira negemma faka mi hehena mong meec, ifi edenguruu Aharon yofi edebesena, ‘Yasuga mema Parecoac hoannu bangecfu ukuna kemeu meremma boidzoctoa anude.’ ”

10Ifi deu Mose nga Aharon yeri Parecoaru kemma Kebungo dederecge ayecmeec ifi yombong anoc. Aharon ye yasuya Pareco nga enactofoc tofohofora yeneac hoangnginau ukuu kemema boidzoctoa anec. 11Ifi anu Pareco ye ngicfora bangecac asugoc kucfaka memeac negen negenggoc kecgec, nga kpefingdedengicfora yeni hagecdeac yoac fau yeni hama fakangina megec kpete imocngoc fingerec. 12Yeni tembuc tembuc sasawango yasungina ukugec boidzoctoa andacgec anu Aharonggac yasungo yeneac yasu gbokoyunudarec. 13Anu Kebungo deec, faka ifi yombong fingerec. Pareco ye ubaseri amma mi negengyecmeec.

Doku sac anudeac deec

14Anu Kebungo Mose yofi edeec, “Pareco ye ubaseri amma ngicngac segereyunuma uaac ebicfunac yungecyunuu kenggecdeac wayombonggeude. 15Imocac yofi anna, ge wereckenu asoac Pareco ye dokuu kenudeac kemmanu ge yasuga boidzoc anec, imoc marigau mema Nilidoku tegiau meficgenadeac kemma nambesena. 16Namma yofi edebesena, ‘Kebu, hebiraiongicngac neneac Anutu, yeng yofi edegubadeac suenudac, ngicngacfocna bangeckisiu kemma neac enac tofohoma eweheihei anenggecdeac uaac ebicfunac yungecyununa kembisia. Nga geng yoac imoc mong mi tofohoma kecnecngoc. 17#Yhkp 16:4Imocac Kebungo yofi dede, yasu marinau meduae, imocngo doku kpeba sac anude. Ifi fingeru nennoc Kebu, imocac hania negentegecnade. 18Ifi amba dokuu kondungyang homedacgec homuna mangana fiu aigitangicngac yeni doku imoc naric mi negecde.’ ”

19Nga Kebungo Mose yofi edeec, “Aharon yofi edena, ‘Ge yasuga mema Aigitabangectoau doku sasawau sinena dokutoa nga dokukperemeng amma dokuac sing maringo usuusuya nga dokudzohong amma dokutennu doku sasawango sac andarude. Imoc Aigitabangectoa sokodacma sac andaru dokusokoc ic me hocngo memea, ihai momoc fingecdarude.’ ”

Doku sac anec

20Anu Mose nga Aharon yeri Kebungo dederecge ayecmeec, imocac siricfu yombong anoc. Aharon ye Pareco nga enactofoc tofohofora yeneac kicfu yasuya miacma Nilidoku kpeu sac andarec. 21Ifi anu dokuac kondungyang sasawa homedacgec doku homuna mangana fiu aigitangicngac yeni imoc mi negec. Anu sacngo Aigitabangectoa sokodacma feec.

22Anu Aigitangic mamocnginagoc#7:22 mamocnginagoc Ngic ifia yeni bangecac kucfaka hania hania negendacgec. yeni fakangina imocngoc megec Pareco ye ubaseri yombong amma Kebungo deec, imocac siricfu amma mi negenyecmeec. 23Ye eng ihoc bahoc amma ameau dzigene kemma faka sasawa fingecdarec imocac negenu fora kpac anec. 24Anu aigitangicngac sasawa yeni Nilidokuunac doku imoc mi negecac amma doku tegiau doku negecdeac tengbisicbisic usugec.

25Anu Kebungo doku kpeu faka imoc fingecma femanu wenac uameme sewen wisickeec.

Currently Selected:

Makekeng 7: Ded

Highlight

Copy