Makekeng 22

Hamangecac turunga kpoukpouac dederecge

1Anu ngic mongngo burumakangiwa me rama mong hamangec mema kpenec anude me bunggac sueudeu ye burumakangiwaac turunga burumaka marimong nga ramaac turunga rama neackpac, ifi faibeso.

2Hamangec meme ye ama hetackema emma kecmanungoc minginango meficgema kpehomeudeu ngic sac hetinggeecac kopocsic#22:2 sac hetinggeeac kopocsic imoc ngicngac kpebucyunugec, kopocsic ifia. meficgeec imoc mi demibesonga. 3Wenac eremanu kpebucgeudeu ine ngic sac hetinggeecac kopocsic meficgeec demibesonga. Anu hamangecmemengo wiac hamangec meec imocac turunga mingina wiac hafoangoc mibeso. Wiac mong miudeac mong mi femiudeu ine imocac turunga hamangecngic suegec dzo kirecgeu wiac hamangec meec imocac sirihau mingina mibesonga.

4Nga yang hamangec memea, burumakangiwa me rama me donggi imoc gboringoc kecmanu yearu meficgegecdeu ye imoc minginaaru meremmima yengenaarunac amayang ifia mong imoc momoc torokpema meremmibeso.

5Nga mongngo yangfora yaka negecdeac faiyunuu yeni ubanginaac kecma ogeaac semeng uau me waing uau kemma wiac negecdeu me faiyunuu ogeaac manennu kemma negecdeu imocac turunga imoc ye yengena semeng uaunac nga wainguaunac fora gombunga fede imoc faima mibeso.

6Anu gerec dzema ferecge kemma somangoda dzeu witsemeng dedeha me uau nangkendengoc me uau wiac goa dzedarude, ifi fingerudeu ngic me ngac gerec fau dzeec yeng turunga hafoangoc kpoudacbeso.

7Ngic mong ye dzo me finaha goa imoc ngicogeango miu garenggemiudeac fau tacmanu yeac amaunac hamangec megec hamangecmemengic meficgegecdeu ammigec ye hamangec meec imoc yengenaarunac wiac imocacsoc atac yohockang torokpema faima merembeso. 8Nga hamangecmemengic mi meficgegecdeu ine ama minginango ogeaac wiac hamangec meec me kpac imocac hania fingectegerudeac Anutuac kicfu kenu haniaya desibesonga. 9Ngic mong ye sing ferahema ngicogeaac wiac mong hamangec meudeu, imoc burumakangiwa me donggi me rama me ngakpikporuc me wiac imoc me imoc mong sufuec nga imoc neac, ifi dema taiemeecdeu yeri yoacngiragoc Anutuac kicfu faiyurubesonga. Anu Anutu ye yeac me yeac hania mekperagima kopocsihagoc deude ngic ye ogeac turunga atac yohockang meemma mibeso.

10Ngic mong ye ogeaac donggi me burumakangiwa me rama me yang mong garenggemiudeac dema miu yang imocngo homeude me ebic me hafei meficgeudeu me ngic mongngo mi hemmagec monnu meworaudeu 11ngic yohockang yeri Anutuac kicfu yoac deserima debesera. Nga ngic ye ogeaac wiac hamangec meudeac me memanganeudeac maria sineec me kpac imocac hania fingectegecbeso. Fingeru yang minginango yoac deseriecac negenu fora anu turunggac mi debeso. 12Nga hamangec megecfu ogeango mingina turunga kpoumibeso. 13Nga kateyang mongngo soriango wiac mong kekehagoc membarackema kpema neecfu imocac hania fingectegerudeac tosea mong mema hama edzaheu turunga mong faudeac mi debesonga.

14Ngic mongngo ogeaac yangngo uaya mong memiudeac naso wegenac mekecma monggoc meremmiudeac deecfu mingina mi hemmanu sebia manganeude me homeudeu imocac turunga hafoangoc kpoumibeso. 15Nga minginango hemmanu ebic fingerudeu turunga faudeac mi debesonga. Nga yanggac uabung faiecfu uabungngo turunga ambeso.

Kekec nga angammeme goaac dederecge

16 # Dser 22:28-29 Ngacnaroang mong ye ngicgoc warac mi feec amma ngic monggac enembingeha mi andeu ngic mongngo ikocfu dekerec ammima yegoc feudeu ye ngacac buntafara yemmema enema anudeac mebeso. 17Nga mamango ye meudeac wama segereyombonggeudeu ngic ye ngacnaroang ngicgoc mi fegec, yeneac ngacbung meandae, dzo imocacsoc yemmebeso.

18 # Dser 18:10-11 Ngac mong ye bangecac asugoc kucfaka meande ye naric mi kefudeac homecfu faibeso.

19 # Sese 18:23; 20:15-16; Dser 27:21 Mocgu mocgu sasawango yanggoc eweeneng siricfu kefudeu ye homecfu faibeso.

20 # Dser 17:2-7 Anutuacsac sesegerec ohomibisia. Ngicngac nemuonga nga anutu hania hania sesegerec ohoyemmegecdeu yeni kpetotieyunudacgec kpac ambesandae. 21#Mke 23:9; Sese 19:33-34; Dser 24:17-18; 27:19Ngeni ngenang Aigitabangecfu kuric kecgecac kuricngic mong meenti memati nga kenghedzic hahedzic mi ammibisia.

22Ngeni ngachotsec nga nambarac mangkpac beging yeni ebic mi meficgeyemmebisia. 23Ifi ayemmegecdeu yeni kpacsambic anenggec ni foracngoc negengyemmebade. 24Negengyemmema kimbennaac gerecborangngo dzendangdangngunuma dzikacac beango kpebucngunuba enengfocngina hotsec amma kecgecde nga nambaracfocngina manghofocma beging amma kecgecde.

25 # Sese 25:35-38; Dser 15:7-11; 23:19-20 Anu ngicngacfocna yenearunac mongngo dzofinaha kpac kefu dzo mong minadeu imoc kecma turunga meemma genudeac mi debesena. Nga ngic goa dzo yemmema turunga meemma meandae, ge yeni isoc mi ambesena. 26#Dser 24:10-13Amma ge dzoac turunga tosogaac ngakpi menadeu ine wenac mi kememanu monggoc meremmibesena. 27Nocac wiac mocgu imocnganoc kperaha sebiaac birang ande, imoha kpac ine noc wiacngo kperacemema gau feude? Ni wosoefacnagocac ye ni kpacsambic anenudeu negemmibade.

28 # Aps 23:5 Ge Anutu mi emmibesena amma ngicngacfocgaac enara kecde ye mi soweckebesena.

29Ge naso mi ukuna, ge nenesemeng amma oliwa nga wainguagaunac seseac wiac bic faibesena. Amma waracmedacga neac bung debesena. 30Nga ramaburumakafocga ngiwa yeneac warac fingec fingera imoc mema yofi ambesena. Imoc nonggeagocngoc wenac sewen kefu wisickeu wenac uameme kpete eit imohai ni nembesena.

31 # Sese 17:15 Nga ngeni neac kpetiac ngicngac kecnendae. Imocac amma bangeckisiu kateyanggac soriango yang mong membarackema kibucgeudeu ngeni imocac fusia imoc mi nebisia, imoc kasi yemmegecdeac ngadeau ukubisia.

Currently Selected:

Makekeng 22: Ded

Highlight

Copy