Makekeng 8
8
Sepengtoatoa fingecgec
1Anu Kebungo Mose yofi edeec, “Parecoaru kemma yofi edena, ‘Kebungo yofi dede, ge ngicngacfocna uaac ebicfunac yungecyununa yeni kemma neac enac tofohoma eweheinembisia. 2Ge segereyunuma uaac ebicfunac mi yungecyununadeu ine deba sepengtoatoa fingecma Aigitabangectoaga sokodacma ebictoa meficgengemmegecde. 3Nga yeni Nilidoku waketorockema erema geangga ngictauamagau emma fefeamagau nga fefegau ifingoc eregecde. Amma kengkecma enactofoc tofohofocga nga ngicngacfocga yeneac amau emma stoffu icsogong meandae, imohai emma uha dokugoc yerecgeandae, otoya imohai ifingoc enggecde. 4Anu imocsac kpac, geangga nga ngicngacfocga yeneac amma enactofoc tofohofocga sasawa yeneac sebiu emma meketahegecde.’ ”
5Anu Kebungo torokpema yofi edeec, “Ge Aharon yofi edena, ‘Ge yasuga marigau mema miacma doku hakecdae nga dokukperemeng amma dokudzohong imohaigeng sinema dena sepengtoatoa erema Aigitabangec sokodacbisia.’ ”
6Ifi deu Aharon ye maria Aigitabangecac dokuugeng sineu sepengtoatoa yeneng erema Aigitabangec sokodacgec. 7Nga ngic mamocnginagoc faka hania hania bangecac asugoc mekecgec, yeni ifingoc fakangina megec kpete socfungoc fingeru sepengtoatoa fingecma Aigitabangec sokodacgec.
Yeni naric kembisia
8Ifi fingeru Parecongo Mose nga Aharon haecdeac yoac fau haec yofi edeyuruec, “Ngeri Kebungira numumiec yeng sepengtoatoa ni nga ngicngacfocna nenearunac meicyunuu ni ngicngacareng faiyunuba yeni naric kemma Kebungina sesegerec ohomibisia.”
9Ifi deu Mosengo yoac yofi meremmiec, “Naric, nga ni ifingoc eweheihei anggenduae. Nga dafineng ge nga enactofoc tofohofocga amma ngicngacfocga ngeneac numuba sepengtoatoa imoc ngenearu nga amabangecngina fekendesoc imohacnac kpetotieyunudacba dokuusac kecbisia, imocac naso imoc ge geanggaoc edenuna.”
10Deu edeec, “Wereckenu.” Ifi deu Mosengo deec, “Denec isoc, ifi fingecbeso. Fingeru ine ge yofi negentegecbesena, Kebu Anutunina ye isoc mong mi kecde. 11Nga sepengtoatoa yeni gearu nga amabangecga fekendesoc imohai amma enactofoc tofohofocga nga ngicngacfocga yenearu momoc kpac andacma Nilidokuusac ine kemedacma kecgecde.”
12Ifi dema Mose nga Aharon yeri Parecoarunac mama Mose ye Pareco deserimiec, ifi isoc yombong sepengtoatoa meickegecdeac Kebu kpacsambic ammima numuec. 13Numumiu Kebu ye Moseac nunumuya imoc negemma deu sepengtoatoa yeni amau nga amasobennu amma uau homedacma fekenggec. 14Anu ngic yeneng kpedzucyunugec guru homac amma hoaema homungnginango amabangec sokodarec. 15Anu Pareco ye henu sepengtoatoa kpac andacgec sebia efaiu monggoc ubaseri amma mi negenyecmeec. Imoc Kebungo bic deec, ifi yombong fingerec.
