Makekeng 10
10
Ipua fingecgec
1Ifi fingeru Kebungo Mose yofi edeec, “Ge Parecoaru kembesena. Ni neannaocnoc kucfaka yomoc botucnginau mebadeac ye nga enactofoc tofohofora yeni faka ayemmeba ubaseri yombong andae. 2Anu ni Aigita yeni neac kucfakana bibiagoc edzacyunuba kpidohogec imocac siduc esamedacfocga yeneac kedzacfu denade amma ni Kebu, imoc negentegecgecde.”
3Ifi deu Mose nga Aharon yeri Parecoaru kemma yofi edeoc, “Hebiraiongicngac neneac Kebu Anutunina yeng yofi dede, Ge nasoherec ubaseri annec nga neac kicfu mi memaemema kecnecngoc imoc mi ngereede. Ge fakaga imoc wana! Ngicngacfocna uaac ebicfunac yungecyununa yeni ni eweheinenggecdeac kembisia. 4Nga negennec, ge wama uaac ebicfunac mi yungecyununadeu ine wereckenu ipua sueyunuba fingecma amabangecgau hagecde. 5Hama bangec hafoangoc semegec ngeni bangec naric mi henggecde. Nga aisgbomeango wiac goa mi memanganeu tacde, yeni imoc nedacma bangecfu icngina nangkende imocac maria ginehedacgec ichasac nanude. 6Nga geangga amamana sasawa nga enactofoc tofohofocga yeneac amamana nga aigitangicngac sasawa yeneac amamana, imoc momoc wakedacma fegecde. Faka imoc bangecfocngina yeni fingeceregecfunac kecerema yaguc bangec yomohai ifia mong mi fingeru henggec.” Ifi dema dzigenema Pareco wama kenoc.
Ge yungecyununa
7Anu Parecoac enactofoc tofohofora yeneng yofi edegec, “Ngic imoc ye naso herea bic botac isoc mendannunuma kecdengoc nga Aigitabangec kpac ambacac, ge imoc bic negentegecnec. Imocac ge ngic imoc uaac ebicfunac eng yungecyununa kembisia! Ifi anna yeni kemma Kebu Anutunginaac enac tofohoma eweheimibisia.”
8Ifi dema Mose nga Aharon Parecoaru merengyurugec dzigeneec yofi edeyuruec, “Ngeni kemma Kebu Anutunginaac enac tofohoma eweheimibisia. Nga merac merac yeneng kenggecde?”
9Ifi deu Mosengo yofi meremmiec, “Kebuninaac nasotoa tacnideac neni yada kapia, nambaracfocnina nga amayang habuya habuya imoc momoc wangecyunu kennide.”
10Ifi deu yofi edeyuruec “Ni ngeni nga nambaracbisicbisicfocngina naric mi faingunuba kenggecde, imoc kpac yombong. Ifi amba merac Kebungo ngenigoc kecma faka kuneng ifia meficgeude? Ngeni wiac mangana anggecdeac negemma kecdaeac kicmesunginau henduae. 11Imocac ngic ngenengsac kemma yeac enac tofohoma eweheimibisia, ngeni ifinoc ambeso dedau.” Pareco ye ifi deu ngicfora yeni Mose nga Aharon ngabasiricfu meicyurugec ngadeau kemeoc.
12Kemeec Kebungo Mose yofi edeec, “Ge mariga miacma Aigitabangecfugeng sinena ipua yeneng hama bangecfu magecde. Magec aisgbomeango wiac maringina tengging tengging sasawa mi memanganeu tacde, imoc nedacgec kpac andarude.”
13Ifi deu Mose ye yasuya miacma Aigitabangecfugeng sineec. Sinemanu Kebungo deu wenac ere ereaugennac firangtoa wenac uameme imohai kpema femanungoc ama toforema wereckenec. Ama wereckenu firang imocngo ipuatoatoa mefirangyunuu hadacgec. 14#Yhkp 9:2-3Yeni homac yombong hama mama Aigitabangectoa sokodacgec. Warac ipuatoatoa ifia mong mi hagec amma kecma ngade ifia monggoc mi hagecde. 15Yeni bangec hafoangoc semema sokodacgecac bangec dzadzu yombong anec. Nga yeni iwai mariagoc nga icgbomea amma wiac sasawa aisgbomeango mi heihomeec imoc sasawa nedacgec. Nedacgec Aigitabangectoa imohai ic tengging tengging tackenec nga semeng uau nangkenec, imoc sasawa maria kpac andarec.
Homecac kpendzeng kpac ambeso
16Ifi fingeru Pareco ye Mose nga Aharon haecdeac yoac bic yombong fau kenu haec yofi edeyuruec, “Ni Kebu Anutungina kopocsic meficgemima ngeni ifingoc angemmedua. 17Imocac ngeri negennemma kopocsicna naso yomocacnec wama Kebu Anutungira numumiec homecac kpendzeng yomocsac nearunac meickeu kpac ambeso.”
18Ifi deu Mose ye imohacnac mama Kebu kpacsambic ammiec. 19Ammiu Kebungo firang imoc merenu wenac keme kemeaunac hama seria kpema ipua mefirangyunuu kondung sacsacfu kemedacgec Aigitabangectoau ipua kpac andacma mong mi tacgec. 20Nga Kebungo Pareco ammiu ubaseri yombong amma Isracelngicngac uaac ebicfunac mi yungecyunuec.
Kundungtoa fingerec
21Ifi anu Kebungo Mose yofi edeec, “Ge mariga sawau miacna Aigitabangecfu kundungtoa kpeu imoc maringinango naric kpeseregecdeacsoc ifi yombong anude.” 22#Myeg 105:28; Yhkp 16:10Ifi deu Mose ye maria sawau sineu Aigitabangec kundungtoa kpema wenac uameme harebec ifi feu 23ngicngac yeni engenggecdeac ambibiema tatacnginausac tacmagec uameme harebec wisickeec. Nga Isracelngicngac yeneac amabangecfusac kperagi feu naric kecgec.
24Ifi fingeru Parecongo Mose haudeac yoac fau hau yofi edeec, “Ngeni kemma Kebuac enac tofohoma eweheimibisia nga nambaracbisicbisicfocngina yeni ifingoc ngenigoc naric kembisia. Nga ramanoning nga donggiburumakahabufocngina imocsac yomohai nenigoc wayunugec kecbisia.”
25Ifi deu Mosengo yofi deec, “Kebu Anutuninaac kicfu sesegerec ammima yang kpehou amma ohominide nga hafoangoc ohomini dzedarudeac ge negennemmema nemmebesena. 26Neni yangburumaka gedannina imoc momoc abarangyunudacma monggac sorianec mong mi wani tacbeso. Neni yenearunac goa meisingyunuma Kebu Anutuninaac sesegerec ohomima yeac enac tofohoma eweheiminide. Amma neni noc wiac mema Kebu sese ohominide imoc mi negemma edi kensikemaguc ine negennide.”
27Nga Kebungo Parecoac uba mehonggameu uaac segereyunuma ebicfunac yungecyunuudeac mi ammiec. 28Nga Parecongo Mose yofi edeec, “Ge neac kicfunac meickena! Ge monggoc nearu hanadeu, wenac imohai homebanggac neac kicfu monggoc mi dzigene habesena.”
29Ifi deu Mosengo yofi edeec, “Ge fora yombong denec. Ni geac kicmesuga monggoc mi hembade.”
Currently Selected:
Makekeng 10: Ded
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
