Makekeng 9

Aigita yeneac yangfocngina homedacgec

1Ifi anu Kebungo Mose yofi edeec, “Ge Parecoaru kemma yofi edena, ‘Kebu hebiraiongicngac neneac Anutungo yofi dede, “Ge ngicngacfocna uaac ebicfunac yungecyununa yeni kemma neac enac tofohoma eweheinembisia. 2Nga ge ubaseri amma segereyunuma kenggecdeac mi yungecyununadeu 3ine ni Kebu mariserinango yangfocga sasawa kpindzing nema fekendae, imoc becosic, donggi nga kamele amma ramaburumakafocga yeneac witinginau hafei homectoayagoc faibade. 4Nga isracelngicngacfocna yeneac yang mong mi homegecde. Ni yeneac yang sasawa faka mong ayemmebade nga Aigita yeneac yang sasawa ine faka siriha mong ayemmebade.” ’ ”

5Amma Kebungo naso mong faima deec, “Ni wereckenu bangec yomohai faka ifinoc mebade.” 6Anu ama wereckenu Kebungo faka ifinoc meu aigitangicngac yeneac yang homedacgec nga Isracelngicngac yeneac yang mongngo mong mi homegec. 7Ifi anu Parecongo faka imocac hania negentegerudeac ngic sueyunuu kemma henggec Isracelngicngac yeneac yang mongngo mong mi homegec. Anu ye ubaseri yombong amma ngicngac uaac ebicfunac mi yungecyunuec.

Kukundung fingecyemmeec

8Ifi anu Kebungo Mose nga Aharon yofi edeyuruec, “Kudzi ohoandae ngeri imohai kemma maringirango gerec kpoumosoha kpedzucnema mema kemma Mosengo imoc Parecoac kicfu sawau ukubeso. 9Ukuu imocngo yube amma sawau emma Aigitabangectoa sokodarude. Sokodacma ngic nga yangsebinginau heiude, imocngo ayemmeu kukundung fingecma bounggema tohogecde. Aigitabangectoau ifinoc fingerude.”

10 # Yhkp 16:2 Ifi deu yeri kudzicmemeaac gerec kpoumosoha mema Parecoac kicfu kemma Mosengo ukuu sawaugeng enec. Enu ngicsebinginau nga yangsebinginau kukundung fingecma bounggema tohodarec. 11Anu aigitangicngac kukundung fingecyemmedarec ifi isocngoc ngic mamocnginagoc bangecac asugoc faka angkecgec yenearu kukundung ifingoc fingeru Moseac kicfu kemma nanggecdeac osigec. 12Nga Kebungo Pareco ubaseri meficgemiu ye Mose nga Aharon yereac yoacac kedzac mi kpeec, Kebungo Mose bic edeec ifi yombong fingerec.

Aisgbomea heiec

13Anu Kebungo Mose yofi edeec, “Ge wereckenu ama werec wereckenggac yacma Parecoaru kemma yofi edebesena, ‘Kebu hebiraiongicngac neneac Anutuninango yofi dede, “Ge ngicngacfocna uaac ebicfunac yungecyununa yeni kemma neac enac tofohoma eweheinembisia. 14Bangectoa bangec yomohai ni isoc ifia mong mi kecdae, imoc negennadeac naso yomohai ge nga enactofoc tofohofocga amma ngicngacfocga ngeni yombong ngunuma kpendzenggac ebic sasawa imoc sueba witinginau haudeac negenduae. 15Ge nga ngicngacfocga bangec yomohanac kpac andacgecdeac ni yagucnoc marina sinema homechafeingo hama ngunudacbeso, ifi ambeso andua. 16#Rom 9:17Nga ni ine kucna edzacguba siducna bangectoa bangecfu degec sokodarudeac dema kekecgagoc miacgudua. 17Nga geng ine geanggaac negenna engena anu ngicngacfocna kpetariyemmema uaac ebicfunac mi yungecyununadeu faka yofi fingerude, 18Negennec ni wereckenu naso yofinenggac aisgbomea seriangoc deba heiude. Imoc kuneng yombong anu warac hanac hanaheaunacngoc Aigitabangecfu emuhanac feereecfunac ifia mong mi heikefec nga yaguc ifingoc mi heiande, imoc deba heiude. 19Heiu ngic nga yang kpedzucyunugec amau mi engeng ngadeau nga uau kecdae, yeni sasawa aisgbomeango yenereu homedacgecde. Imocac ge yaguc bic yombong ngicfocga sueyununa kemma yangburumakafocga nga wiac sasawa ngadeau nga uau kecdae, yeni kpedzucyunuma uaac ebicfunac onggongyunugecdeac amau faiyunudacbisia.” ’ ”