Numururuc fingecgec
16Anu Kebungo Mose yofi edeec, “Ge Aharon edena yasuya miacma bangecfu yube fede, imoc kpeu Aigitabangectoau yubengo numururuc andarude.” 17Ifi deu yeri ifi anoc. Mosengo Aharon edeu ye mariau yasu menanec, imoc miacma bangecfu yube kpeianggeec. Kpeianggeu numururuc fingecma ngicngac nga yang momoc yinigec. Bangecfu yube feec, imoc sasawa numururuc andacma Aigitabangectoa sokodacgec. 18Nga ngic mamocnginagoc faka hania hania bangecac asugoc mekecgec, yeni numururucngo fingerudeac kpete megecdeac negemma mebibiegec. Ifi anggec numururucngo ngicngac nga yang yinigec. 19#Ruk 11:20Yinigec ngic mamocnginagoc yeni Pareco yofi edegec, “Anutungo gbonga faiu kucfaka yomoc fingecdac.” Degec Pareco ye angandesoc ubaseri amma mi negenyecmeec. Anu Kebungo bic deec, ifi isoc yombong fingerec.
Mogoc fingecgec
20Anu Kebungo Mose yofi edeec, “Wereckenu amanegenggac Parecongo dokuu kenudeac kemmanu geng fingecmima yofi edebesena, Kebungo yofi dede, ‘Ge ngicngacfocna uaac ebicfunac yungecyununa yeni kemma neac enac tofohoma eweheinembisia. 21Nga ge ngicngacfocna uaac ebicfunac mi yungecyununadeu ni mogoc dzacgoc yeneng hagecdeac deba ge nga enactofoc tofohofocga nga ngicngacfocga amma amanginau momoc fingecgecde. Amma aigitangicngac yeneac amau mogoc dzacgoc yeneng hama wakegecde nga ama tackendesoc nga bangecfu momoc sokodacgecde.
22Nga ni wenac imohai ngicngacfocna Gosen bangecfu kecdae yeni segereyunuba yenearu mogoc dzacgoc mi fingerude. Kebu neng bangec yomohai kecduae, imoc negentegecnadeac ifinoc ambade. 23Amma neac ngicngacfocna yeni faka siriha mong ayemmebade nga geac ngicngacfocga ine faka siriha mong ayemmebade. Kpete kuhagoc imoc wereckenu yombong fingerude.’ ”
24Anu Kebungo ifinoc anec. Imocac mogoc dzacgoc yeni Parecoac amau nga enactofoc tofohofora yeneac amau emma Aigitabangec sasawa wakedacma bangec sokoma memanganedacgec.
Hereau yombong mi kembisia
25Ifi fingeru Parecongo Mose nga Aharon haecdeac yoac fau kenu yeri haec yofi edeyuruec, “Ngeni kemma bangec yomohaingoc Anutungina sesegerec ohomibisia.”
26Ifi deu Mosengo edeec, “Imoc naric mi ande. Imoc yofiac, neni Kebu Anutunina sesegerecac wiac ohomini denide imoc Aigitangicngac yeneac hehenu wiac mangana yombong anude. Anu yeni hosucnina hemma modzongina tiyombonggeu herebu negemma hocngo nenerebauac. 27Imocac amma neni Kebungo dederecge anemmedac ifi yombong wenac uameme harebec kengkecma bangeckisiu Anutuninaac sesegerec ohoni ngereeude.”
28Ifi deu Parecongo deec, “Ni faingunuba Kebu Anutungina yeac sesegerec ohogecdeac bangeckisiu naric kenggecde nga hereau yombong ine mi kembisia. Amma ngeni neac momoc numubisia.”
29Ifi deu Mosengo yoac yofi meremmiec, “Ni yaguc waguma kemema Kebu numumiba wereckenu mogoc dzacgoc imoc ge nga enactofoc tofohofocga nga ngicngacfocga ngenearunac meickeu kpac andacgecde. Nga yoac mocgu imoc yofi, ge tobannunuma ngicngachabu yeni Kebunginaac sesegerec ohomigecdeac kembeso degec monggoc mi segereyunubesena.”
30Anu Mose ye ifi dema Pareco wama kemma Kebu kpacsambicammiu 31Kebungo Moseac nunumu negemma deu mogoc yenimonggoc Pareco nga enactofoc tofohofora nga ngicngacforayenearunac meickema kpac andacgec mocgunec mong mi feec. 32Anu Pareco ye naso imohai ifingoc ubaseri yombong ammangicngac uaac ebicfunac kenggecdeac mi yungecyunuec.
Currently Selected:
Makekeng 8: Ded
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