Goa yeneng Kebuac yoacac kengecyunuec

20Ifi deu Parecoac enactofoc tofohofora goa yeneng Kebuac yoacac kengecyunuu wanacngicfocngina nga yangfocngina onggongyunuma amau enggecdeac edeyunugec. 21Nga damoc yeni yoara negemma ihoc bahoc amma wagec yeni ine wanacngicfocngina nga ramaburumakafocngina ngadeau uau eng wayunugec kecgec.

22Anu Kebungo Mose yofi edeec, “Mariga sawau miacna Aigitabangectoau kia aisgbomeagoc heima ngic nga yang amma wiac bangecfunac erema Aigitabangecfu nangkende imoc yenerebeso.” 23Ifi deu ye yasuya sawau miaru Kebungo gbumparandang amma aisgbomea nga gerecborang sueyunuu bangecfu magec. Aigitabangectoau aisgbomea#9:23 aisgbomea Kia kpeu nomangtoa hoennu kpeu imoc kia isoc maande nga imoc aisgbomea seria yombong ande. heiec imoc yennoc deu fingerec, 24#Yhkp 8:7; 16:21imoc wiac kuneng yombong anec. Aisgbomea heima feec nga gerecborang bangecfu dzekeng dzeha amma feec. Aisgbomea imoc ebira yombong amma Aigitabangectoau ngicngac fingecma keceregec imohai ifia warac mong mi fingerec. 25Anu aisgbomea imocngo Aigitabangectoau kpeu wiac bangecfunac erema nangkenec imoc yenereu homedacgec, ngic nga yang momoc. Amma ic bangecfunac erema nangkenec imoc ifingoc hedzac kpedzacmeyunuec. 26Nga Isracelngicngac Gosenbangecfu kecgec yenearusac aisgbomea mong mi heiec.

Ni kopocsic meficgedua

27Ifi fingeru Parecongo Mose nga Aharon haecdeac yoac fau yeri haec yofi edeyuruec, “Ni naso yomohai kopocsic kuneng meficgedua, Kebu ye dindingac nga ni amma ngicngacfocna neneng faka mangana anding. 28Anutuac gbumparandang nga aisgbomea feracnunuyombonggedeac ngeri Kebu numumiec. Numumiec ine faingunuba naric kenggecde. Ngeni yei naso ukuma torokpema mi kecbisia.”

29Ifi deu Mosengo turunga yofi meremmiec, “Ni taong wama marina sineba Kebuaru enu gbumparandang nga kia aisgbomeagoc tegeckenu yofi negentegecbesena, bangectoa bangec imoc Kebuac. 30Nga ni ge nga enactofoc tofohofocga ngeneac hania negenduae, ngeni naso yomohai ifingoc Kebu Anutuac mi damungunude.”

31Anu naso imohai uau yofi fingerec, bali#9:31 bali imoc semeng mong dzaring nga gbomea wit isoc ereande imoc bic fora nanec nga flaks#9:31 flaks imoc dzaring mong sira mema witic yumuma linenkporuc meandae nga gbomea mema kerecdoku meficgeandae. imoc dzuria kpebeso anecac heu moronggedaroc. 32Nga wit#9:32 wit uha bummeandimbe imocac semengdzaring. nga dinkelwit#9:32 dinkelwit imoc wit semenggac ogea mong mi yadiocac aisgbomeango mi memanganeyuruec.

33Anu Mose ye Pareco nga taong wayuruma kemma maria Kebuaru miaru gbumparandang nga kia aisgbomeagoc kpac ammategeru kiatungbaung bangecfu dzikeec. 34Nga gbumparandang ngakia aisgbomeagoc kpac anu Pareco ye imoc hemma yengena ngaenactofoc tofohofora kopocsicfu kekecngina meserigecac ubaserimonggoc anggec. 35Anu Kebungo Mose edeecmoc, ifi yombongfingerec. Pareco ye ubaseringoc kecma Isracelngicngac uaacebicfunac mi yungecyunuec.

Currently Selected:

Makekeng 9: Ded

Highlight

Copy